ادىلدىك ىزدەپ شارق ۇرعان ايمان ساعيدۋللا سوتتا جەڭىسكە جەتتى. مۇعالىمدەردىڭ قۇقىعىن قورعاپ، مەكتەپتەردەگى زاڭسىزدىقتارمەن قايمىقپاي كۇرەسىپ جۇرگەن باتىر قىز ءوزى قىزمەت ەتەتىن مەكتەپ ديرەكتورىن سوتقا بەرىپ، وزىنە نەگىزسىز «كۇشتەپ» تاعىلعان ەسكەرتۋدىڭ زاڭسىز ەكەنىن دالەلدەدى. مۇنى ارينە، ءبىر عانا مۇعالىمنىڭ ماسەلەسى دەپ قاراۋعا بولمايدى. بۇل ءبىزدىڭ دەموكراتيالى قوعامدا ەشكىمگە جالتاقتاماي ءوز قۇقىعى ءۇشىن كۇرەسەتىن ەركىن ويلى ۇستازداردىڭ پايدا بولا باستاعانىن كورسەتەدى. ايمان سەڭدى قوزعادى. ەندى بۇكىل قازاقستاندا «ايمانشىلدار»، ياعني ايمان سەكىلدى شىندىقتى تۋ ەتەر ۇستازدار كوبەيەدى. ول ۇستازدار جاعىمپاز، جالتاقتاردى ەمەس، شىنشىل، ادىلەتتى ۇرپاق تاربيەلەيتىن بولادى.

ايمان ساعيدۋللا وقۋشىلاردان اقشا جيناۋ، كونتسەرتتەرگە بيلەت ساتۋ، مۇعالىمدەردى قوعامدىق جۇمىستارعا جەگۋ سەكىلدى ماسەلەلەرگە قارسىلىق تانتىتىپ، ءوز ويىن اۋدان دەڭگەيىندە عانا ەمەس، رەسپۋبليكا كولەمىندە جەتكىزە ءبىلدى. ەلىمىزدەگى ءتۇرلى ساياسي وقيعالار كەزىندە دە بەلسەندىلىك تانىتىپ، كوزقاراسىن اشىق ءبىلدىرىپ ءجۇردى. ارينە، مەملەكەتتىك مەكەمەدە قىزمەت ەتە ءجۇرىپ، سول جۇيەگە قارسىلىق ءبىلدىرۋ – اعىسقا قارسى جۇزگەنمەن بىردەي. ايمان العان بەتتەن قايتپادى. (وسى ورايدا ايتا كەتەيىك.  ايمان ساعيدۋللا ءبىر ءىستى باستاماس بۇرىن ەڭ الدىمەن ءبىزدىڭ پورتالعا حابارلاسىپ، پىكىرىمىزدى سۇرايتىن. وعان سەبەپ ەڭ العاشقى ماقالاسى ءبىزدىڭ سايتتا جاريالانعاندىعى بولار. ايتەۋىر كەزدەسە قالساق، «Abai.kz مەنىڭ قورعانىم عوي» دەپ ازىلدەيتىنى بار).

وسى قىزىمىز مامىر ايىنىڭ 19-كۇنى بىزگە حابارلاسىپ، ءوزىن زاڭسىز جينالىسقا سالعانىن ايتقان ەدى. ءبىز دەرەۋ «قاراسايلىق اقساقالدار ۇستازعا قىسىم كورسەتتى» دەگەن ماقالا جاريالادىق. وسى اقساقالداردىڭ «قىسىمى» ۇستازعا «پەدوگوگيكالىق ەتيكانى ساقتامادى» دەگەن ايىپ تاعۋعا نەگىز بولىپ، ايمان سوتتىڭ الدىنان ءبىر-اق شىققان-دى.  

بۇگىن مىنە، ايماندى جەڭىسىمەن قۇتتىقتاماق بولىپ حابارلاسىپ ەدىك ول: «مەنىڭ جەڭىسىم – قازاقستان رەسپۋبليكاسىنىڭ اتا زاڭىنىڭ جەڭىسى. زاڭسىزدىققا جول بەرمەۋ ءۇشىن ءبىز ءاردايىم دا ءوز قۇقىعىمىزدى كونستيتۋتسيا شەڭبەرىندە قورعاۋىمىز قاجەت. سونىمەن قاتار بۇل جەڭىس Abai.kz پورتالىنىڭ جانە ماعان جاناشىرلىق تانىتقان بۇكىل قازاقتىڭ، قازاق ءباسپاسوزىنىڭ  جەڭىسى عوي» دەدى.

پۋبليتسيست ءابدىراشيت باكىرۇلى اعامىز Abai.kz اقپاراتتىق پورتالىنا جازعان «ايمان ساعيدۋللا فەنومەنى» دەگەن ماقالاسىندا «بارلىق جەردە شىندىقتى اشىپ ايتاتىن كەز كەلدى. ەلباسىنىڭ ءوزى ونى قولداپ وتىر. سوندىقتان "ۇستاز" اتى بار بىلىكتى مۇعالىمدەر ەندى بۇرىنعىداي ديرەكتورىنىڭ الدىندا جاسقانشاقتاي بەرمەگەنى دۇرىس» دەگەن ەدى. كورىپ وتىرعانىمىزداي مىنە، زاڭنىڭ تۋرالىعى، زاڭدى باسشىلىققا العان سوتتىڭ ءادىل شەشىمى ايماندى الىمجەتتىكتەن اراشالاپ قالدى، مەرەيىن ۇستەم ەتتى.

جارايسىڭ، ايمان!

سەن بۇگىنگى ءار  مۇعالىمگە ۇلگىسىڭ!

سەنىڭ ارتىڭنان ەرەر، شىنشىل ۇستازدار كوبەيە بەرسىن!

قانات بىرلىكۇلى

Abai.kz