(سۋرەت «Kapital.kz» پورتالىنان الىندى)

جاقىندا قازاقستاننىڭ اقپارات كەڭىستىگىندەگى بىرقاتار ينتەرنەت باق باسشىلارى مەن باس رەداكتورلارى اۆتورلىق قۇقىقتى قورعايتىن ءام كونتەنت ۇرلىعىنا قارسى ۇجىمدىق كەلىسىمگە قول قويىپ، كواليتسيا قۇردى. باق-تاعى بارىمتاشىلارعا قارسى كۇش بىرىكتىرۋ ءراسىمى الماتىداعى «دوستىق ۇيىندە» ءوتتى. وعان «Abai.kz» پورتالى باستاعان 13 سايتتىڭ رەداكتورى قاتىستى. سونداي-اق، ۇجىمدىق كەلىسىمگە قول قويۋ جيىنىن قر اقپارات جانە كوممۋنيكاتسيالار مينيسترلىگى تىكەلەي ەفيردە باقىلاپ وتىردى.

سونىمەن، ۇجىمدىق كەلىسىمگە كەلۋدىڭ نەگىزگى سەبەبى – ينتەرنەت باق-تا ءجيى ورىن الاتىن اۆتورلىق قۇقىقتىڭ بۇزىلۋى، كونتەنت ۇرلىعى، اۆتورلىق كونتەنتتىڭ ءجيى بارىمتالانۋى بولدى.

قازاقستاننىڭ اقپارات كەڭىستىگىندەگى اقپاراتتىق سايتتاردا اۆتورلىق كونتەنتتىڭ رۇقساتسىز الىنۋى، دەرەككوزدەرىنىڭ كورسەتىلمەۋى قالىپتى جاعدايعا اينالىپ كەتكەنى جاسىرىن ەمەس.

ونىڭ جارقىن ءبىر كورىنىسى – «Defacto.kz» پورتالى مەن «Nur.kz» اراسىنداعى سوت پروتسەسسى. سولتۇستىك قازاقستاندىق  «Defacto.kz» پورتالى اۆتورلىق ماتەريالدارىن ۇرلادى دەپ «Nur.kz» پورتالىن سوتقا بەرگەن ەدى. 5 جىلدىڭ ىشىندە 542 اۆتورلىق ماتەريالدى دەرەككوزىن كورسەتپەستەن جىمقىرىپ كەتتى دەگەن شاعىمدانۋشى تاراپتىڭ ارىزىن سوت توراعاسى قاناعاتتاندىرماعان ەدى. سويتسە، اتالعان باسىلىم ۇرلانعان ماتەريالداردى جاريالاۋدان ەشبىر پايدا تاپپاپتى-مىس.

مۇنداي مىسالداردى كوپتەپ كەلتىرۋگە بولادى، ارينە. دەسە دە ۇجىمدىق كەلىسىمگە كەلۋدىڭ جالعىز سەبەبى ءبىر بۇل ەمەس. اقپاراتتىق كەڭىستىكتەگى ونلاين باق-تاردىڭ جالعان رەيتينگ ۇيىمداستىرۋى دا كولدەنەڭ  كەدەرگىلەر تۋدىرۋدا.

(سۋرەت «Kapital.kz» پورتالىنان الىندى)

بەكجان ىدىرىسوۆ، «radiotochka.kz» پورتالىنىڭ باس رەداكتورى:

-ءبىز ۇجىمدىق كەلىسىمگە قول قويۋعا وزگە دە ارىپتەستەرىمىزدى شاقىردىق. الايدا بەلگىلى، بەلگىسىز سەبەپتەرمەن ولار مۇندا كەلە المادى. وسىندا وتىرعان ارىپتەستەرىمنىڭ بارلىعى دا وسىنداي جاعدايدى باستارىنان وتكىزگەن. الايدا ەشقانداي ەففەكت بولمادى. سوندىقتان ءبىز ۇرلىقشى سايتتارمەن وسىلايشا كۇرەسۋدى ءجون دەپ تاپتىق. بۇل يدەيا ءبىر جىل بۇرىن قولعا الىنعان ەدى.

(سۋرەت «Kapital.kz» پورتالىنان الىندى)

شاۆكات سابيروۆ، قازاقستاننىڭ ينتەرنەت اسسوتسياتسياسى، RadioMM.kz پورتالىنىڭ ديرەكتورى:   

-جوعارىداعى جايتتاردان كەيىن تۇيگەنىمىز جالعىز: اگرەگاتورلار وزدەرىنىڭ قۇقىقتارى ءۇشىن كۇرەسەدى. بىرەۋدىڭ ماتەريالدارىن ۇرلاعانىمەن قويماي، ودان تۇسكەن بيۋدجەتتى نەمەسە ترافيكتى بولىسكە سالعىسى كەلمەيدى.

راسىندا ءبىزدىڭ اقپاراتتىق كەڭىستىكتە اگرەگاتورلار كوپ. وزدەرى كونتەنت جاسامايدى. وزگەنىڭ ەڭبەگىن پايدالانىپ وتىر. سوراقىسى سول، كەي سايتتار دەرەككوزىن كورسەتپەيدى دە. بۇل دەگەنىڭىز – بىرەۋلەر ۋاقىت جۇمساپ، كوز مايىن تاۋسىپ ەڭبەكتەنەدى دە، بىرەۋلەرى دايىنعا يە بولىپ،  سودان قىرۋار پايدا تاۋىپ وتىرا بەرەدى دەگەن ءسوز. وعان قوسا مينيسترلىكتەر جاريالايتىن تەندەر ءۇشىن جالعان رەيتينگ جاساپ، ءتۇرلى الاياقتىققا بارىپ جاتاتىن باق-تار دا از ەمەس. مىسالى، پورنوترافيكتەر ارقىلى، ءتۇرلى الەۋمەتتىك جەلىلەر ارقىلى ت.س.س. رەيتينگ جاساۋ ناۋقانى باستالىپ كەتكەلى قاشان. سونداي-اق، جۋرناليستيكا ەتيكاسىنىڭ ورەسكەل بۇزىلۋى تاعى بار. مۇنىمەن كۇرەسۋدىڭ جالعىز جولى – ۇجىمدىق كەلىسىم بولىپ تابىلادى. اقپارات مينيسترلىگىنىڭ ونلاين باقىلاۋىمەن وتكەن جيىندا وسى جانە وزگە دە ماسەلەلەر تالقىلاندى.

ال قازىرگى تاڭدا اتالعان كەلىسىمگە قول قويعان 13 سايتتىڭ رەداكتورلارى ينتەرنەتتەگى پلاگياتشىلارمەن بىرلەسىپ كۇرەسۋگە كەلىستى.

ۇجىمدىق كەلىسىمگە قول قويعاندار:

Abai.kz

Radiotochka.kz

Kapital.kz

Informburo.kz

گازەتا «ۆرەميا»

RadioMM.kz

گازەتا Central Asia Monitor

Szh.kz

JasQazaq.kz

KazakhstanToday Media Group (KT.kz)

الداعى ۋاقىتتا «Zonakz.net»، «Defacto.kz» جانە «كاراۆان» گازەتتەرى كولاليتسياعا قوسىلۋعا نيەت ءبىلدىردى.

نۇرگەلدى ابدىعانيۇلى

Abai.kz