بىرىڭعاي ۇلتتىق تەستىلەۋگە كەشە  18 599 ۇمىتكەر ءوتىنىش ءبىلدىرىپ  17 934 تالاپكەر قاتىستى. تۇلەكتەردىڭ 13 026-سى قازاق، 4 908-ءى ورىس تىلىندە سىناق تاپسىرىپتى. تەستىلەۋ 44 مەكتەپتە (پۋنكتتە) وتكەن.  

بىرنەشە رەت ءتارتىپ بۇزۋ سەبەبىنەن 4 تۇلەك تەستىلەۋگە قاتىستىرىلماعان. تەست بارىسىندا تيىم سالىنعان 8 522 قۇرال انىقتالدى (2015 جىلى تيىم سالىنعان 7712  قۇرال تاركىلەنگەن بولاتىن).

2015 جىلدىڭ تۇلەكتەرى ورتاشا 79,7 بالل جيناسا، بيىلعى تۇلەكتەردىڭ ورتاشا بالى ازىرشە 83,7 باللدى كورسەتكەن. ءسويتىپ، 2016 جىلى مەكتەپ بىتىرگەن وقۋشىلار بىلتىرعى جىلمەن سالىستىرعاندا ۇبت-عا دايىندىق دەڭگەيىن 4 ەسەگە ارتتىرعانى بايقالدى.

ايتكەنمەندە، 2277 بالا ءتيىستى 50 بالل جيناي الماي قالعان. 50 بالل الماعاندار 2015 جىلى 3478 بولىپتى. كەشە وتكەن ۇبت-دان الماتى قالاسىنداعى ى. التىنسارين اتىنداعى №159 مەكتەپ-گيمنازياسىنىڭ ەكى وقۋشىسى، №12 مەكتەپ-گيمنازياسىنىڭ ءبىر وقۋشىسى ەڭ جوعارعى بالل – 125 بالل الدى. 3834 ۇمىتكەر 100-دەن جوعارى باللعا يە بولعان.

P.S. جوعارىداعى شاعىن ستاتيستيكادان كورىپ وتىرعاندارىڭىزداي، ۇبت-عا قاتىسىپ، باعىن سىناپ جاتقان بالالاردىڭ باسىم كوپشىلىگى قازاق تىلىندە مەكتەپ بىتىرگەن تۇلەكتەر كورىنەدى. ۇكىمەت پەن پارلامەنت وزگە ەلدىڭ مەملەكەتتىك تىلىندە سويلەسە دە، ءتىپتى، بايتاق دالاسىندا ءومىر ءسۇرىپ جاتقان بايىرعى ۇلتتىڭ تالاپ-تىلەگىنە قيعاش زاڭدار قابىلداپ، ارەكەتتەر جاساپ باقسا دا، قازاقشا سويلەيتىن ۇرپاق جاۋقازىنداي جايقالىپ ءوسىپ كەلەدى. جالپى بيىل 121 091 وقۋشى مەكتەپ ءبىتىردى. ونىڭ 83 330-ى تازا قازاق مەكتەبىندە وقىعاندار.  37 762  ۇمىتكەر ورىس جانە وزگە تىلدەردە ءدارىس العاندار. بۇل كورسەتكىشتىڭ ارا سالماعى كەلەسى جىلى تاعى دا وزگەرە ءتۇسۋى مۇمكىن. ايتسە دە، بىراق، ءبىلىم جانە عىلىم ءمينيسترى ەرلان ساعاديەۆ مىرزا قازاق بالاسىن انا تىلىنەن ايىرىپ اعىلشىن جانە ورىس تىلدەرىنە باسىمدىق بەرەتىن مەكتەپ رەفورماسىن قولعا الۋدا. اعىلشىن ءتىلى كەرەك-اق. وعان ەشكىمنىڭ داۋى دا، دامايى دا جوق. بىراق، وسى ەكى ءتىل، اسىرەسە، كورشى ەلدىڭ مەملەكەتتىك ءتىلى - ورىس ءتىلى  نەگە قازاق ءتىلىنىڭ ەسەبىنەن وقىتىلۋى كەرەك؟.. جەر تاعدىرىنا الاڭداپ وتىرعان ەل ءىشىن، مىنە، وسى ماسەلە دە قاتتى تولقىتىپ تۇر.

Abai.kz