وزبەك ميگرانتىنىڭ ازاتتىق راديوسىنا حابارلاۋىنشا، وتكەن سەنبى كۇنى وزبەكتەر جۇمىس ىستەيتىن كافەگە ۋچاسكەلىپ ينسپەكتور كەلىپ، ءوزىن تانىستىرماستان ەڭبەك ميگرانتتارىنىڭ قۇجاتتارىن تەكسەرە باستاعان. قۇجاتتاردان ەشقانداي زاڭ بۇزۋشىلىق تاپپاعان ول پارا سۇراعان. تالابى ورىندالماعان سوڭ، ول وزبەكستاننىڭ بەس ازاماتىن ميتينو اۋداندىق پوليتسيا بولىمشەسىنە الىپ بارعان.

بولىمشەدە ولاردى ەشقانداي نەگىزسىز ەكى تاۋلىك ۇستاعان. ميگرانتتىڭ ايتۋىنشا، ەكى كۇن بويى ولارعا تاماق بەرمەگەن، ەكى مارتە عانا اجەتحاناعا شىعۋعا رۇقسات ەتكەن. دۇيسەنبى كۇنى تاڭەرتەڭ بەس وزبەك اسپازىن تۋشينسك اۋداندىق سوتىنا اپارعان.

كافە قوجايىندارىنىڭ ءبىرى حالىقارالىق كوممەرتسيالىق ەمەس "تونگ جاحوني" ۇيىمىنا كومەك سۇراپ بارعان. ۇيىم جەتەكشىسى ۆالەنتينا چۋپيك تۋشينسك اۋداندىق سوتىنا بارىپ، ميگرانتتاردى زاڭسىز ۇستاعان پوليتسيا ارەكەتى تۋرالى سۋدياعا جەتكىزدى.

"سوعان قاراماستان، سۋديا ولاردى ەلدەن شىعارۋ تۋرالى ۇكىمىن وقي بەردى. رەسەيدىڭ ادام قۇقىقتارى جونىندەگى ۋاكىلى اندرەي بابۋشكينگە حابارلاسقان سوڭ عانا، ولار ميگرانتتاردى بوساتتى", - دەدى ۆالەنتينا چۋپيك.