«سالاماتتى قازاقستان»: الىس اۋىلداعى احۋال قالاي؟

ەلىمىزدىڭ دەنساۋلىق ساقتاۋ سالاسىن دامىتۋعا 2011-2015 جىلدارعا ارنالعان «سالاماتتى قازاقستان» باعدارلاماسى­نىڭ نەگىزگى ماقساتى ەلىمىزدىڭ ورنىقتى الەۋمەتتىك-دەموگرافيالىق دامۋىن قامتاماسىز ەتۋ ءۇشىن حالىقتىڭ دەنساۋ­لىعىن جاقسارتۋ بولىپ تابىلادى. سونى­مەن قاتار باعدارلامانىڭ ءبىرىنشى كەزە­ڭىندە حالىقتىڭ ءومىر ءسۇرۋ ۇزاقتىعى 69,5-كە دەيىن بولسا، ەكىنشى كەزەڭ 2015 جىلعا قاراي 70 جاسقا دەيىن ۇلعايۋ كۇتىلۋدە.

ەلباسى «جاڭا الەمدەگى جاڭا قازاق­ستان» اتتى جولداۋىندا جاڭا كەزەڭدەگى ەلدىڭ دامۋىنداعى ساياساتتىڭ ءبىر باعىتى مەديتسينالىق قىزمەت كورسەتۋ ساپاسىن جاقسارتۋ جانە دەنساۋلىق ساقتاۋدىڭ جوعارى تەحنولوگيالىق جۇيەسىن دامىتۋ كەرەكتىگى اتاپ كورسەتىلگەن ەدى. سونداي-اق دەنساۋلىق ۇيىمدارىنىڭ ماتەريال­دىق-تەحنيكالىق بازاسىنىڭ جاراقتالۋى، كلينيكالىق مامانداردىڭ كاسىبي دەڭ­گەيىن ارتتىرۋ جانە بۇل سالاعا مەديتسي­نالىق كومەكتىڭ ۇيىمداستىرىلۋى مەن كومەك كورسەتۋ ۇدەرىستەرىن باسقارۋدىڭ قازىرگى تەحنولوگيالارىن ەنگىزۋدى، مەدي­تسينالىق كومەككە اقى تولەۋدىڭ ءتيىمدى ادىستەرىن ەنگىزۋدە ايتىلعان بولاتىن.

سونىمەن قاتار جولداۋدا ەلباسى «سالاماتتى ءومىر سالتى مەن ادامنىڭ ءوز دەنساۋلىعى ءۇشىن ىنتىماقتى جاۋاپكەر­شىلىگى قاعيداتى – مىنە، وسىلار دەنساۋلىق ساقتاۋ سالاسىنداعى جانە حالىقتىڭ كۇندەلىكتى تۇرمىسىنداعى مەملەكەتتىك ساياساتتىڭ ەڭ باستى ماسەلەسى بولۋى ءتيىس» دەپ اتاپ كورسەتكەن بولاتىن. ەلباسىنىڭ بۇل جولداۋىنان كەيىن، حالىقتىڭ سول كەزدەگى دەنساۋلىق جاعدايىنا سايكەس «سالاماتتى قازاقستان» باعدارلاما­سىنىڭ باسىم باعىتتارى مەن ىسكە اسىرۋ تەتىكتەرى ايقىندالعان بولاتىن. قازىرگى تاڭدا باعدارلامانىڭ 2014-2015 جىلدار ارالىعىنداعى ءىى كەزەڭى جۇزەگە اسۋدا. «سالاماتتى قازاقستان» باعدارلاماسى اياسىندا وبلىستا كوپتەگەن مەديتسينالىق ۇيىمدار جاڭادان بوي كوتەرسە، ءبىرشا­ماسى كۇردەلى جوندەۋدەن ءوتىپ، وڭىردەگى دەنساۋلىق سالاسىنىڭ جۇمىسى قارقىندى جۇرۋدە.

وتكەن اپتادا مەملەكەتتىك «سالا­ماتتى قازاقستان» باعدارلاماسى اياسىن­دا ايماقتا دەنساۋلىق سالاسى بويىنشا جاڭادان سالىنىپ جانە كۇردەلى جوندەۋ­دەن ءوتىپ جاتقان دەنساۋلىق ۇيىمدارىنىڭ جۇمىسىمەن تانىسۋ ءۇشىن وبلىس ورتالى­عىنداعى ءبىر توپ بۇقارالىق اقپارات قۇرالدارى وكىلدەرى قارماقشى اۋدانىنا جولعا شىقتىق. اۋدان وبلىس ورتالىعىنان شالعاي جاتقانىمەن جاڭادان سالىنىپ جاتقان جول الىس جولدى اسا سەزدىرە قويمادى.

كوزدى اشىپ-جۇمعانشا قارماقشى اۋدانىنا قاراستى ءىىى ينتەرناتسيونال اۋىلىنا دا جەتتىك.

بۇرىنعى بالاباقشادان جاڭا ەمحاناعا

پرەسس-تۋردىڭ العاشقى باعىتى وننان استام ۇلتتىڭ وكىلى قونىستانعان ءىىى ينتەرناتسيونال اۋىلى بولاتىن. بۇگىندە اۋىلدا 2578 تۇرعىنى بار. ونىڭ 1782-ءى ەرەسەكتەر، 81-ءى جاسوسپىرىمدەر بولسا، 715-ءى بالالار ەكەن. ءتۇرلى ۇلت وكىلدەرى تىرشىلىك ەتىپ كەلەتىن اۋىلدىڭ نەگىزگى كاسىپ كوزى – ەگىن شارۋاشىلىعى. وتكەن اپتادا سارسەنبىنىڭ ءساتتى كۇنىندە اۋىلدا ەگىنگە وراق ءتۇسىپ، ديقاندار الا جازداي ەتكەن ەڭبەگىن جيناۋعا كىرىسكەن ەكەن.

باق وكىلدەرى ات باسىن بۇرعان بۇل ەلدى مەكەندە «سالاماتتى قازاقستان» باعدار­لاماسى اياسىندا جاڭا دارىگەرلىك امبۋ­لاتوريا بوي كوتەرىپتى. بۇعان دەيىن حالىققا قىزمەت ەتكەن مەدپۋنكت 2003 جىلدان بەرى ەسكى بالاباقشا عيمارا­تىندا ورنالاسقان. ون جىلدان استام شاعىن عيماراتتا ورنالاسقان دارىگەرلىك امبۋلاتوريادا بۇگىندە ءبىر دارىگەر 9 مەدبيكە قىزمەت اتقارۋدا ەكەن. سونىمەن قاتار 5 ورىندى كۇندىزگى ەمدەۋ ستا­تسيونارى مەن ءدارىحانا دا جۇمىس جاساپ كەلەدى. پرەسس-تۋر بارىسىندا مەدپۋنكت­تىڭ كۇندىزگى ەمدەۋ ستاتسيونارىندا اۋىل تۇرعىندارى كۇندەلىكتى ەم قابىلداپ جاتقانىن بايقادىق. اۋىل اقساقالدارى اق حالاتتى ابزال جاندارعا ءدان ريزا ەكەندىكتەرىن ايتىپ، جاڭا ەمحانا سالىپ بەرگەن وبلىس باسشىلىعىنا العىستارىن جەتكىزدى.

دارىگەرلىك امبۋلاتوريانىڭ دارىگەرى زۋلفيا مۋحانبەتوۆانىڭ ايتۋىنشا، اۋىلدا سوڭعى ون جىل ىشىندە انا ءولىمى ورىن الماعان. وتكەن جىلى 50 بالا دۇنيەگە كەلسە، اعىمداعى جىلدىڭ 8 ايىندا 37 نارەستە دۇنيە ەسىگىن اشقان ەكەن. دارىگەر اۋىلدىڭ اۋدان بويىنشا تۋ كورسەتكىشى بويىنشا الدىڭعى قاتار­دا ەكەنىن ماقتانا ايتىپ ءوتتى. دارىگەر ز.مۋحانبەتوۆا وتكەن جىلدار­مەن سالىس­تىرعاندا اۋىلدا انەميا اۋرۋ­لارى ازايىپ، ەسەسىنە بۇيرەك اۋرۋلارى كۇننەن كۇنگە ارتىپ كەلە جاتقاندىعىن جاسىر­مادى. سونداي-اق وبلىس اكىمى وتكەن جىلى ەلدى مەكەنگە كەلگەن ۋاقىتىندا اۋىلعا جاڭا دارىگەرلىك امبۋلاتوريا سالۋ جوس­پارعا ەنگىزىلەتىنىن ايتىپ، بيىل قۇرىلىس جۇمىستارى باستالىپ، از ۋاقىت ىشىندە جاڭا عيماراتتا حالىققا قىزمەت كورسە­تەتىنىنە قۋانىشتى ەكەنىن ايتىپ ءوتتى.

اۋىلداعى جاڭا دارىگەرلىك امبۋلا­توريا عيماراتىنا توقتالساق. وبلىستىق قۇرىلىس باسقارماسىنىڭ تاپسىرىسى بويىنشا مەدپۋنكت قۇرىلىسىن باس مەردىگەر «اتامەكەن» جشس جۇرگىزگەن. عيمارات قۇرىلىسىن جوبالاعان «پروم­مەدكونتراكت» جشس. قۇرىلىسقا بولىنگەن قاراجات 83 584 182 تەڭگەنى قۇراپ وتىر. اعىمداعى جىلدىڭ ناۋرىز ايىندا باستالعان قۇرىلىس جۇمىستارى قۇجات بويىنشا شىلدە ايىندا اياقتالۋى ءتيىس بولاتىن. الايدا مەجەلى ۋاقىتىندا اياقتالماعان جۇمىس قازان ايىنا دەيىن پايدالانۋعا بەرىلمەك. الداعى ۋاقىتتا جاڭا عيماراتقا ورنالاساتىن دارىگەرلىك امبۋلاتوريادا 2 دارىگەر، 14 مەدبيكە جۇمىس جاساماق. ەلۋ كەلۋشىگە ارنالعان جاڭا دارىگەرلىك امبۋلاتوريا عيماراتى­نىڭ ءىشى كەڭ، ءارى جاڭا قۇرال-جابدىق­تار­مەن جابدىقتالماق. وندا 10 ادامعا ارنالعان كۇندىزگى ەمدەۋ ستاتسيونارى دا بار ەكەن.

«دارىگەرلىك امبۋلاتوريا جاڭا عيماراتقا كوشكەن ۋاقىتتا، ەسكى عيمارات بالاباقشا بولاتىن شىعار؟» دەگەن باق وكىلدەرىنىڭ ساۋالىنا اۋداندىق اۋرۋحا­نانىڭ باس دارىگەرى ب.نىسانباەۆ «بالا­باقشا بولمايدى، بالكىم كاسىپكەرلىك بولىمىنە بەرىلەتىن بولار» دەپ جاۋاپ بەردى.

 اۋداندا گينەكولوگ مامان جەتىسپەيدى

پرەسس-تۋردىڭ كەلەسى باعىتى قار­ماقشى اۋدانى بولدى. اۋدان ورتالى­عىندا ءۇش قاباتتى 250 كەلۋشىگە ارنالعان ەمحانا قۇرىلىسى ءجۇرىپ جاتىر ەكەن. وتكەن جىلدىڭ ناۋرىز ايىندا باستاعان قۇرىلىس جۇمىستارى اعىمداعى جىلدىڭ قازان ايىنىڭ ورتا شەنىندە اياقتالۋ جوسپارلانعان. قۇرىلىس جۇمىستارىن «قازقۇرىلىس سەرۆيس» جشس جۇرگىزىپ كەلەدى. قۇرىلىسقا 1 ملرد. 480 ملن. تەڭگە قارجى بولىنگەن. كەڭ سىيىمدىلىقتاعى بۇل ەمحانا «100 مەكتەپ، 100 اۋرۋحانا» مەملەكەتتىك باعدارلاماسى اياسىندا جۇرگىزىلىپ كەلەدى ەكەن. قازىرگى تاڭدا اۋداندىق ەمحانا مەديتسينالىق قۇرال-جابدىقتارمەن 86,4 پايىزعا قامتىلعان كورىنەدى. سونداي-اق ەمحانا عيماراتى اۆتونومدى جىلۋ ورتالىعىمەن قامتىلعان.

امبۋلاتوريالىق-ەمحانالىق قىزمەتى بار، قارماقشى اۋداندىق اۋرۋحانانىڭ باس دارىگەرى ب.نىسان­باەۆ:

قارماقشى اۋداندىق دەنساۋلىق ساقتاۋ سالاسى بويىنشا ۇستىمىزدەگى جىلى جوسپارلانعان اۋداندىق ەمحانا كۇنىنە 250 كەلۋشىنى قابىل­دايتىن بولادى. قازىرگى تاڭدا ەمحا­نانىڭ قۇرىلىسى اياقتالۋعا جاقىن. اۋداندىق ورتالىق ەمحانا پايدا­لانۋعا بەرىلگەننەن كەيىن اۋدانداعى دەنساۋلىق سالاسىنىڭ دەڭگەيى جاقسارا تۇسپەك. ويتكەنى جاڭا ەم­حاناعا جاڭا قۇرال-جابدىقتار كەلىپ، ەمحانانىڭ ماتەريالدىق-تەحني­كالىق بازاسى نىعايا تۇسەتىن بولادى. جانە جاڭا قۇرال-جابدىقتاردى پايدالانا وتىرىپ، حالىقتىڭ دەن­ساۋلىعىن جاقسارتۋعا تياناقتى جۇمىس جاسايتىن بولامىز.

سونىمەن قاتار ءىىى ينتەرناتسيونال جانە اقاي ەلدى مەكەندەرىندەگى دارىگەرلىك امبۋلاتوريا قۇرىلىس­تارى اياقتالۋعا جاقىن. الداعى ۋاقىتتا بۇل دەنساۋلىق مەكەمەلەرى ىسكە قوسىلىپ، پايدالانۋعا بەرىلمەك. وتكەن جىلى تورەتام كەنتىندە اۋىل­دىق ەمحانا قۇرىلىسى اياقتالىپ، پايدالانۋعا بەرىلگەن بولاتىن. قازىرگى تاڭدا عيمارات تا، قۇرال-جابدىقتار دا جاڭارىپ، جۇمىس جاساۋعا تولىق جاعداي جاسالدى.

اۋدان ورتالىعىنداعى مامان ماسە­لەسىنە كەلەر بولساق، اۋداندا 88 دارىگەر، 414 ورتا بۋىن مەديتسينا قىزمەتكەرى جۇمىس جاساۋدا. وتكەن جىلى اۋدانداعى دەنساۋلىق ۇيىمدارىنا 4 جاس مامان جۇمىسقا ورنالاسقان. بيىل دا 3 دارى­گەردىڭ، ءبىرى اقجار، ءبىرى اقاي، ەندى ءبىرى اۋداندىق ەمحاناعا جۇمىسقا ورنالاسقان. «ديپلوممەن اۋىلعا» باعدارلاماسى بويىنشا جولدامامەن اۋىلعا كەلگەن جاس ماماندارعا ءبىر رەتتىك كوتەرمە قارجى بەرىلىپ، تومەن پايىزدىق مولشەرلەمەمەن نەسيەگە ءۇي بەرىلگەن.

باس دارىگەر ب.نىسانباەۆتىڭ اي­تۋىنشا، اۋدان بويىنشا جۇرەك قان تامىرلارى اۋرۋشاڭدىعى ءبىرىنشى ورىندا تۇر ەكەن. 2013 جىلى بۇل اۋرۋشاڭدىقتان كورسەتكىش 47,9 پايىزدى كورسەتسە، ۇستىمىزدەگى جىلى 51,8 پايىزعا وسكەن. ودان كەيىنگى كەزەكتە تراۆماتولوگيالىق اۋرۋلارى جانە ونكولوگيالىق اۋرۋشاڭ­دىعى ەكەن. اۋدان تۇرعىندارى اراسىندا تۋبەركۋلەز اۋرۋى وتكەن جىلمەن سالىستىرعاندا ءبىرشاما تومەندەگەن. ماسەلەن وتكەن جىلى كورسەتكىش 60,8 پايىزدى كورسەتسە، بيىلعى جىلى 39,3 پايىزدى كورسەتكەن. الايدا ايماقتا ونكولوگيالىق اۋرۋشاڭدىعىنىڭ ءوسۋى قارقىندانعان. بۇل اۋرۋ تۇرىنەن كورسەتكىش بىلتىر 92,5 پايىز بولسا، بيىل 106,3 پايىزدى قۇراپ وتىر ەكەن. سوڭعى ۋاقىتتا بەلەڭ الىپ كەلەتىن اۋرۋ تۇرلەرىنىڭ الدىن الۋدا تىڭعىلىقتى جۇمىستار اتقارى­لۋدا. ماسەلەن اۋدان تۇرعىندارى ارا­سىندا سكرينينگتىك تەكسەرۋ جۇمىستارى 75-80 پايىز ارالىعىندا ورىندالىپ، ناۋقاستاردى ەرتە ساتىسىندا انىقتاۋ، ەمدەۋ شارالارى قولعا الىنعان.

اۋداندىق ورتالىق ەمحانا قۇرىلىسى اياقتالعانشا، ەمحانا اۋداندىق اۋرۋحانا عيماراتىنا جايعاسقان. اۋرۋحانانىڭ ءبىرىنشى قاباتىندا جۇمىس جاساپ كەلەتىن ەمحانانىڭ جۇمىسى تىڭعىلىقتى دەپ ايتۋعا بولادى. سەبەبى اۋداندا سوڭعى 3 جىلدا انا ءولىمى تىركەلمەگەن، ال بالا ءولىم-ءجىتىمى 7,9 پايىزدى قۇراپ وتىر ەكەن. بۇگىندە ەمحانا جانىندا انا مەن بالا، سالاۋاتتى ءومىر سالتى، قانت ديابەتى كابينەتتەرى جۇمىس جاساپ كەلەدى.

اۋداندىق ەمحانانىڭ قۇرىلىس الاڭىندا بولعان باق وكىلدەرى مۇنان سوڭ اۋداندىق اۋرۋحانانىڭ بۋ قازاندىعىنا باس سۇقتى. بۇرىن داۋ بولىپ كەلگەن بۇل بۋ قازاندىعى بيىل كۇردەلى جوندەۋدەن وتكىزىلىپ، جاڭا پەشتەر ورناتىلعان ەكەن. الداعى قىس ماۋسىمىنا اۋرۋحانا بۋ قازاندىعى ساقاداي ساي كورىنەدى.

قارماقشى اۋدانىنداعى ورتالىق اۋرۋحانا 1986 جىلى پايدالانۋعا بەرىل­گەن. اعىمداعى جىلدىڭ شىلدە ايىنان باستاپ اۋرۋحانانى كۇردەلى جوندەۋدەن وتكىزۋ جۇمىستارى قولعا الىنعان. كۇردەلى جوندەۋ جۇمىستارىنا 166 ملن. تەڭگە قاراجات بولىنگەن. سونىمەن قاتار اۋرۋ­حانانىڭ كارىز جۇيەلەرىنە كۇردەلى جوندەۋ جۇمىستارىن جۇرگىزۋ ماقساتىندا قاجەتتى قۇجاتتامالار دايىندالىپ قويىلعان ەكەن. الداعى ۋاقىتتا كارىز جۇيەلەرى تولىق جاڭارتىلماق. وعان قوسا، اۋرۋحانا اينالاسىن اباتتاندىرۋ جۇمىستارى دا قولعا الىنعان. پايدالانۋعا بەرىلگەن ۋاقىتتان باستاپ، كۇردەلى جوندەۋ جۇمىس­تارى جۇرگىزىلمەگەن اۋرۋحانا بۇگىنگى كۇنى قايتا جاڭعىرتىلىپ جاتقا­نىنا اۋرۋحانا قىزمەتكەرلەرى مەن ناۋقاستار دا ريزا.

اۋداندىق اۋرۋحانا، تەراپيا ءبولىمىنىڭ مەڭگەرۋشىسى، س.كەنجە­باەۆا:

بارلىعىنىڭ توزىعى جەتىپ، اۋرۋ­حانا عيماراتىنىڭ كەلبەتى تومەنگى دەڭگەيدە بولاتىن. سوندىقتان بيىل كۇردەلى جوندەۋ جۇمىستارى باستالىپ كەتتى. وسىعان وراي اۋرۋ­حانا قىزمەتكەرلەرى وتە قۋانىشتى، ەم الۋشى اۋىل تۇرعىندارى ريزا­شىلىعىن بىلدىرۋدە. جاڭا عيماراتقا كوشكەندەي اسەر الۋدامىز. اۋرۋ­حانا عيماراتىنىڭ جوندەۋ جۇمىس­تارى ويداعىداي جۇرگىزىلۋدە.

اۋدان تۇرعىندارىنىڭ اراسىندا اۋرۋشاڭدىق دەڭگەيى ازايدى دەپ ايتا المايمىن. سەبەبى ءبىزدىڭ اي­ماقتىڭ ەكولوگياسىنا بايلانىستى ناۋقاستار سانى كوبەيمەسە، ازايماي وتىر. تەراپيا بولىمشەسى 35 ورىنعا ارنالعان بولسا، ونىڭ 10-ى كۇندىزگى ەمدەۋ ستاتسيونار ورىندارى. وتكەن جىلى ۋدز جانە رەنتگەن اپپارات­تارى پايدالانۋعا بەرىلگەن بولاتىن. الداعى ۋاقىتتا فيز.كابينەتتىڭ قۇرال-جابدىقتارىن جاڭارتۋ قاجەت. قازىرگى تاڭدا اۋرۋحانا اشىلعان جىلى پايدالانۋعا بەرىلگەن قۇرال-جابدىقتار، ونىڭ بارلىعى ەسكى. اۋرۋحانا تولىق ءدارى-دارمەكپەن قامتاماسىز ەتىلگەن.

اۋرۋحانانىڭ ەسىك، تەرەزەلەرى جاڭالانىپ، بۋ قازاندىعى دا جون­دەلگەننەن كەيىن الداعى قىس ماۋ­سىمىندا اۋرۋحانا ءىشى جىلى بولا­تىنىنا سەنىمدىمىز.

اۋىل تۇرعىنى، ەمدەلۋشى ا.بو­لەك­باەۆا:

اۋرۋحاناعا اۋىر جاعدايدا تۇس­كەن بولاتىنمىن. قازىر جاعدايىم ءبىرشاما جاقساردى. اق حالاتتى ابزال جاندارعا ريزامىن، العىسىم شەكسىز. دارىگەرلەر مەنى اياعىما تىك تۇرعىزدى. ۋاقىتىلى دارىلەرىن ەگۋ­دە. اۋرۋحانانىڭ جاڭارىپ، جوندەۋ جۇمىستارى ءجۇرىپ جاتقانىنا اۋىل تۇرعىندارى وتە ريزا.

بۇگىندە اۋرۋحانادا جەڭىل وتالار، ياعني ىشكى اعزالارعا جانە سىرتقى سىنىقتارعا وتا جاسالىنىپ كەلەدى ەكەن.

 بايقوڭىرلىقتارعا قولجەتىمدى

پرەسس-تۋردىڭ كەلەسى ايالداماسى تورەتام كەنتى بولدى. بۇگىنگى كۇنى كەنتتە 11 مىڭنان استام حالىق قونىستانعان. كەنتتە وتكەن جىلى اۋىسىمىنا 100 كەلۋشىگە ارنالعان ەمحانا پايدالانۋعا بەرىلگەن بولاتىن. قازىرگى زامان تالابىنا ساي سالىنعان بۇل ەمحانادا بۇگىندە 116 ادام قىزمەتپەن قامتىلعان ەكەن. سونىمەن قاتار ەمحانا جاڭا قۇرال-جابدىقتارمەن قامتىلىپ، حالىققا قىزمەت ەتىپ كەلەدى. اتاپ ايتار بولساق، گينەكولوگيا كابينەتىندە «كولپوسكوپ» جانە فليۋروگرافيا كابينەتىندە «رەنتگەنپروم» اپپاراتتارى بار ەكەن.

باق وكىلدەرى ەمحانا جۇمىسىمەن تانىسۋعا كەلگەن ۋاقىتتا مۇندا پروفيلاكتيكالىق تەكسەرۋ جۇمىستار جۇرگىزىلۋدە ەكەن. ەمحانا مەڭگەرۋشىسى ءنابيرا بەكتاسوۆانىڭ ايتۋىنشا، بۇعان دەيىن ەمحانا 1994 جىلى سالىنعان شاعىن عيماراتتا جۇمىس جاساسا، قازىرگى تاڭدا بارلىعى قولجەتىمدى، ماماندار دا جەتكىلىكتى. ەمحانا مەڭگەرۋشىسى باستى ماسەلە دەپ – بايقوڭىر قالاسىنداعى قازاق ازاماتتارىنىڭ ىشىندە مۇمكىندىگى شەكتەۋلى جانداردىڭ تەگىن ءدارى-دارمەككە قول جەتكىزە الماي جۇرگەندىگىن ايتىپ ءوتتى. وسى ماسەلەگە بايلانىستى ەمحانا قىز­مەتكەرلەرى بايقوڭىر قالاسىنىڭ ءبىر­شاما تۇرعىندارىن ەمحاناعا شاقىرىپ، ەسەپكە الىپ، وسى ايماقتان تەگىن ءدارى-دارمەكپەن قامتاماسىز ەتىپ كەلەدى ەكەن. بۇگىنگى كۇنى كەنت ەمحاناسىنا ەسەپكە تۇرۋ قولجەتىمدى كورىنەدى.

تاعى ءبىر ايتا كەتەرلىگى، بايقوڭىر قالاسى تۇرعىندارىنىڭ مەديتسينالىق قىزمەتپەن تولىق قامتاماسىز ەتۋ ماق­ساتىندا رەسەي مەملەكەتى مەن قازاقستان اراسىندا مەملەكەتارالىق كەلىسىم شارت ارقىلى بايقوڭىر قالاسىندا كوپسالالى ەمحاناسى بار اۋرۋحانا جىل سوڭىنا دەيىن ىسكە قوسىلادى دەپ كۇتىلۋدە ەكەن.

پرەسس-تۋر بارىسىندا ەمحانا جانىن­داعى جىلجىمالى «مامموكار-ۋ» ماموگ­رافيالىق اۆتوكولىگىندە سكرينينگتىك تەكسەرۋ جۇمىستارى جۇرگىزىلىپ جاتقانىن بايقادىق. رەنتگەن-لوبارانت ماريا ءابىلوۆانىڭ ايتۋىنشا، 50-60 جاس ارا­لىعىنداعى ايەلدەر اراسىندا تەكسەرۋ جۇمىستارى جۇرگىزىلىپ كەلەدى ەكەن. ماماننىڭ ايتۋىنشا نەگىزى ايەل ادام 35 جاستان كەيىن 2 جىلدا ءبىر رەت ماموگراف دارىگەرگە قارالۋ قاجەت كورىنەدى.

 اقايدا دا جاڭا ەمحانا

بايقوڭىر قالاسىنا ىرگەلەس جاتقان اقاي ەلدى مەكەنىندە 5 مىڭنان استام تۇرعىن تىرشىلىك ەتۋدە. وسى ۋاقىتقا دەيىن اۋىل تۇرعىندارى مەديتسينالىق كومەك الۋ ءۇشىن تورەتام كەنتىنە جول تارتاتىن. الداعى ۋاقىتتا اقايلىقتاردىڭ ءوز دارىگەرلىك امبۋلاتورياسى پايدالانۋعا بەرىلمەك. دالىرەك ايتساق، اقاي اۋىلىندا 30 كەلۋشىگە ارنالعان مەدپۋنكت قۇرىلىسى بوي كوتەرىپ، عيمارات الاڭى قورشالۋدا. دارىگەرلىك امبۋلاتوريا قۇرىلىسىنا 79 ملن. 775 مىڭ تەڭگە قاراجات ءبولىنىپ، قۇرىلىس جۇمىستارىن «ازيا دامۋ» جشس جۇرگىزگەن. ساناۋلى كۇندەردەن كەيىن حالىق يگىلىگىنە بەرىلەتىن دارىگەرلىك امبۋلاتوريانىڭ جالپى تاجىريبيەلىك دارىگەرى قىزمەتىنە ورنالاساتىن جاس مامان سالتانات مەرگەنباەۆا اۋىل تۇرعىنى ەكەن. اقتوبە مەديتسينا اكادە­مياسىن تامامداعان جاس مامان «ديپ­لوممەن اۋىلعا» باعدارلاماسى بويىنشا جۇمىسقا ورنالاسقانىنا ريزا ەكەنىن جەتكىزدى.

بۇگىندە قۇرىلىس الاڭىنا اي­نالعان قارماقشى اۋدا­نىنداعى دەنساۋلىق سالاسى بويىنشا اتقارىلىپ جاتقان جۇمىستار قارقىندى دەپ ايتۋعا بولادى. جاڭا عيما­راتتا سوڭعى ۇلگىدەگى وزىق تەح­نولوگيالارمەن جۇمىس جا­سايتىن قارماقشىلىق دارى­گەرلەر الداعى ۋاقىتتا قار­ماق­شىلىقتاردىڭ دەنساۋ­لىعىن ساقتاۋدا ايانباي ەڭبەك ەتەدى دەگەن سەنىمدەمىز.

د.ماحانوۆا،

قىزىلوردا وبلىسى.

اباي.kz