جاقىندا تۇركيانىڭ مەملەكەتتىك BOTAŞ كومپانياسى  كاتاردىڭ ۇلتتىق مۇناي كومپانياسىمەن تومەندەتىلگەن تاريفتەر بويىنشا تۇركياعا تابيعي گاز تاسىمالداۋ تۋرالى مەموروندۋمعا قول قويعان. بۇل تۋرالى  arhar.kz سايتى جازادى.

تۇركيالىق dailysabah.com مالىمەتتەرىنە سۇيەنسەك، كاتار رەسپۋبليكاسىنان تۇركياعا جەتكىزىلەتىن تابيعي گازدىڭ كولەمى، باعاسى مەن مەرزىمى تۋرالى ەكى ەل باسشىلارى كەلىسسوزدەر جۇرگىزۋدە (http://www.dailysabah.com/energy/2015/12/02/turkey-qatar-sign-liquefied-natural-gas-agreement).

دەگەنمەن، شەتەلدىك باسىلىمداردىڭ جازۋىنشا، انكارا مەن كاتار اراسىندا وسىعان دەيىن قىسقا مەرزىمدى تابيعي گاز جانە مۇناي ونىمدەرىن يمپورتتاۋ تۋرالى كەلىسىمدەر بولعان.

سونىمەن قاتار، تۇركيا مەن كاتار رەسپۋبليكالارى اراسىندا ازاماتتاردىڭ قاتىنۋى ءۇشىن ۆيزاسىز رەجىم ەنگىزۋ تۋرالى دا كەلىسىم جاسالعان. جالپى العاندا، تۇركيا پرەزيدەنتى رەجەپ تايىپ ەردوعاننىڭ كاتارعا جاساعان رەسمي ساپارى بارىسىندا ەكى ەل اراسىندا ءتۇرلى سالالار بويىنشا 15 قۇجاتقا قول قويىلعان.

ال رەسەيلىك slon.ru سايتىنىڭ مالەمەتتەرىنە سۇيەنسەك، كاتار مەن تۇركيا اراسىنداعى گاز كەلىسىمى – رەسەي مەن تۇركيا اراسىنداعى ەكونوميكالىق سوعىستى ۋشىقتىرۋى ابدەن مۇمكىن (https://slon.ru/storystreams/110).

ەستەرىڭىزدە بولسا، وسىعان دەيىن رەسەي پرەزيدەنتى ۆلاديمير ءپۋتيننىڭ تىكەلەي پارمەنىمەن،  تۇرىك قارۋلى كۇشتەرى اتىپ قۇلاتقان  سۋ-24 ۇشاعىنىڭ ەسەسىنە، تۇركيا رەسپۋبليكاسىنا  قارسى ەكونوميكالىق سانكتسيالار سالۋ تۋرالى شەشىم شىعارىلعان. سونىڭ ىشىندە، تۇركيادان تاسىمالداناتىن ازىق-تۇلىكتەر، جەمىس-جيدەكتەر مەن كوكونىستەردى اكەلۋگە تىيىم سالىنىپ، تۋريزم سالاسىندا دا بىرقاتار شەكتەۋلەر قويىلعان. سونداي-اق، رەسەي ۇكىمەتى انكارا مەن ماسكەۋ اراسىندا قاتىنايتىن چارتەرلىك ۇشاقتاردى توقتاتقان بولاتىن.

ەگەر رەسمي دەرەكتەرگە نازار اۋدارساق، تۇركيا رەسپۋبليكاسى رەسەي گازىن تۇتىنۋدا گەرمانيادان كەيىنگى ەكىنشى ءىرى مەملەكەت بولىپ ەسەپتەلەتىن. مىسالى، رەسەي «گازپرومى» 2014 جىلى تۇركيا رەسپۋبليكاسىنا جالپى كولەمى 27,4 ملرد. كۋب مەتردى قۇرايتىن تابيعي گاز ساۋدالاعان. بۇل رەسەيلىك كومپانيانىڭ جىلدىق يمپورتىنىڭ 67 پايىزىن قۇرايدى.

ال تۇركيا پرەزيدەنتى رەجەپ تايىپ ەردوعان ۇستىمىزدەگى جىلدىڭ قازان ايىندا ماسكەۋدە وتكەن كەزدەسۋلەر بارىسىندا ەگەر قانداي دا ءبىر تۇسىنىسپەۋشىلىكتەر تۋىندايتىن بولسا، تۇركيا وزگە مەملەكەتتەردەن جەڭىلدەتىلگەن تاريفتەر بويىنشا تابيعي گاز تاسىمالداۋعا ءازىر ەكەندىگىن ەسكەرتكەن بولاتىن (https://slon.ru/posts/57666).

قازىرگى تاڭدا الجير رەسپۋبليكاسى تۇركياعا جەڭىلدەتىلگەن تاريفتەگى تابيعي گاز تاسىمالداۋشى نەگىزگى ەل بولىپ تابىلادى.

نۇرگەلدى ابدىعانيۇلى

Abai.kz