الەم استاڭ-كەستەڭ!.. دۇنيە استى-ۇستىنە ءتۇستى. «قۇدايلار ەسىنەن جاڭىلدى...» قازاقتىڭ قۇدايى!..

جاڭىلعان ەمەي نەمەنە، ەندى-ەندى ەس جيىپ، ەتەك جاپقان حالىق نە ىستەرىن بىلمەي دەل-سال. ءتىپتى باياعى تاڭىرقاۋ دا جوق!.. اشۋ-ىزا ادىرا قالعان...

سورى قالىڭ سورماڭداي حالىق – تىم تىرىس. جانىڭدى ءتىپتى قورقىنىش بيلەيدى. ەندى قايتسىن؟! تەك، ايتەۋىر، داۋىل الدىنداعى تىنىشتىق بولماسىن!..

25 جىل. شيرەك عاسىر. ءبىر ۇرپاق اۋىسار ۋاقىت...

نە تىندى؟ نە بىتىردىك؟! وزگەرگەن نە بار؟..

ەشتەڭە. بۇرىن قانداي بولساق، قازىر دە تاپ سوندايمىز. قايتا، ءتىپتى، كەرى كەتتىك!..

اۋىل قيرادى. اۋىل شارۋاشىلىعى اياعىنان تۇرا الماي ەتپەتتەپ جاتىر.

دۇنيەجۇزىلىك ساۋدا ۇيىمىنا مۇشە بولدىق دەپ جار سالىپ، جامان تۇماعىمىزدى اسپانعا اتتىق. نە تاپتىق؟ قانداي دايىندىعىمىز بار؟!

ءالى سول ءباز-باياعى قالپى سىرتقا شىعاراتىن ءونىمىمىزدىڭ 80 پايىزدان استامى – شيكىزات. سۋ تەگىن. ال ءبىز بولساق «بولدىق-تولدىق» دەيمىز!.. قانداي پارىقسىزدىق؟!

تاعى نە بار؟!

«سۋدىڭ دا سۇراۋى بار». قولمەن ىستەگەندى موينىڭمەن كوتەرەسىڭ!.. جالپى، بارىنە ۋاقىت – تورەشى. تۇلعا باعاسىن بۇگىنگىلەر ەمەس، بولاشاق بەرەدى!..

ەندى، مىنە – كۇلتوبەنىڭ باسىندا كۇندە جيىن!.. كەزەكتى كورىنىس. سپەكتاكل.

«جەردەن حابار تاپپاعىر» قۇدايبەرگەن اعامىز قانداي ايتقىش ەدى؟! ناعىز ءارتىس!.. (دۇرىسى، ارتىستەر!..)

قۇداي قايىرىن بەرسىن!..

P/S:  «ايتا-ايتا اللادان ۇيات بولدى!..» ايتپاسقا تاعى امال جوق.

«باستان جاق تا اجىرايدى»... قوي ەكەش قوي دا، جان ءتاسىلىم ەتەر الدىندا تۇياعىن سەرپەدى. ال ءبىز شە، ءبىز نە ىستەيمىز؟!

          وڭ جاعىڭ – ور، سول جاعىڭ – قۇز. الدىڭ – وت، ارتىڭ – مۇز. بارار جەر، باسار تاۋىڭ جوق. قايدا بارساڭ دا – «قورقىتتىڭ كورى».

          قارسى شىقساڭ – اتىلاسىڭ. جاتا بەرسەڭ – ساتىلاسىڭ. نە قالدى؟!

          ...مەنىڭشە، ءبىر-اق امال بار!.. اللادان تىلەۋ. ءوتسىن، كەتسىن دەپ!.. ول ءۇشىن ءسىزدى ەشكىم جازالاي المايدى.

          قۇدايدىڭ ءبىر اتى «حالىق» ەكەنى راس بولسا، دۇعا-تىلەگىمىزدى جەرگە تاستاماس! ءاۋمين!..

تۇرماعانبەت كەنجەباەۆ – اقىن، قازاقستان جازۋشىلار جانە  جۋرناليستەر وداعىنىڭ مۇشەسى.

21. 08. 2015 جىل.  استانا.

Abai.kz