"قازىرگى كەزدەگى كوميسسيانىڭ جۇمىس ىستەۋ تارتىبىنە كوڭىلىم تولمايدى. ونداعى جەتى-سەگىز ادامنان باسقا كوميسسيا مۇشەلەرىنىڭ پىكىرلەرى ءبىر-بىرىنەن اينىمايدى. پرەمەردىڭ ورىنباسارىنا ەسەپ بەرگەندەي وزدەرىنىڭ جۇمىستارى جايلى ايتا بەرەدى. كوميسسيا قۇرامىنىڭ جاساقتالۋى، ونىڭ رەگلامەنت پروتسەدۋراسى، داۋىس بەرۋ ءراسىمى، داۋىس بەرۋ ارقىلى كوپشىلىكپەن داۋىس قابىلداناتىنداي جاعدايى كوڭىلدەن شىقپايدى" دەدى زاۋرەش باتتالوۆا ازاتتىق تىلشىسىنە.

ونىڭ پىكىرىنشە، كوميسسياعا بەلسەندىلەر، ءار ايماقتان ادامداردى كىرگىزۋ كەرەك، ال شەشىم داۋىس بەرۋ ارقىلى ەمەس، كونسەنسۋسقا كەلۋ ارقىلى قابىلدانۋى ءتيىس. زاۋرەش باتتالوۆا قانداي دا ءبىر وزگەرىس بولماسا، كوميسسيانىڭ كەلىسى وتىرىسىنا قاتىسپايتىنىن ايتادى.

قازاقستاندا جەر ماسەلەسى ۋشىعىپ كەتكەن سوڭ ۇكىمەت جانىنان جەر كوميسسياسى قۇرىلعان. ونىڭ العاشقى وتىرىسى 14 مامىر كۇنى استانادا وتكەن. پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ توراعالىق ەتەتىن بۇل كوميسسياعا پارلامەنت دەپۋتاتتارى، ۇكىمەت مۇشەلەرى، ساياسي پارتيالار مەن اگروبيزنەس، سالالىق قاۋىمداستىقتار وكىلدەرى، عالىمدار مەن قوعام بەلسەندىلەرى كىرگەن.

ايسۇلۋ تۇرسىنباەۆا

Abai.kz