رەسەي ۇكىمەتىنە مۇنداي تاپسىرمانى پرەزيدەنت ۆلاديمير پۋتين ەرەكشە ەكونوميكالىق ايماقتاردى تەكسەرۋ قوىتىندىسى بويىنشا بەرگەن.

ءپۋتيننىڭ تاپسىرماسىنا پرەزيدەنتتىڭ باقىلاۋ باسقارماسىنىڭ باسشىسى كونستانتين چۋيچەنكونىڭ ەسەپ كوميتەتىنىڭ مالىمەتتەرىنە سۇيەنىپ جاساعان بايانداماسى سەبەپ بولعان. باياندامادا 2006 جىلدان باستاپ 33 ەەا قۇرۋعا 186 ميلليارد رۋبل (2,8 ميلليارد دوللاردان استام) جۇمسالعانى ايتىلادى. 2006 جىلدان بەرى بارلىق ەەا-دان تۇسكەن سالىق جانە كەدەندىك تۇسىمدەر 40 ميلليارد رۋبل (شامامەن 615 ميلليون دوللار) بولعان. سوندا ەەا-دا ءبىر جۇمىس ورنىن اشۋعا بيۋدجەتتەن 10 ميلليون رۋبل (153 مىڭ دوللاردان استام) جۇمسالعان بولىپ شىعادى. بۇل رەسەيدە ءبىر ادامعا 25 جىل بويىنا ورتاشا جالاقى تولەپ تۇرۋعا جەتەتىن ەدى. قازىر قۇقىق قورعاۋ ورگاندارىندا ەەا-نى دامىتۋعا بولىنگەن بيۋدجەت قارجىسىن جىمقىرۋعا قاتىستى بەس قىلمىستىق ءىس قوزعالعان.

ەەا-نى تەكسەرۋگە "بۇكىلرەسەيلىك حالىقتىق مايدان" بەلسەندىلەرىنىڭ 2015 جىلدىڭ قاراشاسىندا پرەزيدەنتكە جاساعان شاعىمدارى تۇرتكى بولعان. ەەا 2005 جىلدىڭ 1 شىلدەسىندە ارنايى زاڭ بويىنشا قۇرىلعان. 2016 جىلدىڭ 1 قاڭتارىنا دەيىن 30 سۋبەكتىدە 33 ەەا بولعان. رەسەي ەكونوميكا مينيسترلىگىنىڭ مالىمەتىنشە، 2006-2015 جىلدارى ەەا-عا 400-دەن استام ينۆەستور كەلگەن.

اباي-اقپارات