مەملەكەتتىك قۇرىلىمداعى ءتۋريزمدى دامىتۋعا جاۋاپتى تۇلعالار جەرگىلىكتى تۋريستىك كومپانيالاردىڭ وتىنىشتەرى مەن تالاپتارىنا بەي-جاي قاراعاندىقتان، كوپتەگەن تۇيتكىلدى ماسەلەلەر ءالى ءوز شەشىمىن تاپپاي وتىر.

تاراز وبلىسىنا كەلگەن تۋريست قانداي باعىتپەن ءجۇرۋى ءتيىس؟ ونداعى قىزمەت كورسەتۋ ساپاسى قانداي؟ ءتيىستى ينفراقۇرىلىمدار بار ما؟ بىرنەشە ءتىلدى مەڭگەرگەن كاسىبي گيدتەر قايدا دەگەن سۇراقتار باسى اشىق كۇيىندە قالىپ جاتىر. وسى سۇراقتاردىڭ جاۋابىن ىزدەپ جولعا شىعىپ، كوزبەن كورىپ، قاعازعا تۇسىرگەن ەشكىم جوق. ەگەر جامبىل وبلىسى كاسىپكەرلەر پالاتاسىنىڭ ديرەكتورى قارلىعاش ارالبەكوۆا تۇرالاپ جاتقان ءتۋريزمدى تابانىنان تىك تۇرعىزۋ ءۇشىن سوزدەن ىسكە كوشەتىن كەز جەتكەنىن، وبلىستاعى تۋريستىك نىسانداردى كوزبەن كورىپ، باعىتىن سىزىپ، كارتاسىن جاسايتىن ارنايى جۇمىسشى توبىن قۇرىپ، جولعا شىقپاسا، ءىستىڭ ءبارى بەكەر ەكەندىگى تۋرالى باستاما كوتەرىپ، وبلىس اكىمىنىڭ نازارىن اۋدارماعاندا جابۋلى قازان جابۋلى كۇيىندە قالا بەرەر مە ەدى كىم ءبىلسىن؟!

«ەكى مىڭ جىلدان استام تاريحى بار تارازدا ءتۋريزمنىڭ دامىماي جاتقانى وتە وكىنىشتى. كوزىن تاپقان مەملەكەتتەر وسى سالادان قىرۋار قارجى تاۋىپ وتىر. ونداي مۇمكىندىك بىزدە دە بار. مۇمكىن وسى ۋاقىتقا دەيىن بەلگىلى-بەلگىسىز سەبەپتەرمەن ءوز دەڭگەيىندە نازار اۋدارىلماي كەلگەن بولار. ال بىراق ەندىگى جەردە قولعا الماساق تىم كەش قالامىز. ونىڭ ۇستىنە كەلەر جىلى ەلىمىزدە وتەتىن ەكسپو كورمەسىنە  كەلگەن تۋريستەردى قابىلدايتىن ءۇش وبلىستىڭ ءبىرى رەتىندە جامبىل وبلىسى بەلگىلەنگەن. ياعني، تورتكۇل دۇنيەنىڭ ءتورت بۇرىشىنان كەلگەن تۋريستەر تارازعا تابان تىرەگەندە تاڭدانىسىن جاسىرا الماي تاڭداي قاعاتىنداي جاعداي جاساۋىمىز قاجەت»، – دەيدى جامبىل وبلىسى كاسىپكەرلەر پالاتاسىنىڭ ديرەكتورى ق.ارالبەكوۆا.

قارلىعاش امىرقىزىنىڭ باستاماسىمەن جانە وبلىس اكىمىنىڭ تاپسىرماسىمەن قۇرامىنا كاسىپكەرلەر پالاتاسىنىڭ، مەملەكەتتىك ورگانداردىڭ، تۋريستىك فيرمالاردىڭ، قوناقۇيلەر مەن مەيرامحانالاردىڭ، بۇقارالىق اقپارات قۇرالدارىنىڭ وكىلدەرى جانە تاريحشىلار مەن ارحەولوگتار كىرەتىن ارنايى جۇمىسشى توبى قۇرىلىپ، وبلىس اۋماعىنداعى تۋريستىك نىسانداردى ارالاپ، تۇڭعىش رەت تۋريستەر جۇرەتىن جولدىڭ سىزباسى بەلگىلەنىپ، اتقارىلۋى ءتيىس جۇمىستاردىڭ ءتىزىمىن جاسادى.

سىرتتان كەلگەن تۋريستكە ءزاۋلىم عيماراتتار مەن ويىن ساۋىق ورىندارىنىڭ قۇنى كوك تيىن. ولار ءۇشىن بارعان ەلىنىڭ تاريحى مەن مادەنيەتى قىزىق. ال ونداي نىساندار ءبىزدىڭ وبلىسىمىزدا از ەمەس. ەگەر تسيفرلاردى سويلەتەر بولساق، وبلىس اۋماعىندا 3 365 تاريحي ورىن بار بولسا، ونىڭ 713-ءى جەرگىلىكتى ماڭىزى بار مەملەكەتتىك تىزىمگە، 28-ءى رەسپۋبليكالىق تىزىمگە ەنگىزىلگەن، ال  5 نىسان حالىقارالىق دارەجەدە يۋنەسكو كولەمىندە قورعاۋعا الىنعان. بۇل نىسانداردىڭ قايسىسىن الىپ قاراساڭىزدا تۋريستەر ءۇشىن تارتىمدى، قىزىقتى. ءاربىر تاريحي ورىننىڭ وزىندىك اڭىزى مەن اقيقاتى بار.

كاسىپكەرلەر پالاتاسىنىڭ باستاماسىمەن قۇرىلعان جۇمىسشى توپ جوعارىدا اتالعان نىسانداردىڭ بارلىعىن كوزبەن كورىپ، تۋريست رەتىندە ءجۇرىپ ءوتتى. بارلىعى 695 شاقىرىم جولدى ارتقا تاستاعان جۇمىسشى توپ مۇشەلەرى اتقارىلۋى ءتيىس جۇمىستاردىڭ تىزبەسىن جاسادى. تۋريستىك تۋر ناتيجەسىندە بەلگىلى بولعانىنداي تۋريستەر بارۋى ءتيىس دەلىنگەن نىسانداردىڭ 90 پايىزىنا اپاراتىن جولدىڭ ساپاسى سىن كوتەرمەيدى. ءتىپتى، ورتا عاسىرلىق بالاساعۇن قالاسىنا بارار جولدا جۇمىسشى توپ مۇشەلەرى مىنگەن كولىك باتپاققا باتىپ جۇرە الماعاندىقتان، التى شاقىرىم جەردى جاياۋ جۇرۋگە تۋرا كەلدى. سونىمەن قاتار، تۋريستىك نىساندارعا بارار جولدارعا اقپاراتتىق ستەندتتەر ءىلۋ ماسەلەسى دە نازاردان تىس قالعان.

سودان كەيىنگى تاعى ءبىر كۇردەلى ماسەلە – ورىس-قازاق تىلدەرىندە ەركىن سويلەيتىن گيدتەردىڭ جوقتىعى. ال ەكسپو سىندى حالىقارالىق كورمە بارىسىندا تۋريستەردى قابىلدايتىن بولساق، وندا اعىلشىن ءتىلىن مەڭگەرگەن گيدتەر دە اۋاداي قاجەت. قوناق ۇيلەر مەن جول بويىنداعى قىزمەت كورسەتۋ سالاسىندا اتقارىلاتىن جۇمىستار دا اۋقىمدى.

جۇمىسشى توپ جۇمىسىنىڭ قورىتىندىسىمەن تانىسقان جامبىل وبلىسىنىڭ اكىمى كارىم كوكىرەكباەۆ ريزاشىلىعىن ءبىلدىرىپ، باستالعان ءىستى اياعىنا دەيىن جەتكىزۋگە ۋادە ەتتى.

Abai.kz