وڭتۇستىك قازاقستان وبلىسى اكىمى بەيبىت باكىرۇلى اتامقۇلوۆتىڭ توراعالىعىمەن كەڭەيتىلگەن اپپاراتتىق ءماجىلىس ءوتتى. اۋدان، قالا اكىمدەرىمەن سەلەكتورلىق رەجيمدە وتكەن جيىندا 6 ماسەلە قارالدى. بۇل تۋرالى «اباي اقپارات» وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

جيىندا ۇكىمەتتىڭ 2016 جىلعى 9 قىركۇيەكتەگى كەڭەيتىلگەن ماجىلىسىندە مەملەكەت باسشىسى تاراپىنان بەرىلگەن بىرقاتار تاپسىرمالاردىڭ ورىندالۋى  بويىنشا اتقارىلعان جۇمىستار تالقىلاندى.

قازاقستاندا الداعى بەس جىلدا اينالىمعا كەم دەگەندە 600 مىڭ گەكتار سۋارمالى جەر قوسىلادى. سۋ قورىنىڭ تالاپ ەتىلەتىن كولەمى توتەنشە جوندەۋ جانە جاڭا سۋ قويمالارىن سالۋ ەسەبىنەن قۇرىلادى. وسى رەتتە ايماق باسشىسى ەگىستىكتى اعىن سۋمەن تولىق قامتاماسىز ەتۋ ءۇشىن وبلىستىق اۋىل شارۋاشىلىعى باسقارماسىنا اۋدان اكىمدىكتەرىمەن بىرلەسە وتىرىپ سۋ قويمالارىن سالۋدىڭ جوسپارىن ازىرلەۋدى تاپسىردى.

─ ەگىستىك القاپتاردى سۋلاندىرۋ ماسەلەسىن شەشۋدە سۋ قويمالارىن سالۋدىڭ ماڭىزى ايرىقشا. بۇگىندە ۇلكەن سۋ قويماسى بايدىبەك پەن وتىرار اۋدانىندا سالىنىپ جاتىر. بيىل ونىڭ قۇرىلىسى اياقتالۋى ءتيىس. وبلىستىق باسقارما بارلىق اۋدانداردا وسىنداي مۇمكىندىكتەردى زەرتتەپ، جوسپار ازىرلەۋى ءتيىس، ─  دەدى وبلىس اكىمى بەيبىت باكىرۇلى اتامقۇلوۆ. 

اباي اقپارات