اكتسياعا قاتىسۋشىلار "ساسۋنسكي قايسارلارى" قارۋلى توبىن قولداپ، ارمەنيا پرەزيدەنتىنىڭ وتستاۆكاسىن تالاپ ەتۋدە. سونىمەن بىرگە ميكرافون مەن دىبىس كۇشەيتكىشتەردى قامتاماسىز ەتۋ ءۇشىن، ەرىكتىلەردى جيناپ جاتىر.

پوليتسيا ولارعا قارسى ەشقانداي ءىس-ارەكەت جاساپ جاتقان جوق. كۋاگەرلەردىڭ حابارلاۋىنشا، باسىپ الىنعان عيمارات ماڭىندا اتىستىڭ داۋىستارى ەستىلەدى. بەلسەندىلەردىڭ ايتۋىنشا، بۇل پوليتسيا عيماراتىن باسىپ العان قارۋلى توپتىڭ اكتسياعا قاتىسۋشىلاردى قولداۋ بىلدىرگەندەرى.

ەرەۆاندا وتكەن بەيسەنبى كۇنى پوليتسيا عيماراتى جانىنا كەلىپ ەرەۋىلدەگەن 136 ادامدى ۇستاعاندىعى تۋرالى حابار تاراعان. ارمەنيا تەرگەۋ كوميتەتىنىڭ مالىمەتى بويىنشا، 28 ادام ۇستالعان. ولاردى جاپپاي تارتىپسىزدىكتى ۇيىمداستىردى دەپ ايىپتايدى.

قارۋلى توپ ەرەۆاننىڭ ەرەبۋني اۋدانىنداعى پوليتسيا پولكى شتابىن 17 شىلدە كۇنى تاڭەرتەڭ باسىپ العان. شابۋىل كەزىندە ءبىر پوليتسەي قازا تاۋىپ، التاۋى جارالانعان. قازىر توپ ءتورت ادامدى كەپىلدە ۇستاپ وتىر جانە ولار "قۇرىلتاي پارلامەنتى" وپپوزيتسيالىق قوزعالىسىنىڭ جەتەكشىسى جيراير سەفيلياندى بوساتۋدى تالاپ ەتەدى. سەفيليان وتكەن ايدا زاڭسىز قارۋ-جاراق ساقتادى دەگەن ايىپپەن قامالعان. ولار سونىمەن قاتار ارمەنيا پرەزيدەنتى سەرج سارگسياننىڭ وتستاۆكاعا كەتۋىن دە تالاپ ەتەدى. بيلىك تالاپتى ورىنداۋدان باس تارتىپ، قارۋلى توپپەن ءوز ەركىمەن بەرىلۋ تۋرالى كەلىسسوز جۇرگىزىپ جاتىر.

اباي-اقپارات