"ناۋرىز ايى تۋعاندا ، توي بولۋشى ەدى بۇل ماڭدا" دەپ مۇقاعالي جىرلاعانداي، ناۋرىز ايىنىڭ باسىندا  اباي ەلىنە ساپار شەكتىك. قۇنانباي وتكەن، اباي، شاكارىم عۇمىر كەشكەن،  رۋحاني باي ورتادا ۇلى مۇحتار ۋىزىنان جارىپ وسكەن  قاستەرلى مەكەن بۇل.  بۇل جەردىڭ تاۋ مەن تاسى دا، قىراتى، قىرقاسى ، جازىعى دا اباي ولەڭىندەگىندەي  مەن مۇندالاپ تۇر. «اباي ەلىنىڭ كوكتەمى  ولەڭگە اينالعان ومىردەي كورىكتى كوكتەم» دەپ زەينوللا قابدولوۆ ايتقانداي، شىڭعىستاۋ اتىرابى راسىندا  كوكتەمدى  ساعىنا كۇتەتىن ءتارىزدى.  

 اباي اۋدانىنداعى م.اۋەزوۆ كىتاپحاناسىنا  "تۋعان جەرگە - تاعزىم" اتتى اكتسيا دا  كوپشىلىكتىڭ  كوكتەمدەي  اسىعا كۇتكەن شاراسى ەكەن. كوكتەمنىڭ ءيسىن الا كەلگەن كىتاپتار كىتاپحانانىڭ قوينى-قونىشىن ، وقىرماندىرىن قۋانىشقا كەنەلتتى. ءار جەردە كىتاپقا ۇڭىلگەن، كىتاپتى قىزىقتاعان جاستاردى، اۋىل ادامدارىن كورىپ كوڭىلىمىز تاسىدى.  «اۋىل كىتاپ وقىمايدى» دەگەن تۇسىنىك قالىپتاسقانى بار. سول تۇسىنىكتى تۇپ تامىرىمەن جوققا شىعارىپ، مەملەكەت جəنە قوعام قايراتكەرى تايىر مانسۇروۆ جەكە كىتاپ قورىنان 7000 كىتاپتى، ل.ن.گۋميلەۆ اتىنداعى ەۇۋ-ءدىڭ رەكتورى، پروفەسسور ەرلان سىدىقوۆ تا جەكە قورىنان  7000 مىڭ كىتاپتى اۋداندىق كىتاپحانانىڭ قورىنا تاپسىردى. بۇل يگىلىكتى شارالار ەرلان ءباتتاشۇلىنىڭ مەرەيلى الپىس جىلدىق تويىمەن تۇسپا تۇس كەلدى  «تۋعان ەلگە تاعزىم» اتتى  تاعىلىمدى شارانىڭ وتكىزىلۋىنە  ۇيىتقى بولعان  مادەنيەت مينيسترلىگىنىڭ جاۋاپتى حاتشىسى قۋاتجان  ۋاليەۆ پەن قر ۇلتتىق اكادەميالىق كىتاپحاناسىنىڭ باسشىسى ء ۇمىتحان  مۇڭالباەۆا. ءۇمىتحان داۋرەنبەكقىزى دا ءوز كەزەگىندە كىتاپحاناعا ۇلتتىق اكادەميالىق كىتاپحانا اتىنان  تارتۋ-تارالعى رەتىندە  بىرنەشە  كىتاپ  سىيلادى. وسى كىتاپتاردىڭ ىشىندە ءبىر ەرەكشە كىتاپ بولدى. كىتاپحانامىزدىڭ باسپاحاناسىندا باسىلعان  بۇل كىتاپ- «ابايدىڭ قارا سوزدەرى» . ەنى 2,5 سم، ۇزىندىعى 4 سم. كوپشىلىكتىڭ قىزىعۋشىلىعىن تۋعىزعان كىتاپ وسى كىتاپ بولدى.  وسىنداي يگىلىكتى شارالار  ەلىمىزدىڭ بارلىق ايماعىندا جالعاسادى دەپ ۇمىتتەنەمىز. بۇل شاراعا استانادان بارعان سۋرەتشى الماس سىرعاباەۆ، اقىن سەرىك سەيتمان، ۇشەۋمىزدىڭ   اباي توپىراعىنا العاش قادام باسۋىمىز ەكەن. جاڭا ءبىر شىعارماشىلىق  قۋات العانداي  اسەردە بولدىق.

جول كەستەمىزدىڭ تىعىزدىعىنا بايلانىستى اسپاندا ءالى ءتۇن پەردەسىن كەرە قويماعان تاڭ الدىندا   اباي، شاكارىم اتالار جاتقان مەكەنگە بارىپ ، قۇران باعىشتاپ جيدەبايداعى اباي مۇراجايىمەن تانىستىق. اباي اتامىز تۇتىنعان زاتتار كوزگە سونداي ىستىق كورىنەدى. بورىلىدەگى مۇحتار اۋەزوۆ مۇراجايىنا دا باردىق. ماڭگىلىك ماحابباتتىڭ  سيمۆولى ەڭلىك-كەبەك مازارى مەن قوس عاشىقتىڭ ءمۇسىنى ورناتىلعان ەسكەرتكىش تە ءماندى- مازمۇندىلىعىمەن تارتىمدى . سۋرەتشى الماس اينالانى فوتوعا تۇسىرۋمەن  بولدى. تاڭ الدىندا جيدەباي اسپانى ەرەكشە ادەمى تۇسكە بولەنەدى ەكەن. تاڭ قالدىق. ءبىرتۇرلى سەزىمگە بولەندىك.  اباي، شاكارىم، مۇحتار سياقتى ۇلىلاردىڭ   رۋحى ءبىزدى  جەبەگەندەي. ەڭلىك- كەبەك تە تاڭ شاپاعىنا بولەنىپ، شىرايلانىپ تۇردى. اينالايىن ، اباي ەلى، امان بول! سەن قازاقتىڭ قاسيەتىسىڭ!

مارجان ەرشۋ

اباي-اقپارات