78 جاستاعى وزبەكستان پرەزيدەنتى يسلام ابدىعانيۇلى كاريموۆ دۇنيە سالدى، دەپ حابارلايدى وزبەكستاندىق "fergananews.com" پورتالى.

اتالعان سايتتىڭ دەرەكتەرىنە سۇيەنسەك، وزبەك پرەزيدەنتى يسلام كاريموۆ تامىزدىڭ 29-كۇنى اۋرۋحانا توسەگىندە  قايتىس بولعان.

"Fergananews.com"اگەنتتىگىنىڭ باس رەداكتورى دانيل كيسلوۆ رەسەيلىك "Life.ru" پورتالىنا سۇحبات بەرىپ، وزبەكستان پرەزيدەنتىنىڭ قازاسى تۋرالى حابارلاعان.

"يسلام كاريموۆ قايتىس بولدى. مۇنى ءبىز عانا بىلەمىز. رەسمي ارنالار كاريموۆتىڭ قازاسى تۋرالى حابار تاراتپاي وتىر. سەبەبى،  مۇنداي اقپاراتتار اشىق تاراتىلمايدى. ءبىز وزبەكستاندا 15 جىلدان استام ۋاقىت قىزمەت ەتىپ كەلەمىز. پرەزيدەنتتىڭ قازاسى تۇرماق، ونىڭ دەنساۋلىعىنا قاتىستى قانداي دا ءبىر مالىمەتتى الۋ مۇمكىن ەمەس ەكەندىگىن جاقسى بىلەمىز",-دەيدى كيسلوۆ.

ال "interfax.ru" حابارلاۋىنشا، وزبەكستان پرەزيدەنتىنىڭ اپپاراتى يسلام كاريموۆتىڭ قازاسى تۋرالى اقپاراتتى تەرىسكە شىعارعان. 

"يسلام كاريموۆ قازىر اۋرۋحانادا، دارىگەرلەردىڭ باقىلاۋىندا. دارىگەرلەر ونىڭ دەنساۋلىعى قالىپتى ەكەنىن ايتتى",-دەلىنگەن رەسمي مالىمدەمەدە.

دەسە دە رەسەيلىك باق-تىڭ مالىمەتتەرىنە سۇيەنسەك، وزبەكستاننىڭ رەسەيدەگى ەلشىلىگى پرەزيدەنتتىڭ ءتىرى نەمەسە ءولى ەكەنى تۋرالى قانداي دا ءبىر اقپاراتتىڭ جوق ەكەنىن ايتقان.

ء"بىز بىلمەيمىز. قازىر ونىڭ دەنساۋلىعى جاقسى نەمەسە جامان دەپ ەشتەڭە ايتا المايمىز",-دەپتى.

سونداي-اق، "Human Rights Watch" ۇيىمىنىڭ ورتالىق ازياداعى ءبولىمىنىڭ وكىلى ستيۆ سۆەردلوۆ "تۆيتتەردەگى" جەكە پاراقشاسىندا وزبەك پرەزيدەنتىنىڭ قايتىس بولعاندىعى تۋرالى قۇقىق قورعاۋ قىزمەتكەرلەرىنە حابارلانعانىن جازادى.

يسلام كاريموۆ 1938 جىلى 30-قاڭتاردا سامارقاندا دۇنيەگە كەلگەن. ورتاازيالىق پوليتەحنيكالىق ينستيتۋتتى ءتامامداپ، 1964 جىلى كوكپ قاتارىنا قوسىلعان. 1989 جىلدان بەرى وزبەكستان كومپارتياسى ورتالىق كوميتەتىنىڭ ءبىرىنشى حاتشىسى بولدى.

1990 جىلى 24 ناۋرىزدا وزبەك كسر جوعارعى كڭەسىنىڭ سەسسياسىندا  وزبەك كسر پرەزيدەنتى بولىپ سايلاندى. ال كەڭەستەر وداعى ىدىراعاننان بەرى وزبەكستان رەسپۋبليكاسىنىڭ پرەزيدەنتى بولىپ كەلدى. ول 24 جىل ۇزدىكسىز ەل باسقاردى.

ەكى بىردەي قىزى گۇلنارا مەن لولا كاريموۆالار وزبەكستان تۇگىلى وا ەلدەرى جۇرتشىلىعىنا ەتەنە تانىس بولىپ ۇلگەرگەن. ال دۇيسەنبى كۇنى كاريموۆتىڭ كىشى قىزى لولا كاريموۆا-تيلياەۆا اكەسىنىڭ ينسۋلت الىپ، جانساقتاۋ بولىمىنە تۇسكەنىن حابارلاعان ەدى.

نۇرگەلدى ابدىعانيۇلى

Abai.kz