گەنادي گولوۆكينگە ارناۋ
سەنىڭ تۇلا بويىڭداعى ورشىگەن ورلىكتى،
ەرلىكتى
مەن عانا تۇسىنەم:
ەكەۋمىز مايقۇدىقتان شىققانبىز،--
گۋلاگ-تىڭ ىشىنەن،
كارلاگ-تىڭ ىشىنەن!
تۇسىنەم...
بىزدەگى ىزا-كەك مۇندا ەمەس،--ارجاقتا;
ورىستار وكسىگەن،
كارىستەر وكسىگەن،
قازاقتار وكسىگەن كارلاگ-تا!
حومو ساپينەستەن—
سوۆەتو ساپيەنسكە دەيىن شولىپ ەم،
ادامزات جۇرمەدى اللانىڭ جولىمەن.
شەرىڭدى سەن سىرتقا جۇدىرىقپەن شىعارساڭ،
ولەڭمەن شىعاردىم ونى مەن!
شارشاپ تا، شالدىعىپ،
تاياق جەپ،
مىڭ ارىپ،
بىلەكتى سىبانىپ،
جۇرەكتى ۇلى ۇلتتىق رۋحقا سۋعارىپ;
سويعانمىن مەن-داعى زۇلىم مەن اياردى--
رينگكە شىعارىپ!
سەندەگى ورشىگەن ورلىكتى،
ەرلىكتى
مەن عانا تۇسىنەم:
ەكەۋمىز مايقۇدىقتان شىققانبىز،
گۋلاگ-تىڭ ىشىنەن،
كارلاگ-تىڭ ىشىنەن!
تۇسىنەم...
سەرىك اقسۇڭقار
Facebook-تەگى پاراقشاسىنان
