ماسكەۋ قالاسىنىڭ كينو ۇيىندە قازاقستان رەسپۋبليكاسى تۇڭعىش پرەزيدەنتىنىڭ ومىرلىك جولى تۋرالى باياندايتىن «كوشباسشى جولى» كينوەپوپەياسنىڭ بەسىنشى ءبولىمى بولىپ تابىلاتىن سەرگەي سنەجكيننىڭ «جۇلدىزدار توعىسقاندا» كوركەم ءفيلمىنىڭ تۇساۋكەسەرى ءوتتى، - دەپ حابارلايدى قر مادەنيەت جانە سپورت مينيسترلىگىنىڭ ءباسپاسوز قىمەتى.

 جاڭا كينو تۋىندىنىڭ العاشقى رەسەيلىك كورەرمەندەرىنىڭ اراسىندا تانىمال ساياساتكەرلەر، قوعام قايراتكەرلەرى، مادەنيەت جانە ونەر سالاسىنىڭ وكىلدەرى، رەسەي كينوسىنىڭ شەبەرلەرى، جوعارى وقۋ ورىندارىنىڭ وقىتۋشىلارى جانە ستۋدەنتتەرى، سونىڭ ىشىندە قازاقستاندىق ستۋدەنتتەر بولعان. 

فيلم تۇساۋكەسەرى بارىسىندا قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەديۇلى مەن رەسەي كينەماتوگرافيستەرى وداعىنىڭ توراعاسى نيكيتا ميحالكوۆتىڭ جانە فيلم رەجيسسەرى سەرگەي سنەجكين باستاعان ءتۇسۋرۋ توبى مەن  اكتەرلەر بەرىك ايتجانوۆ، يگور ۋگولنيكوۆ جانە ت.ب. قاتىسۋىمەن ءباسپاسوز-كونفەرەنتسياسى ءوتتى.

رەجيسسەر سەرگەي سنەجكين رەسەي كورەرمەندەرىنە قازاقستاننىڭ تۇڭعىش پرەزيدەنتى تۋرالى كينوتۋىندىنىڭ بەسىنشى ءبولىمىن ءتۇسىرۋ جۇمىسى تۋرالى بايانداپ بەرگەن.

- بۇل فيلم ءۇش ساعاتقا سوزىلعان ۇلكەن ەپيكالىق تۋىندى. بۇل كوپقاباتتى، كۇردەلى شىعارمانى ءبىز ورىس-قازاق-نەمىس-كورەي ۇجىمى بولىپ، امەريكالىق، اعىلشىن، قىتاي جانە اراب اكتەرلەرىنىڭ كومەگىمەن ەكى جىلعا جۋىق ۋاقىت بويى تۇسىردىك. بۇل جۇمىس ءبىزدىڭ ماقتانىشىمىز. 26 ساۋىردە استانادا وتكەن تۇساۋكەسەر ءراسىمى مەنى قاتتى قۋانتتى، ويتكەنى قازاقستاندىق كورەرمەندەر تۋىندىنى وتە جىلى، قىزىعۋشىلىق تانىتا وتىرىپ، تاماشا قارسى الدى. ءبىزدىڭ ەڭبەگىمىز زايا بولماي، قازاق حالقىنىڭ جۇرەگىنەن ءوز ورنىن تاپتى دەگەن ءسوز. مەنىڭ اقپاراتىم بويىنشا، فيلم كورەرمەندەر تاراپىنان ۇلكەن قىزىعۋشىلىق شاقىرىپ، قازاقستاندا قىزۋ تالقىلانىپ جاتىر. ياعني كوركەم فيلم ەشكىمدى دە سەلقول كوزقاراستا قالدىرمايدى، - دەدى سەرگەي سنەجكين.

- بۇل جۇمىس مەنىڭ قازاقستانعا، ونىڭ حالقى مەن پرەزيدەنتىنە دەگەن ىستىق سەزىمدەرىمنىڭ دالەلى بولىپ تابىلادى. ءفيلمنىڭ باستى ماقساتى – قازاق تۋرالى اڭىز جاساۋ، قازاقتىڭ كوركەم وبرازىن مەن مىنەز-قۇلقىن سۋرەتتەۋ بولىپ تابىلادى. جانە ءدال وسى جاعدايدا ءبىز العان قازاقتىڭ بۇگىندە قىزمەت ەتىپ جاتقان مىنەزى تاڭقالارلىقتاي تەرەڭ، سانقىرلى، ۇلگى الارلىقتاي ناقتى تۇلعا ەكەندىگى ءبىز ءۇشىن ۇلكەن ساتتىلىك. نۇرسۇلتان ءابىشۇلى – نيەتى اق جانە وتە ادال ادام، - دەيدى رەجيسسەر. ول «جۇلدىزدار توعىسقاندا» كوركەم ءفيلمىنىڭ ءتورت بولىمنەن تۇراتىن كەڭەيتىلگەن تەلەۆيزيالىق نۇسقاسى دا جارىق كورەتىندىگىن ايتتى.

باستى ءرولدى سومداعان بەرىك ايتجانوۆ تۋىندىنى ءتۇسىرۋ جۇمىسى بارىسىندا وتە قاتتى تولقىعاندىعى تۋرالى ءسوز ەتتى.

- نۇرسۇلتان ءابىشۇلى نازارباەۆ ءرولىن سومداۋ – مەن ءۇشىن ۇلكەن مارتەبە جانە ۇلكەن جاۋاپكەرشىلىك بولدى. بۇكىل ءتۇسىرۋ توبىن، سونىڭ ىشىندە ءبىزدىڭ اكتەرلەرىمىزدىڭ جاڭا مۇمكىندىكتەرىن اشقان سەرگەي ولەگوۆيچ سنەجكينگە زور العىسىمدى بىلدىرەمىن. مەن ءۇشىن ۇلت كوشباسىن ويناۋ ۇلكەن مارتەبە ەكەندىگىن قايتالاپ ايتقىم كەلەدى. ناتيجەنىڭ قانشالىقتى جاقسى بولىپ شىققاندىعىن بىلمەيمىن،  الايدا ءبىز قولىمىزدان كەلگەننىڭ بارلىعىن ىستەۋگە تىرىسىپ باقتىق،-دەيدى اكتەر.

جۋرناليستەردىڭ سۇراقتارىنا جاۋاپ بەرۋ بارىسىندا ارىستانبەك مۇحامەديۇلى «كوشباسشى جولى» كينوتۋىندىسىنىڭ 1996 جىلى قازاقستاننىڭ جاڭا ەلورداسىن – استانا قالاسىن سالۋعا ارنالاتىن التىنشى ءبولىمىن ءتۇسىرۋ جوسپارلارىمەن ءبولىستى.

«جۇلدىزدار توعىسقاندا» كوركەم ءفيلمى – قازاقستان رەسپۋبليكاسى تۇڭعىش پرەزيدەنتى نۇرسۇلتان نازارباەۆتىڭ ومىرلىك جولى تۋرالى «كوشباسشى جولى» كينوەپوپەياسنىڭ بەسىنشى ءبولىمى. بۇعان دەيىن بولاشاق كوشباسشىنىڭ بالالىق، ءجاسوسپىرىم جانە جاستىق كەزى تۋرالى «بالالىق شاعىمنىڭ اسپانى»، «وت وزەن»، «تەمىرتاۋ» جانە «تىعىرىقتان جول تاپقان» اتتى رۇستەم ابدىراشەۆتىڭ فيلمدەرى جارىق كوردى.

بەسىنشى ءبولىمنىڭ تۇسىرىلىمدەرى 2015 جىلدىڭ ماۋسىم ايى مەن 2016 جىلدىڭ قاڭتارى ارالىعىندا جۇرگىزىلدى. ءفيلمنىڭ نەگىزگى وقيعالارىنىڭ ءبىرى – 1989 جىلى ورىن العان شاحتەرلەر بۇلىگى – قاراعاندىدا تۇسىرىلسە، استانا ماڭىندا گورباچەۆتىڭ استىق دالاسىنا كەلۋى ءتۇسىرىلدى. قىزىقتى اقپارات: 1986 جىلعى الماتى قالاسىنداعى جەلتوقسان وقيعاسى قىسقى سانكت-پەتەربۋرگتە تۇسىرىلگەن بولاتىن. بۇل ەپيزودتى تۇسىرۋگە 600-دەن استام ادام قاتىستى.

ايسۇلۋ تۇرسىنباەۆا

Abai.kz