بىزدە قوعامنىڭ ويىنان شىعاتىن جاڭالىقتار مەن زاڭدىلىقتار ايتىلعانىمەن، ولاردىڭ كوپشىلىگى، جەرگىلىكتى جەرلەردە جۇزەگە اسىرىلىپ جاتقان جوق.

جىل سايىن مىڭداعان جاستارىمىز جوعارعى وقۋ ورىندارىن بىتىرگەنىمەن، ءوز ماماندىعى بويىنشا جۇمىس تابا الماي، بوسىپ ءجۇر. ال، سوڭعى كەزدە بارىپ قايتقان 8 اۋداننىڭ بىلدەي مەكەمەلەرىندە زەينەتكەرلىك جاسقا تولىپ كەتكەندەر، ءالى كۇنگە دەيىن تالتايىپ وتىر. وتىر دەيمىز-اۋ، تۋما-تۋىس، قۇدا، تامىر-تانىستىقتىڭ ارقاسىندا وتىرعان ورىندىقتارىنا ريزا بولىپ وتىر. مامان، بىلىكتىلىك، تالاپتىڭ بارلىعى دەرلىك، قاجەتى جوق جورامالعا اينالعان. مەملەكەتتىك قىزمەت ورىندارى، زەينەتكەرلىگىنە قوسا، ايلىعىن بەرىپ، سىي-سىيپات كورسەتۋگە، ارنالعان پاراعا اينالدى دەسەك، ۇستىنە ءدوپ تۇسەمىز. 

مەملەكەتتىك قىزمەت پەن بيۋدجەتتەن جالاقى الاتىن زەينەتكەرلەر، كەلىسىم شارت دەگەن قۋلىقپەن، ۋاقىتشا شارتقا وتىرىپ، سايران قۇرىپ جاتىر. قوعامنان، بولاشاعىن بولدىرا الماي جۇرگەن جاستارىمىزدان قىسىلۋدى بىلمەيدى. سەبەبى، ولاردىڭ بويىندا ۇياتتى سەزىنەتىن بىردە-ءبىر سەزىم ەتى قالماعان. ەگەر مامانى جوق، الشاقتا جاتقان ەلدى مەكەندەر بولسا، كەلىسۋگە بولار ەدى.

بىلدەي مەكەمەلەردى ماماندىعى كەلمەيتىن، ءتۇرلى سەبەپتەرمەن مەملەكەتتىك قىزمەتتەن بوساتىلعان اپەرباقاندار باسقارىپ جاتىر.

ماسەلەن، اۋداندىق «قازپوشتا» مەكەمەسىن الايىق. مەكەمە ەكىنشى دەڭگەيدەگى بانك قۇزىرەتىن الا تۇرا، ول مەكەمەلەر، ينجەنەر، زووتەحنيك تارىزدەس مامانداردىڭ ەرمەگىنە بەرىلىپ قويىلعان. الدە بۇل مەكەمەلەردىڭ باسشىلىقتارىنا قويىلاتىن بىلىكتىلىك تالابىنا جوعارعى ءبىلىم بولسا جاراپ جاتىر ما؟ بانكىدە قاپتاپ جۇمىس جاساپ جاتقان قارجىگەر مامانداردى، قوي مەن تەمىر مامانى باسقارۋعا بولاتىن بولسا، "وندا بالالارىمىزدى ءبىز نەگە سول ماماندىققا وقىتپادىق" دەگەن جايدى ايتۋشىلار كوپ.

بۇل، مەكەمە جالعىز ەمەس. قوماقى قارجىسى بار، جاۋاپكەرشىلىگى مەن بۇگىنگى اتالاپ تۇرعان احۋالدى جايلارى شاش ەتەكتەن اساتىن مەملەكەتتىك مەكەمەلەردىڭ كوپشىلىگىن، زووتەحنيك، ينجەنەر، مۇعالىمدەر باسقارىپ وتىر.

ەلباسى مەن ۇكىمەتتىڭ قويىپ وتىرعان تالاپتارىن، جەرگىلىكتى جەردە  قاداعاپ، تالاپ ەتۋ، قاشان قولعا الىنادى؟ اۋدان ورتالىقتارىنداعى جاۋاپتى ورىنداردىڭ بارلىعى دەرلىك، اركىمنىڭ مازاعىنا اينالعان. بۇل قيسىنسىز جايلار تەز ارادا جويىلماسا، ەل اراسىنداعى نارازىلىق وتقا اينالماسىنا كىم كەپىلدىك بەرەدى؟ زاڭدىلىقتى قاداعالاۋ ورىندارى بۇل جايلارعا قاتاڭ شەكتەۋ قويىپ، ورىن العان زاڭ بۇزۋشىلىقتى جەدەل توقتاتپاسا، ەتەك جايعان جۇگەنسىزدىك شەكتەن شىعىپ بارا جاتىر.

ابدىمالىك ورىنباساروۆ 

Abai.kz