سايلاۋالدى ۇگىت-ناسيحات باستالعان كەزدە «سايلاۋعا باراسىز با؟ نە ءۇشىن داۋىس بەرەسىز؟» دەپ سايت وقىرماندارىنا ساۋال تاستاعان ەدىك. سونىڭ ىشىندە «بارمايمىن، سايلاۋدىڭ ءادىل وتەتىندىگىنە سەنبەيمىن» دەگەندەردىڭ قاراسى وتە كوپ (تومەندەگى سۋرەتتى قاراڭىز).

ارينە، بۇل كەشەندى ساۋالناما بولماسا دا، سايلاۋشىلاردىڭ كوڭىل-كۇيىنەن حابار بەرەدى. ياعني، قوعام ءادىل سايلاۋدان كۇدەر ۇزگەن. بۇل – قاۋىپتى قۇبىلىس. قاۋىپتى بولاتىنى، سىرتقى كۇشتەر سايلاۋدىڭ ادىلدىگى مەن تازالىعىنا دەگەن قوعامنىڭ سەنىمسىزدىگىن پايدالانادى. دەمەك، سايلاۋمەن ويناۋ – ساياسي ويىنداردىڭ ەڭ قاۋىپتىسى. ءتىپتى اياق استىنان قوعام سايلاۋ ادىلدىگىن تالاپ ەتىپ شىقپاسا دا، كوپشىلىكتىڭ ءادىل سايلاۋعا سەنبەۋى بيلىكتىڭ حالىق الدىنداعى بەدەلى مەن ابىرويى كورسەتكىشىنىڭ تىم تومەندىگىنىڭ بەلگىسى. حالىق پەن بيلىكتىڭ جەكە-جەكە وقشاۋلانۋ پروتسەسىن ودان ءارى جەدەلتەدى. بيلىكتەن بولەكتەنگەن قوعام ءوزى سەنەتىن ساياسي كۇشتەردى، تۇلعالاردى شىعارادى. ال، بيلىك قوعامدى وزىنە قاراتا ۇستاۋ ءۇشىن اكىمشىلىك-پوليتسيالىق كۇشىن قولدانادى. ياعني، بيلىك پەن حالىق اراسىنداعى نەگىزگى تىرەك – سەنىم جوق جەردە كەز كەلگەن ارەكەتتەن وت شىعۋ قاۋپى زورايا بەرەدى. ازىرگە ەكى جاقتى جالعاپ تۇرعان نارسە – امالسىزدىق قانا سياقتى. بيلىك ساياسي رەفورمالاردى جۇرگىزۋدىڭ ۋاقىتىن وتكىزىپ الدى. سونىڭ كەسىرىنەن حالىق سەنىمى جوعالدى. كەشەندى ءارى تۇبەگەيلى بولماسا دا ۇشقىنداپ قانا جاسالعان ەكونوميكالىق رەفورمالارعا دەگەن قوعام سەنىمىن بيلىك سۇيەنىش ەتىپ وتىرعان ەدى، ونى مۇناي باعاسى قۇلاتىپ كەتتى. ءسويتىپ، قوعام مەن بيلىك اراسىنداعى سەنىم كوپىرى قۇلادى. ەكى جاعالاۋدى جالعاۋعا وسى جولعى سايلاۋدى پايدالانۋعا بولار ەدى. بىراق، بيلىك باياعى ۇيرەنشىكتى انىنە قايتا باستى. بيلىكتىڭ دە بۇدان باسقا امالى جوق. سەبەبى، بيلىك وزىنە سەنبەيدى. ياعني، ىشكى سەنىمى كۇيرەگەن بيلىك تەرەڭ داعدارىستا. ارينە، جالاۋلاعان، ۇراندى نارسەلەر ايتىلا بەرەدى. ءتۇرلى ساراپشىلاردىڭ اۋزىمەن سايلاۋدىڭ الدا بولاتىن رەفورمالار ءۇشىن جاسالىپ جاتقانىن دا ايتقىزادى. بىراق، ونىڭ بارىنە حالىقتىڭ سەنىمى جوق. كەز كەلگەن بيلىك ءۇشىن ەڭ باستى كاپيتال حالىق سەنىمى. ال، ول بىزدە جوق. ءبىر پارتيانىڭ بىرنەشە ءتۇرلى بەينەسى سياقتى ساياسي پارتيالاردا سەنىم ماسەلەسىن ءسوز ەتۋ ءتىپتى ىڭعايسىز. اينالىپ كەلگەندە، ەسىلدىڭ بەرگى جاعىنىڭ سايلاۋعا سەنىمسىزدىگى ەسىلدىڭ ارعى جاعىنا سايلاۋدى قالاۋىنشا وتكىزۋىنە كەدەرگى بولا المايدى. الايدا، قيراعان سەنىم كوپىرىن قالپىنا كەلتىرۋ سايلاۋدان كەيىن دە كۇن تارتىبىنە شىعارىلمايتىنى وكىنىشتى. سايلاۋشىنىڭ سەنىمى جوق جەردە سايلانبالى بيلىكتىڭ عۇمىرى تاعى قانشا ۋاقىتقا سوزىلاتىنى بەيمالىم...

نۇرا ماتاي

Abai.kz