شۇعىل وتكىزىلگەن قاۋىپسىزدىك كەڭەسىنىڭ شەشىمىن پحەنياننىڭ وداقتاسى قىتاي جانە تاعى 14 مۇشە مەملەكەت قولدادى. مۇنىڭ الدىندا عانا سولتۇستىك كورەيا الىس قاشىقتىققا جەتەتىن زىمىران ۇشىرعان بولاتىن. ەلدىڭ مەملەكەتتىك تەلەارناسى سولتۇستىك كورەيا باسشىسى كيم چەن ىننىڭ بۇيرىعىمەن «وربيتاعا جەر سەرىگىن شىعارۋ» ماقساتىندا جاسالعان زىمىران ۇشىرۋ «تولىعىمەن ءساتتى» جۇزەگە اسقانىن حابارلاعان.

اقش، جاپونيا جانە وڭتۇستىك كورەيانىڭ وتىنىشىمەن جينالعان قاۋىپسىزدىك كەڭەسىنىڭ جيىنى جابىق ەسىك جاعدايىندا ءوتتى. اقش-تىڭ بۇۇ جانىنداعى وكىلى سامانتا پاۋەردىڭ ايتۋىنشا، قوسىمشا سانكتسيالاردى قاراستىراتىن جاڭا قارار تەزىرەك ماقۇلدانۋى ءتيىس جانە ول پحەنيان كۇتپەگەن «بۇرىن-سوڭدى بولماعان » شارالاردان تۇرۋى كەرەك. قىتايدىڭ وكىلى لي حۋەي قاراردىڭ ماقساتى «ەگەسۋدى ازايتۋ جانە تۇيتكىلدى كەلىسسوزدەرمەن شەشۋ جولدارىن ىزدەستىرۋ» بولۋى كەرەكتىگىن مالىمدەدى.

سولتۇستىك كورەيالىق تەلەارنالار كۆانمەنسون-4 جەر سەرىگى قازىرگى تاڭدا ءار 94 مينۋت سايىن جەردى تولىق اينالىپ ۇشىپ جۇرگەنىن حابارلاۋدا. بىراق ساراپشىلار بۇل شارانى بۇۇ قارارلارىمەن تىيىم سالىنعان يادرولىق وقتۇمسىقتاردى الىپ ۇشا الاتىن باللليستيكالىق زىمىراندار سىناعىن بۇركەمەلەۋ دەپ سانايدى. بيىلعى قاڭتاردا پحەنيان سۋتەگى بومباسىن سىناقتان وتكىزگەنى تۋرالى مالىمدەگەن ەدى.