قازاقستاننىڭ بۇرىنعى پرەمەر-ءمينيسترى سەرىك احمەتوۆ پەن قاراعاندى وبلىسىنىڭ بۇرىنعى شەنەۋنىكتەرىنىڭ ۇستىنەن ءجۇرىپ جاتقان سوتتا ايىپتاۋ تارابىنىڭ قاراعاندىداعى سۋ قۇبىرلارى-تازارتۋ جۇيەلەرىنىڭ قۇرىلىسىنا قاتىستى جاڭا ايىپتاۋلارى قارالا باستادى. وسى جايت بويىنشا ايىپتالىپ وتىرعانداردىڭ ءبىرى، «قازاقستاندىق ونەركاسىپ كورپوراتسياسى» كومپانياسى باس ديرەكتورىنىڭ ورىنباسارى ءالجان اقمولداەۆ سوتتا  سەرىك احمەتوۆتىڭ وزىنە قۇرال-جابدىق پەن تەحنولوگيالاردى قولدانۋ بويىنشا كىمدەرمەن كەلىسىمشارت جاساۋ كەرەكتىگىن ايتىپ وتىرعانىن مالىمدەدى. اقمولداەۆتىڭ تۇسىندىرۋىنشە، ونىڭ كومپانياسى احمەتوۆتىڭ ماقۇلداۋىمەن بۇرىنعى جوعارى لاۋازىمدى شەنەۋنىكتىڭ  ۇلى دانيار احمەتوۆپەن جۇمىس ىستەگەن، ول ءوز كەزەگىندە كاسىپكەردەن «اراب كومپانياسىنىڭ» ەسەپشوتىنا  4 ملن دوللار اۋدارۋدى سۇراعان-مىس. اقمولداەۆ بۇل كومپانيالاردىڭ ارتىندا قازىر سوتتالىپ جاتقان پرەمەر-ءمينيستردىڭ ادامدارى تۇر دەپ سانايدى.

اقمولداەۆ سوتتا «اراب كومپانياسىنىڭ» شوتىنا اقشا اۋدارۋ ءۇشىن قارىز الۋعا ءماجبۇر بولعانىن جانە ونى ءالى كۇنگە دەيىن قايتارماعانىن مالىمدەدى. اقمولداەۆتىڭ ايتۋىنشا، «اراب كومپانياسىنا» 2 ملن دوللار اۋدارعان جانە اقشانىڭ كوپ بولىگى احمەتوۆكە ارنالعان كورىنەدى. قاماۋدا وتىرعان ءالجان اقمولداەۆتىڭ وزىنە ميلليارد تەڭگە جىمقىردى دەگەن ايىپ تاعىلعان، ول مۇنى مويىندامايدى.

سەرىك احمەتوۆ ءالجان اقمولداەۆتى تانىمايتىنىن جانە ونىمەن كەزدەسپەگەنىن ايتىپ، وزىنە تاعىلعان ايىپتاردى جوققا شىعاردى. احمەتوۆتىڭ ادۆوكاتتارى ءالجان اقمولداەۆتىڭ كۋالىگىندە قايشىلىقتار بار دەپ وتىر.

بۇل داۋلى ءىس قاراعاندى سوتىندا ۇستىمىزدەگى جىلدىڭ تامىزىنان بەرى قارالۋدا. ىستەگى باستى ادام— قاراعاندى وبلىسىنىڭ بۇرىنعى اكىمى، بۇرىنعى پرەمەر-مينيستر جانە ەكس-قورعانىس ء مينيسترى، سەرىك احمەتوۆ سونىمەن بىرگە پاراقورلىق بويىنشا ايىپتالۋدا. ول 2014 جىلدىڭ قاراشاسىنان بەرى  قاراعاندىدا ءۇي قاماۋىندا وتىر.

اباي-اقپارات