جامالا! جامالا-ارۋ! جامالا-جان!
بيىلعى «ەۋروبايقاۋ» ءان كونكۋرسىنىڭ باس جۇلدەسىن تەگى قىرىم تاتارى، ۋكراينا ءانشىسى جامالا جەڭىپ الدى. جامالا - سۋساننا اليموۆنا جامالادينوۆا 1983 جىلى قىرعىز ەلىنىڭ استاناسى بىشكەكتە دۇنيەگە كەلگەن. 1989 جىلى قىرىمعا كوشىپ بارىپ، بالالىق شاعى سوندا وتكەن. جامالانىڭ اكەسى – حور ديريجەرى، اناسى – پيانينوشى. ءوزى دە بالا كەزىنەن ءان ايتادى.
«ەۋروبايقاۋدا» جامالانىڭ جەڭىپ شىققانىن رەسەي ءباسپاسوزى تاعى دا سول ۇيرەنشىكتى اۋەنىنە باسىپ، "باتىس ەلدەرىنىڭ رەسەيگە كورسەتكەن قىرى، جامالانىڭ ايتقانى ءانى دە رەسەيدى كىنالاپ تۇر" دەپ، جازىپ جاتىر. بارشا جۇرت بىلەتىندەي، ۋكراينا بيلىگى اۋىسىپ، ەلدە «مايدان» بولىپ، ونىڭ سوڭى رەسەيمەن قاقتىعىسقا اپارىپ سوققان. سول تۇستا رەسەي بيلىگى ۋكراينا قۇرامىنداعى قىرىم اۆتونومياسىن اننەكسيالاپ العان بولاتىن. سودان بەرى ەكى ەل اراسىنداعى اقپاراتتىق سوعىس ءالى جالعاسىپ جاتىر. بۇل سوعىس جامالانىڭ ونەرىن دە اينالىپ وتپەدى.
الايدا ءان ونەرى ساياساتتىڭ اۋىرە سارساڭىنان قاشاندا بيىكتە تۇرادى. سوندىقتان ءبىز ءتۇبى ءبىر تۇركى حالقىنىڭ بۇگىنگى ۇرپاعى - ءانشى جامالانىڭ «ەۋروبايقاۋ» فينالىندا ايتقان ءانىن نازارلارىڭىزعا ۇسىنىپ وتىرمىز.
جامالانىڭ ءانى
جامالا!
جامالا-ارۋ!
جامالا-جان!
ۇنىڭنەن اينالايىن "اعا!"-لاعان;
مەن تۇرمىن تىلەۋىڭدى تىلەپ سەنىڭ،--
اللا-تاعالادان!
قىرىمنىڭ اي-ارۋى جامالا قىز،
باھادۇر--اكەڭ سەنىڭ، اناڭ--اڭىز.
اللا-- القاپ، ارۋاق-- جەبەپ اسقاق تۇرسىڭ،
زاقھارىن شاشسا-داعى زاماناڭىز.
سەن باردا قىرىمدا كۇن اشىق بولعان،
ارنادان قارا تەڭىز اسىپ-تولعان;
تاتاردىڭ ارۋىنا ، مەن تۇگىلى،
ماعجان كوكەم-داعى عاشىق بولعان!
الدىڭنان جاھان شىعىپ جايقالىپ اپ،
قۇشاعىن اشىپ تۇر عوي ايقارىپ-اق;
قىرىقتىڭ قىدىرى بوپ تۇرسىڭ، مىنە،
قىرىمدى انىڭمەنەن قايتارىپ اپ!
شەرلى ەدى بۇل ەكى ەگىز حالىق نەتكەن،
اڭىراپ ازالى انگە سالىپ كەتكەن؟
قوبىزدىڭ* زارلى داۋسى ەستىپەدى،
كوبزاردىڭ* كوزدەن جاسى تامىپ كەتكەن؟
جامالا!
جامالا-ارۋ!
جامالا-جان!
تۇرىككە--جان-جاعىن جاۋ قامالاعان،--
ءبىر جىلى حابار كەلە جاتقان سىندى
اقجولتاي بولىپ اللا-تاعالادان...
سەرىك اقسۇڭقار
16.05. 2016 ج.
نۇرا ماتاي
Abai.kz
