«حابار» ارناسىندا ءجۇرىپ جاتقان «جۇلدىزدار ايتىسادى» توك شوۋى شەتەلدىك جوبالارمەن يىق تەڭەستىرە الاتىن بىرەگەي وتاندىق جوبا رەتىندە دارىپتەلۋدە.

ءىس جۇزىندە، بۇعان ورىسشا ايتىس جاساپ، ەسترادالىق اندەردىڭ اۋەنىن ماقام قىلىپ، ايتىستى شوۋعا اينالدىرعان تەلەارنالاردىڭ پروديۋسەرلەرى نەمەسە كۆن-شىكتەر كىنالى ەمەس. قازىرگى قازاق ايتىس ونەرىنىڭ ۇزدىك وكىلى سانالاتىن بالعىنبەك يماشەۆ بۇدان تالاي جىل بۇرىن، ۇكىمەتباسى كارىم ءماسىموۆ باستاعان شەنەۋنىكتەر تاماشالاعان ايتىستا “Eكى تىلگە بىردەي جەتىك ەدىم” دەپ، ارىپتەسى ريناتتى ورىسشا ايتىسۋعا شاقىرىپ، رەسمي تىلدە ايتىس ۇلگىسىن كورسەتىپ، كوپشىلىكتىڭ "كوڭىلىنەن" شىققان. بالعىنبەكتىڭ جاڭالىعى ول عانا ەمەس، ەجەلگى ماقامدارمەن بىرگە ەسترادالىق اندەردىڭ اۋەندەرىن شەبەر پايدالانىپ، ونى كەيىنننەن جەكە ستيلىنە اينالدىردى دەسە دە بولادى. مارقۇم ەرجان سەرىكباەۆتىڭ «تاڭعى قالا»، «مەيلى» اندەرىنىڭ، تاعى باسقا دا حيت اندەردىڭ اۋەنىمەن توگىلتكەن شۋماقتارى ەل اۋزىندا ءجۇر.

دايىن اسقا كىم تىك قاسىق بولماسىن؟! ىلە-شالا رەسەيلىكتەردىڭ «ناشا راشا» جوباسىنىڭ ءوڭىن ايلاندىرىپ، «ناشا كازاشانى» ۇسىنعان نۇرتاس ادامباەۆ اۋزىمەن دومبىرا ويناپ، ورىسشا ماندىرايتىن اقىن وبرازىنا ەنىپ، ورىس ءتىلدى قاۋىمدى كۇلكىگە كەنەلتكەن. وسىدان كەيىن-اق قازاقتىڭ قاسيەتتى ونەرىنەن قادىر كەتتى.

كەيىن كونتسەرت فورماسىندا وتكەن «جۇلدىزدار ايتىسادى» جوباسى ەفيردە كورسەتىلە سالا سىننىڭ استىندا قالعان ەدى. ەندى سول جوبانى «حابار» ارناسىنىڭ جوق جەردەن تاۋىپ العانداي، فoرماتىن وزگەرتىپ، قايتا ۇسىنعانىنا جول بولسىن.

رينات زايىتوۆ ءبىر كەزدە، ايتىس اقىندارىنىڭ ءبىر-بىرىنە ايتارلارىن الدىن-الا جازىپ-كورسەتىپ، ءوزارا كەلىسىپ الىپ ايتىساتىنىن جايىپ سالعان ەدى. «جۇلدىزدار ايتىسادى» جوباسى سونىڭ ناقتى كورىنىسى. جازىپ بەرگەندى جاتتاپ الىپ، ساحنادا جاڭا قىرى اشىلعان ادۋىندى اقىن بەينەسىنە ەنگەن جۇلدىزداردىڭ تىرلىگى ايتىستان گورى اجۋاعا سايادى. قازاقتىڭ ايتىس ونەرىنىڭ جانى – سۋىرىپ سالمالىق ەكەنىن ەسكەرسەك، جوبانى ۇسىنۋشىلاردىڭ ارەكەتى "ايتىستى ءبىر جولا ءوشىرۋ مە ەكەن؟" دەپ ويلايسىڭ!

ەسبول ۇسەنۇلى 

Abai.kz