25 جاستاعى كاسىپكەر ارمان توسقانباەۆ بريۋسسەلدە ءوتىپ جاتقان «كاسىپكەرلىك قوعامداستىق» جانە «اقىلدى اۋماق» اتتى حالىقارالىق كونفەرەنتسياعا قاتىستى.

ارمان توسقانباەۆ – قازاقستانداعى «وتان پاتريوتى» اتتى ساعات مانۋفاكتۋراسىن اشقان جاس كاسىپكەر. سونىمەن قاتار، ول – «قازاقستان جاس كاسىپكەرلەر قاۋىمداستىعىنىڭ» وكىلى رەتىندە جاستارعا كاسىپكەرلىكتىڭ قىر-سىرىن ۇيرەتەتىن ترەنينگتەر وتكىزىپ، ءوز تاجىريبەسىمەن ءبولىسىپ جۇرگەن جاستاردىڭ ءبىرى.  

ارمان توسقانباەۆ 9 ناۋرىز كۇنى بريۋسسەل قالاسىندا باستالعان «كاسىپكەرلىك قوعامداستىق» جانە «اقىلدى اۋماق» حالىقارالىق كونفەرەنتسياسىنا قاتىسىپ جاتىر. اتالعان شاراعا 40 ەلدەن كەلگەن بيزنەس قاۋىمداستىقتاردىڭ، بيلىك ورگاندارىنىڭ، جاستار بىرلەستىكتەرىنىڭ  وكىلدەرى جينالىپ، جاھاندىق كاسىپكەرلىك ماسەلەلەرىن تالقىلاۋدا. ارمان توسقانباەۆ بۇل كونفەرەنتسياعا قاتىساردىڭ الدىندا ەۆروپا ءبىلىم قورىنىڭ (ETF) ارنايى شاقىرتۋىن العان.

«ماعان كونفەرەنتسياعا قاتىسۋشىلاردىڭ الدىندا ءسوز سويلەۋ مۇمكىندىگى بۇيىردى. قازاقستاندا جيناعان تاجىريبەممەن ءبولىسىپ، وزگە ەلدەردىڭ جاستارىنىڭ وي-پىكىرىن تىڭداپ، ءبىزدىڭ ەلگە قاجەت جايتتاردى ەستە ساقتاپ الۋعا تىرىسىپ جاتىرمىن. مۇندا وزگە ەلدەردىڭ بيزنەس وكىلدەرىمەن ىسكەرلىك بايلانىستار ورناتىپ، جاڭا جوبالار ىسكە قوساتىن بولامىز. يزرايل، ومان سەكىلدى ەلدەردەن ءىس-تاجىريبە بولىسۋگە شاقىرۋ الدىق»، – دەپ جازادى ارمان توسقانباەۆ facebook-پاراقشاسىندا.

قازاقستاندىق جاس كاسىپكەر ەلىمىزدە يننوۆاتسيانى دامىتۋ كەرەكتىگىن دە ەسكەرتەدى. «يزرايل تاجىريبەسىنە قاراساق، يننوۆاتسيالىق ستارتاپتارعا كوپ كوڭىل بولىنەدى. ارينە، ەلدىڭ بولاشاعىنىڭ كىلتى يننوۆاتسيادا ەكەنى ەشكىمگە جاسىرىن ەمەس، بىراق وكىنىشكە وراي ءبىزدىڭ ەلدە بيزنەستى ەڭ الدىمەن ساۋدا مەن قىزمەت كورسەتۋ سەكىلدى نارسەلەرگە اشادى.  ال، يزرايلدە يننوۆاتسيالىق تەحنولوگيالارعا ءجىتى نازار اۋدارىپ، ءبىرىنشى كەزەككە قويادى. جاڭا  يدەيالاردىڭ پايدا بولۋىنا جانە ىسكە اسۋىنا بارلىق جاعداي جاسايدى. تاپتاۋرىن بولعان كاسىپتەرگە ۋاقىت تا، كۇش تە جۇمسامايدى. جەكە باسىم ەندى قالاي قاراي ءجۇرۋ كەرەك ەكەنىن ۇعىپ، دامۋ باعىتىمدى انىقتاپ الدىم»،– دەيدى ارمان توسقانباەۆ. 

ارمان توسقانباەۆتىڭ ويىنشا، ءبىزدىڭ ەل جاستارى مۇنداي شارالارعا ءجيى قاتىسىپ تۇرۋى قاجەت. «جاستارىمىز دامىعان ەلدەردىڭ ازاماتتارىمەن ءبىر ورتادا وي ءبولىسىپ، جاھاندىق ويلاۋ جۇيەسىن جاقسارتادى. شەتەلدەردىڭ تاجىريبەسىن ۇيرەنىپ، ءوز ەلىمىزدە دامىتۋ جاعىن ويلايدى. جاھاندىق كوزقاراسى مەن ۇستانىمى بار ازاماتتار لەگىن قالىپتاستىرادى»، –  دەپ ول الداعى ۋاقىتتا ەندىگى شەتەلدىك تاجىريبەسىن، تۇيگەن-بىلگەندەرىن ءىس جۇزىندە پايدالاناتىنىن جازعان.

Abai.kz