الاش كوسەمدەرىنىڭ ءبىرى، XX عاسىردىڭ باسىندا قازاق حالقىن وتتى ولەڭىمەن وياتىپ، ونەر-بىلىمگە، ەركىندىككە ۇندەگەن مىرجاقىپ دۋلاتۇلىنىڭ قوستاناي وبلىسى، جانگەلدين اۋدانى، قىزبەل (بيدايىق) اۋىلىنداعى كەسەنەسى قاۋىپتى جاعدايدا تۇر دەپ حابارلايدى Baq.kz سايتىنىڭ ءتىلشىسى.

1989 جىلى مىرجاقىپ دۋلاتوۆتىڭ سۇيەگى كارەليادان تابىلىپ، قىزى گۇلنار دۋلاتوۆانىڭ باستاماسىمەن، مىرجاقىپتانۋشى عالىم مارات ابسەمەتوۆ، بەلگىلى كينو-رەجيسسەر حاليلا وماروۆ، تانىمال جۋرناليست قايسار ءالىم جانە وزگە دە ادامداردىڭ قاتىسۋمەن 1992 جىلى قازاقستانعا، تۋعان جەرى تورعاي دالاسىنا اكەلىپ جەرلەنگەن بولاتىن.

كەسەنەنىڭ شىراقشىسى ناعاشىباي ءبىرمانوۆتىڭ ايتۋىنشا، جاقاڭنىڭ زيراتىمەن قوسا سول جەرگە سالىنعان مۋزەي ءۇيى دە مۇلدە قاراۋسىز قالعان كورىنەدى.

«مىرجاقىپتىڭ باسىنا زيارات ەتىپ كەلۋشىلەر كوپ. رۋحاني سالاعا قاتىسى بار ادامدارمەن قوسا قاراپايىم ادامدار دا الىستان ات تەرلەتىپ كەلىپ جاتادى. وكىنىشكە وراي، بۇل اۋماق ەشقانداي ءبىر مەملەكەتتىك مەكەمەگە ءتان ەمەس بولىپ، قاراۋسىز قالعان سوڭ قىزبەل اۋىلىنىڭ اكىمدىگى سوت شەشىمى ارقىلى ءوز قاراماعىنا العان بولاتىن. بىراق، شالعاي اۋىلداعى شاعىن اكىمدىكتە كەسەنە مەن مۋزەيدى رەمونتتاپ، كوممۋنالدىق شىعىنداردى تولەپ، كۇتىپ ۇستاۋعا قارجى تاپشىلىعى قاتتى اسەر ەتىپ وتىر. مۋزەيگە ەلەكتر جۇيەسى تارتىلماعان، كەلگەن قوناقتارعا فوناريك جاعىپ، قىزمەت كورسەتەمىن. كەسەنە مەن مۋزەي اۋماعىن تازالاپ، كۇتىپ ۇستاۋعا ءوزىم جۇگىرەمىن. ەش مەكەمەگە قاراستى بولماعان سوڭ ايلىق تا تولەنبەيدى. تەك، ۇلى ارۋاق ءۇشىن جىل ون ەكى اي تەگىن قىزمەت كورسەتەمىن»، - دەيدى شىراقشى

(https://baq.kz/kk/news/asil_kazina/ekskluziv_mirzhakip_dulatulinin_kesenesi_kulagali_tur__foto).

بەلومور-بالتىق ارناسىنىڭ قۇرىلىسى بويىندا، سوسنوۆسك ستانتسياسىنداعى جازالاۋ لاگەرىندە جازاسىن وتەگەن مىرجاقىپ دۋلاتۇلى 1935 جىلى وسى لاگەردە اۋىر ناۋقاستان كوز جۇمعان ەدى.

بولماسا باسىما دا بارماس پا ەكەن؟

اتىمدى اۋزىنا دا الماس پا ەكەن؟

قارايىپ جاپان تۇزدە جالعىز تۇرعان

مولاما كوز قىرىن دا سالماس پا ەكەن؟ - دەپ جىرلاعان  اقىن.

مىرجاقىپ دۋلاتۇلى – ستاليندىك رەپرەسسيانىڭ قۇربانى. الاش ارداگەرلەرىنىڭ اراسىندا سۇيەگى العاش تابىلىپ، ءمايىتى تۋعان جەرىنىڭ قۇشاعىنان ورىن تاۋىپ ەدى. 1992 جىلدارى تۇرعىزىلعان مىرجاقىپ كەسەنسى قازىر قۇلاپ قالعالى تۇر. اقىننىڭ كەسەنەسى مەن مۋزەي ۇيىنە مادەنيەت مينيسترلىگىنەن باستاپ ءتيىستى ورىنداردىڭ ءبارى كوڭىل ءبولۋى كەرەك.

اباي-اقپارات