بەلگىلى كينورەجيسسەر ەركىن راقىشەۆ «كەش كەلگەن ماحاببات» اتتى تاعى ءبىر كينونى ومىرگە اكەلدى. تاعى ءبىر دەيتىنىمىز... ءيا، ءبىز قازىر ە.راقىشەۆ تۇسىرگەن كينولاردىڭ سانىنان جاڭىلىپ قالدىق. دەرەكتى فيلمدەرى ءوز الدىنا ءبىر توبە. مەنىڭشە، ەركىن ەسىمىن داڭققا بولەيتىن سول دەرەكتى فيلمدەرى. ول تۋرالى اڭگىمە بولەك. ءبىزدىڭ ايتپاعىمىز... ءيا. «كەش كەلگەن ماحاببات». جالپى مامان بولماعان سوڭ بۇل كينونى دا تولىقتاي تالداعىمىز جوق. تاقىرىبى جانعا جاقىن بولعان سوڭ... ماحاببات ەمەس. ويى. دۇرىسى – ءدىندى قاۋزاي كەتكەنى.

ءجا، اڭگىمەنى باسىنان باستايىق. ول ءوزى كوپ سەريالى كينو كورىنەدى. بىزگە قىسقارتىلعان ەكى ساعاتتىق نۇسقاسىن كورۋدىڭ ءساتى ءتۇستى. كينو كورەتىندەي كوڭىل قوشىم جوق ەدى. ەركىندىكى بولعان سوڭ... دوس بولعان سوڭ... تەلەديدارعا ەرىكسىز تەلمىردىم. ەكى ساعات زۋ ەتە قالدى. ەركىندى قۇتتىقتاعىم كەلىپ، تەلەفون تۇتقاسىن كوتەردىم. ساعاتقا كوزىم ءتۇستى. ساعات ءتىلى ۇشتەن اۋىپتى. تۇنگى ۇشتەن. ەركىننىڭ كينوسى مەنىڭ ءبىر تۇنگى ۇيقىمدى ۇرلادى. ويعا بولەدى. مازامدى قاشىردى. ناتيجەسى – قولىما قالام الدىم.

كينوداعى وقيعا. ءساتسىز ماحاببات. جەڭىل ءومىر. تىعىرىققا تىرەلگەن اتا-انا. توعىسقان تاعدىرلار. بارى وسى. تارقاتىپ ايتساق، ومىردە جاراسىمىن تاپپاعان جۇپتار از ەمەس. ەكى جاس قوسىلماي جاتىپ اجىراسسىن، نە قوسىلعان سوڭ اجىراسسىن، ونىڭ سەبەبىنە ءۇڭىلىپ جاتقان ادام از. مىنەزدەرىنىڭ جاراسپاۋى، الەۋمەتتىك ماسەلەلەر، كەلىن مەن ەنە قاتىناسى، تاعى دا باسقا سول سياقتى تولىپ جاتقان سەبەپ-سالدارلار، بايىبىنا بارساق، مۇنىڭ ءبارى ءبىزدىڭ ۇلتتىق بولمىسىمىزعا ءتان ماسەلەلەر ەمەس. ەگەر ءبىز وسى وزىمىزگە ءتان ەمەس پروبلەمالاردان ارىلساق، تازا ۇلتتىق كەيپىمىز ايقىندالادى. ال ول كەيىپتە ەكى جاستىڭ اجىراسۋىنا سەبەپ بولعان الگى ءبىز تىزبەلەپ شىققان ماسەلەلەر اتىمەن جوق.

سوندا ءبىز ول پالەكەتتەردى قايدان جۇقتىردىق؟ دۇرىس. وزگەرىسكە تۇسكەن ومىردەن. راس، كسرو ساياساتىندا دا كىنارات بار. بۇگىنگى تىلمەن ايتساق، جاھاندانۋدىڭ ۇلتتىق ءۇردىستى ءوز ىرقىنا بەيىمدەۋى دەگەن سياقتى دا ءبىر عىلىمي تۇجىرىمدى كولدەنەڭ تارتۋعا بولادى. شىنتۋايتىنا كەلگەندە، ونىڭ ءبارى دالباسا. ءبىزدىڭ ۇلتتىق بەينەمىزدى جوعالتۋدىڭ ءبىر-اق سەبەبى بار. ول – قۇدايسىزدىق. ءبىز اللادان اجىراپ قالدىق. شايتاني ماسەلەلەردىڭ العا شىعۋى سوندىقتان. ەركىن «كەش كەلگەن ماحابباتىندا» سونى ايتىپتى. جانە دە كينو تىلىمەن كەلىستىرىپ ايتقان. ءبىز سوعان سۇيسىندىك. كورىڭىز. ءسىز دە سۇيسىنەسىز.

قۇديار ءبىلال.

اباي.kz