قازاقستاننىڭ ەڭبەك نارىعى قايتا جاندانۋدا. مالىمەتتەرگە سۇيەنسەك، اتالعان سەكتوردىڭ قارقىن الۋىنا سەبەپ بولعان نەگىزگى قوزعالتقىش كۇش استاناداعى قۇرىلىس سەكتورى مەن الماتىنىڭ ساۋدا نارىعى بولىپ تابىلادى. بۇل تۋرالى «ranking.kz» سايتى حابارلايدى.

قازاقستان رەسپۋبليكاسىنىڭ 2015 جىلدىڭ قورىتىندىسى بويىنشا، ەڭبەك نارىعىنىڭ ديناميكاسى تومەندەگىدەي بولعان.

قالالىقتار ىشىندە جالدامالى جۇمىسشىلار نارىعىنداعى كورسەتكىشتەر 2015 جىلى كۇرت ءوسىپ، ەلىمىزدىڭ قالالارىنداعى جالدامالى جۇمىسشىلار سانى 155 مىڭنان اسىپ جىعىلعان. بۇل - 2011 جىلدان بەرگى ەڭ جوعارعى كورسەتكىشكە ەسەپ.

سونىڭ ىشىندە مۇنداي قىزمەتكەرلەر نارىعىنىڭ (جالدامالى جۇمىسشىلاردىڭ) قوزعالتقىش كۇشى استانا مەن الماتى قالالارىندا تىركەلگەن. رەسمي ستاتيستيكاعا سۇيەنسەك، استانا مەن الماتى قالالارىنداعى قىزمەتكەرلەر نارىعىنىڭ  كورسەتكىشى 113 مىڭ ادامعا ارتىپ وتىر. بۇل جالپى ەلىمىزدەگى ەڭبەك نارىعىنىڭ  73%-ىن قۇرايدى.  

ستاتيستيكالىق دەرەكتەرگە ۇڭىلسەك، الماتىداعى ەڭبەك نارىعىنىڭ نەگىزگى ديناميكاسى – ساۋدا سەكتورىنا تيەسىلى بولعان. قالا ەكونوميكاسىنىڭ ءوسۋى مەن جۇمىسپەن قامتىلعان ازاماتتار كورسەتكىشىنىڭ 50 پايىزى اتالعان سەكتوردىڭ ەنشىسىنە تيەسىلى.

ال ەلوردادا جالدامالى جانە تۇراقتى ەڭبەك نارىعىنىڭ ديناميكالىق قوزعالتقىشى – قۇرىلىس سەكتورى بولىپ تابىلادى. بۇل استانا قالاسىنداعى جۇمىسپەن قامتاماسىز ەتۋ باعدارلاماسى بويىنشا، ەڭبەككەرلەر ءوسىمىنىڭ 20 پايىزىن قۇرايدى ەكەن.

ايتا كەتەيىك، استانا قالاسىنداعى قۇرىلىس نىساندارىنىڭ كوبەيىپ، جالدامالى جۇمىسكەرلەر سانىنىڭ وسۋىنە – حالىقارالىق ەكسپو-2017 كورمەسىنىڭ سەبى ءتيىپ جاتقانى جاسىرىن ەمەس. ەكسپو-2017 جوباسىن جۇزەگە اسىرۋ ماقساتىندا ءتۇرلى كورمە كەشەندەرىنىڭ قۇرىلىسى ەلدورداداعى اتالعان سەكتوردىڭ جۇمىسىن ىلگەرىلەتۋگە ۇلەس قوسىپ، 2011 جىلمەن سالىستىرعانداعى  اتالعان سالاداعى ەڭ جوعارعى كورسەتكىش تىركەلىپ وتىر.

قازىرگى تاڭدا ەكسپو-2017 ەلورداداعى جالپى قۇرىلىس سەكتورىنىڭ 30 پايىزدان استامىن جانە 8,8 مىڭنان استام ادامدى جۇمىسپەن قامتاماسىز ەتۋ نىسانىنا اينالىپ وتىر.

سونىمەن قاتار، ەكسپو-2017 قۇرىلىس سەكتورىنان تىس تاعى 8 مىڭنان استام قىزمەتكەردى جۇمىسپەن قامتۋدا. سونىڭ ىشىندە، ءوندىرىس سالاسى، قۇرىلىس ماتەريالدارىن جەتكىزۋ سەكىلدى بىرقاتار الەۋمەتتىك جوبالاردى قوسىمشا جۇرگىزۋدە.

مىسالى، قر مەملەكەتتىك يندۋستريالدى يننوۆاتسيالىق دامۋ باعدارلاماسى اياسىندا 2015-2019 جىلدار بويىنشا، ءبىر عانا 2015 جىلدا ەلىمىزدە جاڭا 4,5 مىڭنان استام جۇمىس ورىندارى اشىلىپ، وندا قازاقستاندىقتار ەڭبەك ەتۋدە.

رەسمي دەرەكتەرگە سۇيەنەتىن بولساق، ەكسپو-2017 كورمەسىنىڭ قۇرىلىسىنا رەسپۋبليكا بويىنشا 254 وتاندىق تاۋار ءوندىرۋشى كاسىپورىن تارتىلىپ، سوماسى 33,703 ميلليارد تەڭگەنىڭ كەلىسىم شارتىنا قول قويىلعان.

سونىڭ ىشىندە، استانا قالاسى بوىنشا (196 كاسىپورىن) – 21,6 ملرد. تەڭگە; سقو (1 كاسىپورىن) – 1,1 ملرد. تەڭگە; قاراعاندى وبلىسى بويىنشا (20 كاسىپورىن) – 8,3 ملرد. تەڭگە; پاۆلودار وبلىسى بويىنشا (4 كاسىپورىن) – 0,7 ملرد. تەڭگە; وقو بويىنشا (2 كاسىپورىن) – 0,02 ملرد. تەڭگە; شقو بويىنشا (1 كاسىپورىن) – 0,1 ملرد. تەڭگە; الماتى قالاسى بويىنشا (12 كاسىپورىن) – 1,3 ملرد. تەڭگە; اقمولا وبلىسى بويىنشا (12 كاسىپورىن) – 0,45 ملرد. تەڭگە; الماتى وبلىسى بويىنشا (3 كاسىپورىن) – 0,2 ملرد. تەڭگە; جامبىل وبلىسى بويىنشا (2 كاسىپورىن) – 0,1 ملرد. تەڭگە. 

Abai.Kz