ونىنشى ماۋسىمنان بەرى فرانتسيادا ءوتىپ جاتقان اياقدوپتان ەۋروپا قۇرلىعى بىرىنشىلىگىنىڭ دوپ دوداسىنان «قازاقستان» جانە «Kazsport»  ارنالارىنان تىكەلەي ەفيردە  كۇندەلىكتى كورسەتۋدە. بىراق ءبىزدىڭ  قازاق  تىلىندەگى كومەنتاتورلار ابدەن جۇيكەمىزگە ءتيىپ ءبىتتى.  قاي جاق گول سوقسا بولدى، «گ-و-و-ل!» جەپ وڭەشى جىرتىلعانشا ۇزاق-سونار ايقايلايدى. جاراسپايدى-اۋ، جاراسپايدى. جاراسپايتىنى - جاساندى ەموتسيا!

جاساندىلىعى ايدالاداعى ءۇش قايناسا دا سورپاسى قوسىلمايتىن  يتاليا، يسپانيا  سياقتى  ەۋروپا  ەلدەرىنىڭ  كوماندالارى ءۇشىن قىلعىنا ءولىپ كەتە جازدايدى، سابازدارىڭ. ال وتاندىق بىرىنشىلىكتەن رەپورتاج جۇرگىزگەندە مىڭگىرلەپ، مۇرنىن استىنان سويلەپ وزىمىزدىكىن مەنسىنبەيدى. وزىڭدىكىن قور، وزگەنىكىن زور ساناعان سورلى قۇلدىق سانانى ايتساڭىزشى! سونداي ساتتە قازاقتاي  ەرمە، ەلىرمە، داراقى  جۇرت بار ما ەكەن دەپ  ىزالاناسىڭ.  جانكۇيەر بولۋدىڭ نە ەكەنىن قۇدايعا شۇكىر، بىلەمىز. بىراق قانشا جەردەن جۇرەگىڭ جارىلىپ كەتسە دە اقىلعا سىيىمدى بولۋ كەرەك ەمەس پە؟!  وڭەشىڭ جىرتىلا ايقايلايتىن ستاديوندا  وتىرعان جانكۇيەر ەمەس،  ەلگە حابار جەتكىزۋشى كوممەنتاتور ەكەنىن ۇمىتىپ كەتەدى. كەڭەس زامانىندا نيكولاي وزەروۆ  جانە  كوتە ماحارادزە دەگەن سپورت كوممەنتاتورلارى بولدى. ولار ايقايلاعاندا ايقايدىڭ كوكەسىن تانىتاتىن. بىراق ولار ءوز ەلىنىڭ  حوككەيشىلەرى نەمەسە فۋتبولشىلارىنىڭ سوققان گولدارىنا عانا شىنايى ءتانتى بولىپ داۋىسقا سالاتىن.  شىنايى ەموتسيا تىڭدارماندى دا، كورەرمەندى دە تابيعي ەلىتىپ اكەتەتىن.

..ماۋسىمنىڭ 17 كۇنگى يتاليا - شۆەتسيا كەزدەسۋىنەن جاساعان رەپورتاجدا («Kazsport»19.00.) كومەنتاتور اقىلدىمسىپ، انانى ءبىر، مىنانى ءبىر ايتىپ، عالامتوردان وقىعاندارىن ايتىپ،  زلاتان يبراگيموۆيچتىڭ ءومىر بويى قاسىندا جۇرگەن ەجەلگى سىرالعى جولداسىنداي بىلگىشسىندى.  ءبىر ۋاقىتتا يتاليا گول سوعىپ ەدى، مانا ايتقانىمىزداي  «گ-و-و-ل!» دەپ وڭەشى جىرتىلعانشا ۇزاق-سونار ايقايلادى. ايقايلادى دا: ء«بىزدىڭ اڭساعانىمىز وسى ەدى!» دەپ قويىپ قالدى. اپىراي اڭسايتىنداي  بۇل كوممەنتاتور يتاليا ەلىندە تۋعان نەمە دەپ قالدىق! كەيدە ىزاڭ كەلگەندە، رەسەي ارنالارىنداعى وسىنداي  رەپورتاجدارعا اۋىستىرىپ كورەسىڭ. ورىستار ءبىز سياقتى شەكتەن شىققان داراقى ەمەس، بايسالدى دا، جەڭىل-جەلپى، جاراسىمدى كوڭىل-كۇيمەن اڭگىمەلەپ وتىرادى. گول سوعىلسا، داۋىس كوتەرەدى، بەلگىلى ءبىر شەكپەن عانا.  ولاردىڭ پىكىر تالاسى دا تارتىمدى. ءبىزدىڭ قازاق كوممەنتاتورلارى تىم بولماسا قاسىنداعى ءورىستىلدى ارىپتەسىنە قارامايدى-اۋ. ەكى ءسوزىنىڭ ءبىرى: «ورىن الدى»،  «قيىس كەتتى»، «ەسە جىبەردى»، «شابۋىل ۇيىمداستىردى» - بارى وسى.  سويلەسە  دوپ تەبەدى، باسپەن ۇرادى، سەكىرە تەبەدى، وكشەمەن  دوپتى ءيىرىپ الادى، باياۋ جۇگىرىس، جامباستاپ دوپ سوعۋ  سياقتى قازاقتا ءسوز جەتىلىكتى. بىراق ءسوزدىڭ قورى سارقىلعان كوممەنتاتورلار گول دەپ ايقايلاماعاندا نە ىستەسىن دەپ تاعى دا ايايسىڭ. 

تۇرسىن تاڭاتاروۆ، قوستاناي قالاسى

Abai.kz