كەشە بالالاردى قورعاۋ كۇنى دەپ اتاپ وتتىك قوي. سوندا "كىمنەن قورعايمىز؟" دەگەن سۇراق كوكەيگە كەلەدى ەكەن. سودان الەمنىڭ ءار تۇكپىرىندەگى قورعانسىز، ادامزات قورعاي الماي قالعان بالالار تۋرالى ءبىرشاما وقيعالاردى ىزدەپ، قارادىم. وكىنىشتىسى، اياۋسىزدىق كوپ قوي. سوندا مىنا وقيعا جاندى اۋىرتتى. بىلمەسەڭىزدەر، بىلە جۇرىڭىزدەر، مۇنداي وقيعا ەندى جەر بەتىندە ەشقاشان قايتالانباۋىن تىلەپ جۇرىڭىزدەر، اعايىن. 

ليديتسە - پراگادان (چەحيا) 20 شاقىرىم جەردەگى شاحتەرلار اۋىلى. بۇل اۋىلدى 1942 جىلى نەمىس فاشيستەرى جەرمەن جەكسەن ەتتى. سەبەپ - راينحارد گەيدريح دەگەن بەلسەندى نەمىس ءفاشيسىنىڭ ءولتىرىلۋى، ونى وسى اۋىلدىڭ ادامى ولتىرگەن دەگەن اقپارات. ءسويتىپ، 1942 جىلى 10 ماۋسىمدا ليديتسەنىڭ ەر ادامدارىن (15 جاستان ۇلكەن) تۇگەل (172 الدە 173) اۋىل سىرتىندا اتىپ تاستايدى. ال ايەلدەر مەن بالالاردى ءبىراز كۇن اۋىل مەكتەبىندە قاماپ ۇستايدى. سوسىن بارلىق 203 قىز-كەلىنشەكتى گەرمانياداعى كونتسلاگەرگە اكەتەدى. ال بالالاردى پولشاعا اپارىپ، "سورتتايدى". بارلىعى 105 بالا بولاتىن. ونىڭ 23-ءىن گەرمانيزاتسيالاۋعا لايىق دەپ، ارنايى ناتسيستتىك وتباسىلارىنا تاپسىرادى. ال، 82 بالانى حەلمنوداعى كونتسلاگەرگە جىبەرگەن. ولاردى گازدى كامەرا كۇتىپ تۇر ەدى. جازىقسىز بالالار 1942 جىلدىڭ 10 شىلدەسىندە ۋلانىپ ءولتىرىلدى. سۇمدىق! 

بۇل جايعا ەش بەلگىسىز، ەسكەرتۋسىز قالدىرعىسى كەلمەگەن ءمۇسىنشى ماريا ۋحيتەلوۆا ارنايى ەسكەرتكىش ورناتۋدى ويلايدى. 1969 جىلدان بالالاردىڭ مۇسىندەرىن قولادان تۇرعىزا باستايدى. بىراق، ءتۇرلى سەبەپتەرگە (قارجىلىق) بايلانىستى بارلىق 82 بالانىڭ ءمۇسىنىن دەر كەزىندە سالا المايدى. ونداعان جىلدارعا سوزىلادى... 1989 جىلى ءمۇسىنشى ماريا قايتىس بولىپ، ونىڭ جۇمىسىن قىزى مەن كۇيەۋى جالعايدى. ەڭ سوڭعى بالا ءمۇسىندى 2000 جىلى اياقتايدى. 
وسىلايشا، قانىشەرلىكپەن ولتىرىلگەن ليديتسەلىك 82 بالا تۋعان اۋىلدارىنا قايتا "قولا ءمۇسىن" بوپ ورالدى...

قارلىعاش دوسانوۆا

Facebook-تەگى پاراقشاسىنان