اقتوبەدەگى قاقتىعىس سالدارىنان 20 ادام قازا تاپتى. ونىڭ جەتەۋى اسكەري قىزمەتكەر مەن بەيبىت تۇرعىندار بولسا، قالعاندارى كۇش قۇرىلىمدارى «لاڭكەس» دەپ اتاعان ورىمدەي قازاق جىگىتتەرى. كەشە، 9 ماۋسىمدا وتكەن جالپىۇلتتىق ازا تۇتۋ كۇنىندە سول جىگىتتەردىڭ ەسىمدەرى اتالمادى. امانكەلدى ايتالى ايتپاقشى، ولاردىڭ اتا-اناسى مەن تۋىستارىنا كوڭىل ايتىلمادى. مۇنداي وقىس ارەكەتكە باستاعان سەبەپتەر جونىندە بىزگە ءالى ەشتەمە بەلگىسىز.

«لاڭكەستىكتىڭ» ايتىلىپ جۇرگەن ء«دىني» موتيۆيروۆكاسى ويدان شىعارىلعان با دەيمىن. ويتكەنى، مۇنداي وقيعالاردىڭ جاي عانا الەۋمەتتىك نەمەسە كريمينالدىق سەبەپتەرىنىڭ ءوڭى اينالدىرىلىپ، وعان «تولەشەۆتىڭ ءىسى» سياقتى ساياسي نەمەسە ءدىني «يارلىك» جاپسىرىلا سالۋى ادەتتەگى جاعداي.

كۇش قۇرىلىمدارى تاراپىنان ولتىرىلگەن 13 جىگىت وسى قوعامنىڭ پەرزەنتتەرى ەدى. ەشبىرى اسپاننان تۇسكەن جوق. ءبارى دە اتا-انانىڭ ءۇمىت كۇتكەن ۇلدارى بولاتىن. مەكتەپ پارتاسىندا وتىردى، اسكەردە مىندەتتى بورىشىن وتەگەندەرى دە بار شىعار. سول جاستاردىڭ قىرشىنىنان قيىلۋىنا ءوزىمىز كىنالىمىز.

ولاردىڭ سويقاندى سودىرلىق جولىنا تۇسۋىنە تۇرتكى بولعان ەڭ الدىمەن – مەملەكەتتىك بيلىك. ەگەر ەلىمىزدە دۇرىس ۇلتتىق يدەولوگيا قالىپتاسقان بولسا، جاستارعا وڭدى پاتريوتتىق سەزىم دارىتىلعان بولسا، ادالدىق پەن ادىلدىك تۋ ەتىلسە ءبىز مۇنداي قاسىرەتكە ۇشىراماعان بولار ەدىك. ۇلتتىق يدەولوگيالىق كەڭىستىكتەگى ۆاككۋم، جالعان ۇراندار، كوزبوياۋشىلىق پەن كوررۋپتسيا جاستاردىڭ ەرتەڭگە دەگەن سەنىمىن جويىپ، «باقىتتى» باسقا جاقتان ىزدەۋگە ءماجبۇر ەتىپ وتىر.

ءوزىنىڭ ازاماتتىق قۇقىعىن جۇزەگە اسىرماق بولعاندار –شەتەلدەن 150 دوللار اقشا العان ساتقىن، اقيقاتتى ايتقىسى كەلگەندەر – يدەيالىق جاۋ، كريمينالدىق بەلسەندىلەر – توڭكەرىسكە ۇمتىلعان ساياسي قارسىلاس تانىلعان بۇگىنگى كۇندە حالىق بيلىكتىڭ ءار سوزىنەن مۇلدە قاراما-قايشى ماعىنا ىزدەيتىن بولدى.

ءىس جۇزىندە اقتوبەدەگى قاقتىعىس مەملەكەتتىڭ جىبەرگەن يدەولوگيالىق قاتەلىكتەرىنىڭ قاقتىعىسى. وكىنىشكە قاراي بيلىك ونى مويىندامايدى. «الدىمەن –ەكونوميكا، ساياسات – ودان سوڭ» ۇستانىمى قاتە ەكەندىگىن ءومىر كورسەتتى. قوعامنىڭ ىرگەتاسى ەكونوميكا ەمەس ۇلتتىق يدەولوگيا بولۋ كەرەك. بىزگە ادەتتە ەشقاشان ولمەيتىن ەل سياقتى اقىلعا قونىمسىز بىردەمەلەر تىقپالانىپ جاتادى. جالعان ىرگەتاستىڭ ۇستىنە شىنايى عيمارات سالۋعا بولا ما؟!

ءوز باسىم جازىقسىز قازا تاپقان 7 جىگىتتىڭ وتباسىمەن قوسا يدەولوگيالىق ۆاككۋم سالدارىنان جاڭىلىس جولعا تۇسكەن 13 قازاق جىگىتىنىڭ وتباسىنا دا قايعىلارىنا ورتاقتاسىپ كوڭىل ايتامىن.

مارات توقاشباەۆ

فەيسبۋكتەگى پاراقشاسىنان