كۋلاگين كالاچيلىكتەرگە داۋىس كوتەرمەيتىن بولدى
جاقىندا قازاقستاندىق باق پەن الەۋمەتتىك جەلىدە قىزۋ پىكىر-تالاس تۋدىرعان كالاچي اۋىلىنىڭ تۇرعىندارىمەن بولعان داۋلى وقيعاعا ەستەرىڭىزدە بولار. سول جانجالعا قاتىستى تۇسىنىكتەمە بەرگەن اقمولا وبلىسىنىڭ اتى-شۋلى اكىمى سەرگەي كۋلاگين مىرزا ەندى تۇرعىندارعا مۇلدە داۋىس كوتەرمەۋگە ۋادە بەرگەن. بۇل تۋرالى total.kz سايتى جازادى.
«وتكەن جولعى تۇرعىنداردى قابىلداۋ كەزىندەگى تۇسىنىسپەۋشىلىكتەرگە قاتىستى ايتارىم – بۇل اشىعىن ايتقاندا ارانداتۋشىلىق (پروۆاكاتسيا) بولدى. سوندا دا مەن ورتاشا قالىپتا سويلەگەن ەدىم. ەشكىمنىڭ ار-ۇجدانىنا تيەتىن اۋىر سوزدەر ايتقان جوقپىن. ءيا، ءبىراز داۋىس كوتەرگەنىم راس. اكىمدىك دەگەن ماڭىزدى قىزمەتتى ارقالاپ جۇرگەن سوڭ، مەن ولاي جاساماۋىم كەرەك ەدى. ەندىگارى مۇنداي جاعدايدىڭ بولمايتىنىنا ۋادە بەرەمىن»، – دەيدى اقمولا وبلىسىنىڭ اكىمى.
ەستەرىڭىزدە بولسا، قازان ايىنىڭ اياق شەنىندە اقمولا وبلىسىنىڭ اكىمى سەرگەي كۋلاگين مىرزا وبلىستىق اكىمشىلىكتەگى جۇمىس كابينەتىندە، اراشا سۇراپ، الدىنا كەلگەن كالاچي اۋىلىنىڭ تۇرعىندارىنا داۋىس كوتەرىپ، قورقىتقان سوزدەرى جازىلعان بەينە تاسپا الەۋمەتتىك جەلىگە تارالىپ كەتكەن بولاتىن.
وقيعا بىلايشا وربىگەن. قابىلداۋعا كەلگەن تۇرعىنداردىڭ ءبىرى اكىمنىڭ ادەپتەن اسىپ سويلەيتىنىن ءاۋ باستا بىلسە كەرەك، كۋلاگيننىڭ قىزمەتتىك ەتيكاعا جات سوزدەرمەن داۋىس كوتەرىپ جاتقانىن تاسپاعا جازىپ الىپ، قازاقستاندىق باق-تارعا جاريالاعان.
كەيىن، بەينە تاسپادان كورگەنىمىزدەي، سەرگەي كۋلاگين كالاچي اۋىلىنىڭ تۇرعىندارىنا دۇرسە قويا بەرگەن.
«سەندەر وتىرىك اقىماق بولا بەرمەڭدەر. سەندەر شارشاتتىڭدار مەنى. مەن قورقىتىپ وتىرعان جوقپىن، بىراق ءبىلىپ جۇرىڭدەر. سەندەردىڭ شارۋالارىڭدى تىكەلەي ءوزىم قاداعالايمىن. ەگەر وعان كونبەسەڭدەر، ورىندارىڭا قويامىن. ۇعىپ الىڭدار، مەن اكىم رەتىندە ايتىپ وتىرمىن. سوسىن مەنى ەستەرىڭنەن شىعارا المايتىن بولاسىڭدار»، – دەگەن كۋلاگين مىرزا.
ول كەزدە اڭگىمەنىڭ اۋانى كالاچي اۋىلىنىڭ تۇرعىندارىن كوشىرۋ ماسەلەلەرى توڭىرەگىندە وربىگەن.
راس ءوز قاراماعىنا تيەسىلى اۋىلدىڭ تۇرعىندارى اكىمىنە شاعىم ايتىپ كەلدى. كۋلاگين مىرزا كوپ سوزباستان، ماسەلەمىزدى شەشىپ بەرەدى دەگەن ەسەك دامە، الدامشى ءۇمىت بەيداۋا دەرتكە شالدىققان اۋىل تۇرعىندارىنىڭ كوكىرەگىندە سارناپ تۇرعان ەدى. اتتەڭ. ونى تۇسىنەر اكىم قايدا، حالىقتى ويلايتىن باسشى قايدا، بۇگىندە؟... كۋلاگين مىرزانى كالاچيلىكتەر شارشاتقان ەكەن. ءوزى ايتتى. حالقىن ۇركىتتى، قورقىتتى، قولىنان كەلگەنىن ىستەيتىنىندە بۇگىپ قالمادى.
سەرگەي مىرزا، ءوزى شوت مىنەزدى كىشى ساياساتكەر ەدى. وسىعان دەيىن اقمولا وبلىسىندا تەمىردەي ءتارتىپ ورناتامىن دەپ، وزىنە دەيىنگى كىشى شەنەۋنىكتەردىڭ جىم-جىلىستارىن اشىپ سالعان ەدى عوي. سول كەزدە «قازىر ءبىزدىڭ باستى ماقساتىمىز — تۇرعانداردى كوشىرۋ ءۇشىن قاراجات كوزىن تابۋ. قالاي اقشا بولىنەدى، 2015-2016 جىلدار ارالاعىندا بارلىق تۇرعىنداردى بىردەن كوشىرۋگە كىرىسەتىن بولامىز»، – دەپ ۋادە بەرگەن. سول ۋادەسىن ورىنداۋ ماقساتىندا ايتقانىن تىڭداتا الماعان اكىمنىڭ سوزىنە سەنسەك، كوشۋدەن باس تارتقان تۇرعىندارعا داۋىس كوتەرىپتى-ءمىس.
وسىلايشا اقمولا وبلىسىن تەمىردەي تارتىپپەن ۇستايمىن دەپ شەشكەن سەرگەي كۋلاگين مىرزا، ەندى تۇرعاندارعا داۋىس كوتەرمەۋگە ۋادە بەردى.
بۇدان بىلاي كۋلاگين مىرزادان قاتاڭ سۇرانىس بولماق. كۋلاگيننىڭ ۋادەگە قانشالىقتى بەرىكتىگىن الداعى ۋاقىتتاردا كورەتىن بولامىز. تەك، كەيدە قىزمەتكە ىنتا-شىنتاسىمەن بەرىلىپ، كارەرا جولىندا حالىقتى دا، باسقاسىن دا باسقا ۇرمايتىن كەي اكىمدەر، وزدەرىنىڭ حالىقتان بيىك ەمەس ەكەندىكتەرىن ۇمىتپاسا يگى.
نۇرگەلدى ابدىعانيۇلى
