تانىمال تەلەجۋرنالسيت،  پروديۋسەر ءلايلا سۇلتانقىزىنىڭ العاشقى كىتابى شىقتى. بۇل ءلايلانىڭ ءبىرىنشى كىتابى بولعانىمەن، كىتاپ "مەنىڭ ەكىنشى كىتابىم" دەپ اتالىپتى.

بۇل كىتاپتا ءومىر ساباقتارى، اۆتوردىڭ بەيمالىم بولىپ كەلگەن قۇپيالارى، ءتۇرلى وي ءتۇيىنى، ايەلدەرگە ارنالعان كەڭەستەر مەن ماڭىزدى ماسەلەلەردىڭ شەشىمدەرى قامتىلعان.  ايەلدىڭ وتباسىنداعى، قوعامداعى ورنى مەن ارەكەتىنە، مىنەز-قۇلقىنا قاتىستى تالداۋلار بار. ءاربىر قالىپتاسىپ كەلە جاتقان قىز بالا دا، ءبىر اۋلەتتىڭ ءتۇتىنىن ءتۇزۋ ۇشىرىپ وتىرعان وتاناسى دا بۇل كىتاپتان ءوز كەرەگىن تابا الادى دەلىنگەن  بۇگىن ساعات 12:00-دە استانا قالاسىنداعى "حان شاتىر" وسو-نىڭ 1-قاباتىندا وتەتىن كىتاپتىڭ تۇساۋكەسەرىنە شاقىرعان اقپاراتتا.

كىتاپ اۋىزەكى سويلەۋ ستيلىندە جازىلعان. مۇنىڭ باستى ەرەكشەلىگى دە سول. ەشقانداي بوياماسىز، تۇزەۋسىز، كۇزەۋسىز-اق تىزبەكتەلگەن ويلار قاز-قالپىندا جەتكىزىلگەن. مىسالدار، وقيعالار دا ءدال سونداي. سوندىقتان كىتاپتى وقۋ وقىرمانعا قىزىقتى عانا ەمەس، جەڭىل بولارى دا ءسوزسىز.

وسى كىتاپتىڭ جارىققا شىعۋىنا سەبەپ بولعان – قازاق ايەلدەرىنىڭ اۆتورعا  ەڭ ءجيى قوياتىن سۇراقتارى مەن كومەك سۇراپ جازاتىن ماسەلەلەرى. ءبىر سوزبەن ايتقاندا، حالىقتىڭ سۇرانىسى. اۆتوردىڭ باستى ماقساتى – ءوز بىلگەنىمەن ءبولىسىپ، ءاربىر ايەلگە دەمەۋ كورسەتۋ جانە ولاردى جىگەرلەندىرۋ. ءبىر قاراعاندا، قاراپايىم كۇندەلىك بولىپ كورىنۋى مۇمكىن. بىراق وقىپ بولعاننان كەيىن كەيبىر كوزقاراسىڭىز وزگەرىپ، ءوز پسيحولوگياڭىزدى زەرتتەپ، ءوز-ءوزىڭىزدى جاقىن تاني باستاۋىڭىز عاجاپ ەمەس.

ءلايلا سۇلتانقىزى: «بۇل كىتاپ مەنىڭ ادەبيەت الەمىنە العاش قادام باسۋىم. وقىرماندارىم مەن قولداۋشىلارىم تابىلادى دەگەن سەنىمدەمىن، سەبەبى ەلىمىزدە قىز-كەلىنشەكتەرگە ارنالعان قازاق تىلىندەگى كىتاپتار وتە از. ال قازاق ايەلدەرىنە ارناپ قازاق تىلىندە جازىلعان كىتاپتار جوقتىڭ قاسى. بۇل كىتاپ قازاق ايەلدەرىنە ارنالىپ، ءبىرتالاي وزەكتى تاقىرىپتاردى قوزعايدى: ايەلدەرگە ارنالعان سان-ءتۇرلى كەڭەستەر، ارتىق سالماق تاستاۋ، دۇرىس تاماقتانۋ، ءومىر قيىنشىلىقتارىن جەڭە ءبىلۋ جانە باسقا دا پايدالى اقپاراتتاردى قامتيدى. ەڭ باستىسى، كىتاپتاعى اقپاراتتىڭ بارلىعى ءوزىمنىڭ باسىمنان وتكەن قيىنشىلىقتار مەن سىناقتاردى قالاي جەڭگەنىم تۋرالى جانە ومىرلىك تاجىريبەمنىڭ نەگىزىندە جازىلعان».

اباي-اقپارات