جۇزگە جۋىق قازاقستاندىق جۇرگىزۋشى جارتى ايدان بەرى ەلگە جەتە الماي ءجۇر. ەۋروپادان تاۋار تاسىمالداۋشىلار كۇتپەگەن جەردەن بەلارۋس پەن رەسەي شەكاراسىندا قالىپ قويعان دەپ حابارلايدى كتك ارناسى.

سويتسە، كولىك يەلەرىنىڭ بار كىناسى - ۋكراينانى كەسىپ وتكەنىندە ەكەن. ياعني، رەسەيدىڭ ول ەلگە سالعان سانكتسيالارى كەسىرىنەن، تاۋار تاسىعانداردىڭ بارلىعى شەكارادا قاڭتارىلىپ قالعان.

كولىك جۇرگىزۋشىلەرىنىڭ كۇلۋگە دە شاماسى جوق. سەبەبى بالا-شاعاسىنا جەتە الماي 15-ءشى كۇن بەلارۋس پەن رەسەي شەكاراسىندا بوسىپ ءجۇر. كاسىپكەردەن كادۋىلگى قاڭعىباسقا اينالعاندار كەدەنشىلەردەن تاماق سۇراپ جەيتىن حالگە جەتىپتى.

"شەكارادا كەپتەلىپ تۇرعانىمىزعا ەكى اپتادان استى. تاماق الىپ ىشەتىن اقشامىز دا تاۋسىلدى. ەشكىم ەشقانداي تۇشىمدى جاۋاپ بەرمەيدى. قولىمىزدا حالىقارالىق جولقاعاز دا بار. دەگەنمەن رەسەي كەدەنشىلەرى قازاقستانعا وتكىزبەي جاتىر", - دەيدى بەكبول توقسانباەۆ.

قازىر رەسەي مەن بەلارۋس شەكارالارى تۇيىسكەن سمولەنسكتەگى كەدەن بەكەتىنىڭ اۋزىندا 60-تان استام جۇك كولىگىمىز توقتاپ تۇر. ءبىرى -يتاليادان تاۋار تيەسە، ال ەندى ءبىرى-تۇركيا مەن بولگاريادان زات الىپ، ۋكراينا، بەلارۋس، رەسەيدى كەسىپ ءوتىپ، ەلگە كەلۋى ءتيىس بولعان. بىراق تا، سول كۇيى جەتە الماي ءجۇر.

قانداستارىمىزدىڭ جارتى ايدان بەرى ەلگە جەتە الماي جۇرگەندەرى تەك ەندى بەلگىلى بولىپ وتىر. ءبىرتالاي جىلدار بويى قاشىققا قاتىناپ ۇيرەنگەندەر بۇرىن-سوڭدى مۇنداي قيىندىق كورمەدىك دەيدى. جۇرگىزۋشىلەردىڭ «قازاقستاننانبىز» دەگەنىنە دە كەدەنشىلەر كونبەگەن.

"وفيتسيالنايا پوزيتسيا فتس- فەدەرالنوي تاموجەننوي سلۋجبى. تو، چتو زاستۋپيلو چەرەز ۋكراينۋ پروەزدوم، ونو تاكجە زاپرەششەنو ترانزيتۋ. يز ۋكراينى، ي ترانزيتى ۋكراينى", - دەيدى «كراسنايا گوركا» كەدەن كولىك بەكەتىنىڭ باسشىسى ەۆگەني اگافونوۆ.

سويتسە، وداقتاس ەلدىڭ اياقاستى اينىپ قالۋىنىڭ سەبەبى سانكتسيادا ەكەن. رەسەي ۋكراينامەن اراسىن ودان ءارى ۋشىقتىرىپ، ۋاقىتشا تىيىمداردى كوبەيتكەن.

"وسى جىلدىڭ 1-ءشى ماۋسىمىنان باستاپ پرەزيدەنت جارلىعىنا سايكەس ۋكراينا تەرريتورياسىنان ترانزيتپەن كەلەتىن جانە رەسەي ارقىلى وتەتىن كەز-كەلگەن ترانزيتكە ۋاقىتشا تىيىمدار سالىندى. ياعني، سانكتسيا تىزىمىندە بار تاۋار كەدەننەن وتكىزىلمەيدى. بۇل جارلىق تەك قازاقستانعا قاتىنايتىن تاۋار تاسىمالداۋشىلارعا عانا ەمەس، قىرعىزستانعا دا قاتىستى", - دەيدى رەسەي فكق ورتالىق كەدەن باسقارماسى قوعاممەن بايلانىس ءبولىم باسشىسى ەكاتەرينا انچيپوروۆا.

ياعني، رەسەي ۋكراينادان جەتكەن جۇكتەردى ءوز جەرى ارقىلى وتكىزبەۋگە بەل بۋعان. رۇقسات الۋ ءۇشىن ءبىرتالاي تەكسەرۋدەن ءوتۋ كەرەك ەكەن. ال بۇل دەگەن ءسوز – وتانداستارىمىز كەرى ۋكرايناعا قايتىپ، قۇجاتتارىن تۇزەۋى ءتيىس. تەك تاعى مىڭداعان شاقىرىمدى قايتا ەڭسەرۋگە جۇرگىزۋشىلەردە قارجى دا، قايرات تا جوق. سوندىقتان بار ۇمىتتەرى – سىرتقى ىستەر مينيسترلىگىندە. ديپلوماتتاردان اراشا ءتۇسىپ، ولاردى ۇيگە قايتارۋىن سۇراپ وتىر.

Abai.kz