بۇرىمدى قىز
مەن اسكەرگە كەتەردە بۇرىمدى قىزدىڭ جىلاپ قالعانى دا راس. ايلى تۇندە كۇتەمىن دەگەنىنە "كازگۋگورودوكتىڭ" قايىڭدارى كۋا. اسكەردە جۇرگەندە دە ساعىنىشقا تولى حاتتار توقتاعان ەمەس. تابىل بىزدەن التى ايدان سوڭ ارمياعا الىندى. سول التى اي بويى بۇرىمدى قىزدىڭ ء"تارتىبىن" قاراپ ءجۇردى. كەرزى ەتىك كيىپ قياندا جۇرگەن دوسىنىڭ ماحابباتىن قورعاعانى دەپ ءتۇسىنىڭىز مۇنى. مىنا ءبىر ولەڭ سول شاقتا تۋعان بولۋى كەرەك.
"...تاكسي...جاتاق...سونان سوڭ كەڭ قۇشاعىڭ،
جانارىمدى شالمايدى ەندى ساعىم،
ءبىر ءوزىڭدى كەۋدەمە قىسىپ تۇرىپ،
ماحاباتتىڭ جاعارمىن ماڭگى شامىن.
باۋىرىندا بالقيىن بال دەنەنىڭ،
وتتاي جايناپ، قۇلپىرىپ الما رەڭىڭ.
قۇسا -مۇڭعا بەرىلمەي ەسىل جۇرەك،
قۇشاعىمدا تۇرارسىڭ سوندا مەنىڭ.
گۇلدەي جايناپ، كۇلىمدەپ قاس قاباعىڭ،
قۋانۋدىڭ تاپپاسسىڭ باسقا امالىن،
قويىنىنا باتىرىپ الا كەتەر،
بارقىت ءتۇنى بىزدەردى استانانىڭ.
اينالماسىن سەزىمىڭ مۇز كەسەككە،
سوندا ءوزىڭدى باقىتتى قىزعا ەسەپتە،
ابايلاماي بەتىڭدى جىرىپ الما،
كەۋدەمدەگى تىزىلگەن "زناچوككە"!
ءاي، تاكەم-اي! ولەڭنىڭ استىنا "ارمان سقابىلۇلى نۇرقاليەۆ. ارحانگەلسك" دەپ قول قويىپتى. ال، بۇرىمدى قىزدىڭ ودان ارگى تاعدىرى بولەك اڭگىمە.
ارمان سقابىلۇلى
Facebook-تەگى پاراقشاسىنان
