«سەركە» دەگەن ءبىر سايت بار. «سەركەنىڭ» سوڭعى كەزدە كەيبىر باسىلىمدار سەكىلدى وپپوزيتسيانى قاق بولگەن جسدپ جاعىنا شىعىپ كەتكەنى دە جاسىرىن ەمەس. مەن تۋرالى دا كوپ نارسەنى بىلىقتىرىپ جازىپ ءجۇر. سوتقا دا بەرۋگە بولاتىن شىعار. بىراق ءوز باسىم تاۋەلسىز باق جاعىندا جۇرگەننەن كەيىن، ونداي ويدان ازىرگە اۋلاقپىن. بىراق، كىم بىلەدى، ۋاقىتىندا كورەرمىز. جالعىز مەن ەمەس، بيلىككە سالماقتى سىن ايتا الاتىن باسقا دا تۇلعالارعا ورىنسىز تيىسۋىنە قاراعاندا، بۇل سايت بيلىكتىڭ، الدە، بيلىكتىڭ ىعىنان تابىلىعانسىپ ۇلت ءىشىن الاتايداي ءبۇلدىرۋدى كوزدەيتىن كۇشتەردىڭ ىقپالىندا بولسا كەرەك.   قازىر ءوزى ءومىرشىل ەمەس، وسەكشىل باق-تىڭ  زامانى بوپ كەتتى عوي. جاقىندا بۇل سايت مەن تۋرالى بىردەڭە جازىپتى. سايتتىڭ جازۋىنا قاراعاندا  مەن قاجىگەلدينننىڭ ءۇيىن تارتىپ الىپپىن. وسىنداي جالاعا بايلانىستى مەنىڭ جاۋابىم مىناداي:

 قاجىگەلدين مەنىڭ رۋحاني اعام ءارى دوسىم. ول كىسىنى ەشقاشان ساتقان ەمەسپىن. ول كىسىگە قاتىستى ەش جامان ءسوز ايتا المايمىن. بەينەلەپ ايتساق، مەن قاجىگەلديننىڭ ءۇيىن ەمەس...كۇيىن، وسىنداعى اتى مەن زاتىن «تارتىپ» العانمىن! جاڭا عانا اكەجان ماعجانۇلىمەن  سويلەسىپ، وسى ماسەلەنى ايتتىم، سايتتاعى ماقالانى ءالى كورمەپتى. «ول ۇيگە مەنىڭ ەش قاتىسىم جوق! سەن مەنىڭ ەلدەگى رۋحاني ارىپتەسىم بوپ كەلدىڭ، كەزىندە مەنىڭ ورىنباسارىم بولدىڭ، رنپك-نى مەن سىرتتا جۇرگەندە جالعىز باسقاردىڭ. وپپوزيتسيالىق كوزقاراسىڭ ءۇشىن ۇرىلدىڭ، سوعىلدىڭ، سوتتالدىڭ. سوندىقتان كەزىندەگى ءوزىڭ يە بولىپ، ءوزىڭ رۇقسات بەرىپ، رنپك ءوفيسى بولعان شاعىن ءۇيدىڭ تاعدىرى ءوز قولىڭدا»، - دەدى. جانە دە ناقتىلاپ ايتارىم، رەسمي تۇردە ول ۇيگە قاجىگەلديننىڭ ەش قاتىسى جوق. سوندىقتان وسى اڭگىمەنى قوزدىرۋشىلار قاجىگەلدينگە تاعى دا ءبىر، ءالى ءبىز بىلمەيتىن ايىپتار تاعىلۋىنا جول اشقىسى كەلەدى دەپ ويلايمىن. ول كىسىگە قارسى قىلمىستىق ىستەر ءالى دە دوعارىلماعىنىن قاپەرگە الا وتىرىپ، مىنانى ەسكەرتەمىن. ءيا، سول ءۇي رەسمي قۇجات بويىنشا مەنىڭ ءۇيىم. قازىر مەنىڭ رۇقساتىممەن وندا رنپك-داعى بۇرىنعى ءبىر دوسىمنىڭ ءىنىسى تۇرىپ جاتىر. ءۇيدى رەسمي تۇردە مەن، ءامىرجان قوسانوۆ، وسىدان ون شاقتى جىل بۇرىن ساتىپ العانمىن. «سەركە» سايتى ونى قازىر عانا بىلىقتىرىپ جاتقانىنىنىڭ جانە وعان سول جىگىتتىڭ ارالاسۋىنىڭ استارىن مەن ءتۇسىنىپ وتىرعاندايمىن. ول ءۇيدى مەن نە ىستەيمىن، قازاقستان زاڭدارى بويىنشا، مەنىڭ ءوز ەركىمدە. سوندىقتان  «سەركە»  سايتى سەنساتسياعا سۋساپ بارا جاتسا، بيلىكتەگى مىقتىلاردىڭ مەنشىگىن جاريا ەتسىن. ارينە، الىجەتكەندى عانا مۇيىزدەي الاتىن ءبىزدىڭ «سەركەنىڭ» ونداي قيىن تاقىرىپقا تاۋەكەلى جەتپەسى انىق.  

PS. ايتپاقشى، كەزىندە، شەتەلگە كەتكەندە قاجىگەلدين ءوزىنىڭ وتباسى تۇرعان پاتەردى دە مەنىڭ اتىما جازىپ بەرگەن. بىراق قازاقستان سوتى ونى دا تارتىپ العان. جازۋ كەرەك بولسا،  سول تۋرالى جازىڭدار، «سەركەلىكتەر».

ءامىرجان قوسانوۆ

Abai.kz