سوڭعى كۇندەردەگى الاساپىران وقيعالار ءھام سول جاعداياتقا قاتىستى تاراعان رەسمي اقپاراتتارعا قاراساڭىز، جانىڭىز تۇرشىگەدى. سوناۋ سارىاعاشتاعى ۇلتارالىق جانجالدان باستاپ، كەشەگى ميتينگتەرگە ءھام اقتوبەدەگى لانكەستىككە دەيىنگى ساياسي شيەلەنىستەردىڭ ءبارىنىڭ اۆتورى ءبىر-اق كۇندە تابىلدى (قر ۇقك وكىلى رۋسلان كاراسەۆ وسىنىڭ بارىنە ءبىر ادام ياعني كاسىپكەر تولەشوۆ كىنالى دەگەن رەسمي مالىمدەمە جاسادى. قاراڭىز: http://abai.kz/post/view?id=8194. 

سونىمەن، اقتوبەدە جيىرماعا جۋىق ازاماتتىڭ ءومىرىن جالماعان قاندى قىرعىندى "جاساۋشىلار" (ۇيىمداستىرۋشى كۇش) بەيبىت ميتينگتە نە ءۇشىن وق اتپاعانىن حالىق تۇسىنە الماي وتىر.

جالپى، قازاقتا ء«بىر وقپەن ەكى قويان اتۋ» دەگەن ۇعىم بار. ءبىزدىڭ ىشكى ىستەر مينيسترلىگى مەن ۇلتتىق قاۋىپسىزدىك كوميتەتى ءبىر وقپەن ەكى ەمەس، ءۇش قوياندى بىردەن سۇلاتا سالماق نيەت تانىتتى.

ەستەرىڭىزدە بولسا، سوناۋ سارىعاشتىڭ ىنتىماعىندا كىسى ءولىمى بولعان كەزدە بىزدەگى رەسمي ورگاندار «بۇل بار بولعانى ەكى ازاماتتىڭ تۇرمىستىق جاعدايعا كەلىسە الماۋىنان تۋىنداعان جانجال» دەپ الگى وقيعانىڭ «ۇلتارالىق قاقتىعىس» ەمەستىگىن دالەلدەۋگە تىرىسقان-دى. ەندى كەلىپ، اقتوبەدەگى لانكەستىك ارەكەتتەن كەيىن سول وزدەرى جوققا شىعارعان قىلمىستى بار ەتىپ، ونىڭ ارتىندا كىمدەر تۇرعانىن "سۇيىنشىلەپ" جىبەردى.

دەمەك، بۇل - قاتارداعى قىلمىس ەمەس، ۇلتارالىق قاقتىعىس بولعانى ما؟ ەندەشە، سول كەزدە ۇلتارالىق ارازدىقتى تۋعىزعان قىلمىسكەرلەر نەگە سوتتالمادى؟. حالىق ن.نامەتوۆتەن باسقا جاۋاپقا تارتىلعان ءبىر ادامدى دا بىلمەيدى. نەگە؟

ەل-جۇرت ۇمىتا باستاعان سارىاعاشتى قويشى... سوڭعى ءبىر جارىم ايدىڭ بەدەرىندە قازاق دالاسىن دۇبىرلەتكەن جەر ماسەلەسىنە دە «سىرا ءوندىرۋشى» تولەشەۆ كىنالى بولىپ شىقتى.  

جەرىمىزدىڭ ساتىلۋى مەن جالعا بەرىلۋىنە قارسىلىعىن ءبىلدىرىپ قازاق ۇلتىنىڭ ازاماتتارى الاڭعا شىقتى. قازاقستان حالقى اسسامبلەياسىنىڭ ءححىV cەسسياسىندا سويلەگەن سوزىندە مەملەكەت باسشىسى نۇرسۇلتان نازارباەۆ جەرىن قورعاشتاعان قازاق حالقىنا ريزا ەكەنىن ءبىلدىردى.

«اعايىنعا ريزامىن. لايىم جەرگە دەگەن كوڭىل وسىنداي بولسا، حالقىمىز قاسىق قانى قالعانشا ونى قورعايدى دەپ سەنەمىن»، - دەدى اتالعان جيىن بارىسىندا نۇرسۇلتان ءابىشۇلى نازارباەۆ.

وسى ەلباسى العىس ايتىپ، ريزاشىلىعىن بىلدىرگەن بۇقارا حالىق ەندى كەلىپ تەرروريست بولعانى ما؟ قر ىشكى ىستەر مينيسترلىگى مەن ۇلتتىق قاۋىپسىز كوميتەتى تاراتقان اقپاراتتارعا سەنسەك، ميتينگشىلەر لاڭكەس بولىپ شىعا كەلگەنىن بايقايسىز.

سوندا،  اسسامبەليادا سويلەگەن سوزىندە  ەلباسىمىز لاڭكەستەرگە العىس ايتقان بولىپ شىقپاي ما؟ جوق، الدە مينيسترلىك بۇل ماسەلەنى باسقاشا تاپسىرلەۋدى موينىنا جۇكتەپ وتىر ما؟

قازاقستان حالقىنىڭ ءتۇرلى ميتينگ وتكىزۋگە، ءوزىنىڭ ازاماتتىق ويىن اشىق ايتۋعا قۇقىعى بار. قازاقستاننىڭ بىرنەشە قالاسىندا وتكەن بەيبىت شەرۋلەردە ازاماتتارىمىز سول قۇقىعىن پايدالانىپ، بەيبىت تۇردە نارازىلىقتارىن ءبىلدىردى. ولار مەملەكەتتىك تۇتاستىققا قاۋىپ توندىرەتىندەي ءھام بيلىكتى باسىپ الاتىنداي ارەكەتتەر جاساعان جوق. "ولار جەردى بىرەۋدىڭ اقشاسىنا بولا قورعايدى، ولار ميتينگكە بىرەۋدىڭ ايتاقتاۋىمەن عانا شىعادى" دەۋ - قازاق ۇلتىنىڭ نامىسىن تاپتاۋ، الاڭعا شىققان ءار ازاماتتىڭ ادامدىق قۇقىعىن اياقاستى ەتۋ.  

ەندەشە «جەردى ەشكىمگە جالعا بەرمەيمىز» دەپ ۇلتتىق پاتريوتتىعىن اشىق ءبىلدىرىپ وتىرعان كۇللى قازاقستاندىقتاردى «تەروريست» دەپ قارالايتىنداي قانداي سەبەپ بار؟.

وسىنى ىشكى ىستەر ءمينيسترى ءتۇسىندىرۋى كەرەك دەپ ويلايمىز.

ايتپاقشى، «سەنىمسىز» ءبىر سەبەپ بار ەكەن. بۇكىل جۇرتقا 20 مامىر كۇنى الماتى قالاسىنان سۋىق قارۋلار تابىلعانى ءمالىم بولدى. بىراق، بۇل اقپاراتتىڭ راس-وتىرىگىنە ءالى ەشكىم كوز جەتكىزە العان جوق. 20 مامىردا ۇستالعان كۇدىكتىلەر تۋرالى ءالى كۇنگە تولىق مالىمەتتەر جاريا ەتىلمەي كەلەدى. نەگە؟ ۇستالعاندار كىمدەر؟ سوت الدى تەرگەۋ امالدارى قالاي جۇرگىزىلىپ جاتىر؟ كۇدىكتىلەر قالاي انىقتالدى؟ ءبارى دە سۇراق بەلگىسى كۇيىندە قالىپ وتىر.

حالىق 20 مامىردا ابجىلدىك تانىتقان قۇزىرەتتى ورگان قىزمەتكەرلەرىنىڭ  اقتوبەدەگى لاڭكەستىك كەزىندە نەگە «ۇيىقتاپ» قالعانىن دا تۇسىنە الماي وتىر. ياعني، ءبىزدىڭ قۇزىرەتتى ورگاندار بار كىنانى وزگەگە اۋدارىپ، وزدەرىنىڭ السىزدىگىن بۇركەمەلەپ قالعىسى كەلەتىندەي.

ءتۇيىن

ءبىز وسىدان ءبىر اپتا ۋاقىت بۇرىن قر ىشكى ىستەر مينيسترلىگىنىڭ ءمينيسترى، گەنەرال قالمۇحامبەت قاسىموۆ مىرزاعا «Abai.kz» اقپاراتتىق پورتالىنىڭ اتىنان بىرنەشە ساۋالدار جىبەرگەن ەدىك. وعان ءالى جاۋاپ كەلگەن جوق. الايدا ءبىز سول ساۋالدارعا قوسا وسى ءبىر شاعىن  ماقالادا قامتىلعان جايتتار مەن تاقىرپتاعى سۇراققا بايلانىستى ءمينيسترى مىرزا ءوز پىكىرىن ورتاعا سالار دەگەن ۇمىتتەمىز.

قانات بىرلىكۇلى

Abai.kz