الماتىدا كوپە-كورىنەۋ جالعان مالىمەتتەر تاراتقان ەكى تۇلعا قىلمىستىق جاۋاپكەرشىلىككە تارتىلدى،  - دەپ حابارلايدى الماتى قالاسىنىڭ ءىىد ءباسپاسوز-قىزمەتى.

كريمينالدىق پوليتسيانىڭ دەرەگى بويىنشا، سوتقا دەيىنگى تەرگەۋ اياسىندا بولىمشە قىزمەتكەرلەرى جۇرگىزگەن كەشەندى جەدەل شارالار ناتيجەسىندە دايەكسىز مالىمەتتەردى بەلسەندى تاراتۋشىلاردىڭ جەكە باستارى انىقتالدى.

«قوعامدىق دۇربەلەڭ تۋدىرعان ارانداتۋشىلاردىڭ اراسىندا جوعارعى وقۋ ورىندارىنىڭ ءبىرىنىڭ ستۋدەنتى، 1995 جىلى تۋعان چ. ەسىمدى ازاماتشا بار.

ول الەۋمەتتىك جەلىدە جازعان ءوز حابارلاماسىندا الماتىداعى وقيعا تۋرالى تاباندى تۇردە «سيتي پليۋس» ساۋدا ۇيىندە ادامداردىڭ كەپىلگە الىنعاندىعى، قۇربان بولعانداردىڭ بار ەكەندىگى جايىندا مالىمەت تاراتقان.

تاعى ءبىر جالعان مالىمەت تاراتۋشى – 1993 جىلى تۋعان ازامات ا. ول كوممۋنيكاتسيالىق جەلىلەر رەسۋرسىن پايدالانا وتىرىپ، قالانىڭ تومەنگى بولىگىندە 100 قارۋلى ادام قالا تۇرعىندارىن قىرىپ جاتقانى جايىندا ماقساتتى تۇردە جالعان اقپارات تاراتقان.

قازىرگى كەزدە جالعان اقپارات تاراتۋشىلاردىڭ ەكەۋى دە ۇستالىپ، قر قك 274-بابىنىڭ 2-بولىگىندە قاراستىرىلعان قىلمىس بەلگىلەرى بويىنشا سوتقا دەيىنگى تەرگەۋ اياسىندا جاۋاپ الىنۋدا. جاقىن ارادا پروتسەسسۋالدىق نەگىزدە كۇدىكتىلەرگە قاتىستى بۇلتارتپاۋ شاراسى تاعايىندالادى»، - دەدى الماتى قالالىق ءىىد رەسمي وكىلى پوليتسيا مايورى سالتانات ازىربەك.

سونىمەن قاتار، پوليتسيا بولىمىندەگىلەر كوپە-كورىنەۋ جالعان اقپارات تاراتقان باسقا دا تۇلعالاردى انىقتاپ، ارى قاراي ولارعا قولدانىستاعى زاڭناماعا سايكەس جازا قولدانۋ ءۇشىن جەدەل-ىزدەستىرۋ شاراسىنىڭ جالعاسىپ جاتقاندىعىن ايتتى.

«ازاماتتاردى تاعى دا زاڭ تالاپتارىن ساقتاۋعا شاقىرامىز. قازاقستان رەسپۋبليكاسى قىلمىستىق كودەكسىنىڭ جاڭا رەداكتسياسىندا باق نەمەسە باسقا دا اقپاراتتىق-كوممۋنيكاتسيالىق جەلىلەردى پايدالانا وتىرىپ، قاساقانا جالعان اقپارات تاراتقاندىعى ءۇشىن جاۋاپكەرشىلىك قاراستىرىلعان. وسىعان بايلانىستى، ءاربىر ازامات الەۋمەتتىك جەلىلەردە بولسىن، باسقا دا رەسۋرستاردا بولسىن ءوزىنىڭ ويىن، پىكىرىن، پايىمىن، ۋاجدەرىن اقىلعا سالىپ بارىپ جاريالاۋى ءتيىس. سوندىقتان، دەرەككوزى بەلگىسىز، كۇماندى مالىمەتتەردى تاراتپاۋعا شاقىرامىز. تەك رەسمي اقپاراتتاردى عانا پايدالانۋ قاجەت»، - دەدى مايور س. ازىربەك. 

اباي-اقپارات