اقتوبەدەگى تەراكتىنى جانە ەلىمىزدەگى  حالىقتىق تولقۋلاردى ۇيىمداستىرۋشى توقتار تولەشەۆ بولۋى بەك مۇمكىن، - دەپ حابارلايدى informburo.kz سايتى.

قازاقستاننىڭ باس پروكۋراتۋراسى اقتوبەدەگى تەراكتىگە قاتىستى پىكىر ءبىلدىرىپ، ۇيىمداستىرۋشى ازامات رەتىندە شىمكەنتتىك كاسىپكەر توقتار تولەشەۆتى اتاپتى.

«تولەشەۆ مىرزا، نارازىلىق اكتسيالارىن ۇيىمداستىرۋ ارقىلى  بيلىكتى كۇشپەن باسىپ الۋعا باعىتتالعان شاراعا قاتىسى بار ەكەندىگى انىقتالىپتى. سونداي-اق، ول التەرناتيۆتى بيلىك قۇرۋعا ارەكەتتەنگەن»، - دەپ مالىمدەدى قر ۇقك ءباسپاسوز قىزمەتىنىڭ وكىلى رۋسلان كاراسەۆ قر باس پروكۋراتۋراسىندا وتكەن بريفينگتە.

تەرگەۋ ورگاندارىنىڭ مالىمەتتەرىنە جانە كاراسەۆ مىرزانىڭ مالىمدەمەسىنە سۇيەنسەك، كاسىپكەر توقتار تولەشەۆ ەلدە زاڭمەن رۇقسات ەتىلمەگەن ميتينگتەر ۇيىمداستىرۋ جانە ولاردى قارجىلاندىرۋ ارقىلى قازىرگى مەملەكەتتىك باسقارۋ جۇيەسىنە وزگەرىس جاساماق بولىپتى. بولجامدار بويىنشا  تولەشەۆ بيلىكتى باسىپ الۋ وپەراتسياسىن 2015 جىلدىڭ جەلتوقسانىندا جۇزەگە اسىرماق بولعان ەكەن. الايدا  كاسىپكەردىڭ تۇتقىندالۋىنا بايلانىستى بۇل جوسپارى مامىر ايىنا دەيىن شەگەرىلگەن. سونداي-اق، قاماۋداعى تولەشەۆ سارىاعاش قالاسىندا دا جاپپاي تارتىپسىزدىك جانە توڭكەرىس جاساماق بولىپتى.

وسىعان وراي، الماتى جانە استانا قالالارىندا تولەشەۆتىڭ جاقتاستارى ۇستالعان. ولاردىڭ قاتارىندا جەرگىلىكتى باسقارۋ قۇرىلىمدارىندا، لاۋازىمدى قىزمەتتەردەگى ازاماتتار دا بار بولىپ شىقتى. سونىمەن قاتار، تولەشەۆپەن بىرگە بيلىكتى باسىپ الماققا ارەكەتتەندى دەگەن كۇدىككە قر كونستيتۋتسيالىق كەڭەسىنىڭ ەكس-مۇشەسى ءىلياس باقتىباەۆ تا ىلىگىپ، قازىر تۇتقىندالعان.

ءتۇيىن:

سوڭعى 3 اي شەگىندە ۇكىمەتتىڭ جەردى ساتۋ جانە شەتەلدىكتەرگە ۇزاق مەرزىمگە جالعا بەرۋ تۋرالى باستاماسىنا جۇرت نارازىلىق تانىتىپ، بەيبىت شەرۋلەرگە شىقتى. قازاقستاننىڭ «قۇقىق قورعاۋ» ورگاندارى حالىقتىڭ دەموكراتيالىق قۇقىعىن جانشىپ-تاپتاپ، الاڭعا شىققانداردىڭ كەيبىرەۋلەرىن اكىمشىلىك جازاعا تارتتى. ايىپپۇل سالدى، بىرنەشە تاۋلىككە قامادى. وسى كەزدە ەلىمىزدەگى دەزينفورماتسيالىق ساياساتتى ۇستاناتىن كەيبىر باق بەلسەندىلەردىڭ ارتىندا بەلگىسىز ءبىر «بەسىنشى كولوننا» تۇر دەپ شىر-پىر بولدى. "جەر ساتۋعا نارازىلىق تانىتقاندار الدەكىمدەردەن اقشا الىپتى" دەگەندى دە ەستىدىك، «بۇلتارتپاس دالەلدى» كوردىك. ۇكىمەت بەيبىت شەرۋگە شىققان حالىقتان «تەررورشى» ىزدەپ جۇرگەندە، اقتوبەدە اتىس بولدى. بەلگىسىز اعىمداعى ازاماتتار تەراكت جاسادى. 20 ادام زارداپ شەگىپ، بىرنەشە ادام قازا تاپتى. ەندى وسىعان كىنالى كىم؟ حالىقتان قىلمىسكەر جاسايمىن دەپ شاپقىلاپ ءجۇرىپ، ەكستريميستەردى باقىلاۋدان شىعارىپ العان ءىىم مە؟ قىسقاسى، قر ءىىم، باس پروكۋراتۋراسى ەلىمىزدەگى ورىن العان وقيعالارعا ورتاق كىنالىنى بىردەن تاۋىپتى. ول تۇرمەدەگى توقتار تولەشەۆ ەكەن.

كەشەگى اتىراۋداعى حالىقتىڭ دەموكراتيالىق داستۇرمەن وتكىزگەن بەيبىت شەرۋگە دە، 21 مامىر كۇنى الماتىلىق اعايىنداردى الاڭعا جيناعان دا ءدال وسى تولەشەۆ دەپ وتىر قۇزىرلى ورگانداعىلار. سەنسەڭىز دە، سەنبەسەڭىز دە وسى. تولەشەۆ بيلىكتى كۇشپەن باسىم الماق بولىپتى.

نۇرزات توعجان

Abai.kz