بۇدان بۇرىن حابارلاعانىمىزداي الدىمەن  رەسمي اقپارات كوزدەرىن شولىپ وتەيىك:

قازاقستان پرەزيدەنتى نۇرسۇلتان نازارباەۆ رەسەيدى  15 كم تەرەڭدىكتەگى ۇڭعىمانى بۇرعىلاۋ بويىنشا «ەۋرازيا» جوباسىنا قاتىسۋعا شاقىردى. 

رف پرەزيدەنتى ۆلاديمير پۋتين اتىراۋدا وتكەن وڭىرارالىق ىنتىماقتاستىقتىڭ ءحى فورۋمى بارىسىندا قازاقستان مەن رەسەيدىڭ شەكارالاس ىنتىماقتاستىعىن جوعارى باعالادى.

فورۋم بارىسىندا قازاقستان مەن رەسەي ماماندارى بىرىگىپ اتوم ەلەكتر ستانساسىن سالاتىندىعى تۋرالى ءسوز شىققان بولاتىن. الايدا قازاقستاندا اەس سالىناتىن ورىن ازىرگە انىقتالمادى، دەپ مالىمدەدى قر ەنەرگەتيكا ءمينيسترى ۆلاديمير شكولنيك.

قازاقستان مەن رەسەيدiڭ وڭiرارالىق ىنتىماقتاستىق فورۋمى اياسىندا سولتۇستiك قازاقستان مەن چەليابi وبلىستارى اراسىندا ىنتىماقتاستىق تۋرالى مەموراندۋمعا قول قويىلدى.

قازاقستان مەن رەسەي ورىنبور گاز وڭدەۋ كەشەنى بازاسىندا يننوۆاتسيالىق گاز-حيميا كلاستەرىن قۇرۋ جوسپارلاندى. بۇل تۋرالى  كەشە اتىراۋدا وتكەن قازاقستان-رەسەي ءحى وڭىرارالىق ىنتىماقتاستىق فورۋمىندا  ورىنبور وبلىسىنىڭ گۋبەرناتورى يۋري بەرگ ايتتى.

باشقۇرتستان پرەزيدەنتى ۋفا مەن قازاقستان قالالارى اراسىندا تىكەلەي اۋە رەيسىن اشۋدى ۇسىندى.

وڭىرارالىق ىنتىماقتاستىقتىڭ حII فورۋمى كەلەسى جىلى  ۋفا قالاسىندا وتەتىن بولدى. 

 جوعارىداعى جايتتاردى ەلىمىزدەگى باق بىتكەن جارىسا تاراتىپ جاتىر. ال، ءبىزدىڭ ءتىلشىمىز ارىپتەستەرىمىزدىڭ كوزىنەن تاسا قالعان مىنا ءبىر قىزىقتاردى دا بايان ەتكەندى ءجون كورىپتى.

قىسقاسى،  فورۋم باستالعاننان پۋتين ءوزىنىڭ بەتى-اۋىزىمەن اۋرە بولدى. ەكى پرەزيدەنت ورىندارىنا كەلىپ وتىرعاننان كەيىن، ارتىق سوزدەر ايتىلماستان، كەزدەسۋ باستالدى.

ءبىرىنشى ءبىزدىڭ ەلباسى ءسوز الدى.

الدىمەن وڭ قاباعىن، سوسىن سول قاباعىن قاسىعان رف پرەزيدەنتى جاڭادان سالىنعان سالتانات سارايىنىڭ توبەسىنە كوزىن توڭكەرىپ ۇزاق قارادى. سالدەن كەيىن ۇيالعان بولۋى كەرەك، باسىن قوزعالتپاي، كوزىنىڭ قيىعىمەن عانا قاراۋدى جالعاستىردى. بىرەسە الدىنداعى ميكروفوننىن ۇستاپ، بىرەسە ءوز قولىمەن ويناپ وتىرعان پۋتين ءسوز العاندا ءبىزدىڭ ەلباسىنىڭ دا زالدان الدەكىمدى ىزدەگەندەي قيمىلى بايقالدى.

ەكى پرەزيدەنتتىڭ دە كوڭىل كۇيى كەرەمەت ەمەس سەكىلدى كورىندى. زالدا تەك كۇلىمدەپ وتىرعان شۇكەەۆتى عانا اڭعاردىق. دوساەۆتىڭ تەرەڭ كۇرسىنگەنىن تەلەوپەراتورلار دا بايقاپ قالىپتى.   

ءپۋتيننىڭ ۇيقىسى كەلگەن سياقتى. ەسىنەگىسى كەلىپ، ءوزىن ءوزى ۇستادى، اۋىزىن اشپاي، ىشىنەن ەسىنەگەنى سەزىلدى.  

شكولنيك سويلەگەننەن كەيىن ونىڭ رەسەيلىك ارىپتەسى نوۆاك ءسوز الدى. مانادان جان جاعىنا قاراعىشتاپ، ءبىر-بىرىنە مۇلدە قاتىسى جوق سياقتى بولىپ وتىرعان ەكى پرەزيدەنت نوۆاك بەس مينۋت سويلەگەندە ءبىرىن-ءبىرى جاڭا كورگەندەي ەڭسەرىلە بۇرىلىپ، ەڭكەيىپ وتىرىپ ەكى رەت سويلەستى. ءۇشىنشى رەت باس تۇيىستىرە سويلەسكەندەرىندە كوڭىلدى بىردەڭە ايتىلعان بولۋى كەرەك، جادىراپ كۇلىپ الدى. ەكەۋى دە.

.

ىزمۇحامبەتوۆ، يۋري بەرگتەر سويلەدى.

باشقۇرت پرەزيدەنتى حاميتوۆ سويلەگەندە ەلباسى الدەنەنى قاعازعا ءتۇرتىپ وتىرسا، پۋتين ساۋساقتارىن ايقاستىرىپ، تاعى دا قولدارىمەن ويناپ وتىردى. حاميتوۆ كەلەسى فورۋمدى 2015 جىلى ۋفا قالاسىندا وتكىزۋدى ۇسىندى.

—    مىنا سالتانات سارايىن ورالدىقتار 8 ايدا سالىپ شىقتى، — دەپ كۇلدى ءبىزدىڭ پرەزيدەنت.

—    مى توجە سپراۆيمسيا، — دەدى حاميتوۆ.

ءپۋتيننىڭ سارايدىڭ توبەسىنە سونشالىقتى سۇقتانىپ قاراعانى تۇسىنىكتى بولدى.

وتىرىس اياقتالعانشا بەت-اۋىزىمەن اۋرەلەنۋدى پۋتين توقتاتقان جوق. سوڭعى جاعىندا ءىشى پىسقانداي ستول ءۇستىن ساۋساقتارىمەن ءالسىز عانا ۇرعىلاپ الدى دا، سول قۇلاعىن قاسىپ، ماڭدايىنىڭ تەرىن سۇرتكەندەي، الدە قاسىعانداي قيمىل جاسادى. بايقاتپاي ەرنىن تىستەلەپ، ايتەۋىر وتىرىستى اياقتادى.

(سەگىز ايدا سالىنعان اتىراۋداعى سالتانات سارايى)  

Abai.kz