ء«تىلدارىن»

رەسپۋبليكالىق وليمپياداسىنىڭ

ەرەجەسى

قازاقستان رەسپۋبليكاسى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى (بۇدان ءارى – كوميتەت) ءۇش ءتىلدى جەتىك بىلەتىن جاستار اراسىندا ء«تىلدارىن» رەسپۋبليكالىق  وليمپياداسىن (بۇدان ءارى - وليمپيادا) جاريالايدى. 

وليمپيادانىڭ ماقساتى: ءۇش ءتىلدى – قازاق، ورىس جانە اعىلشىن تىلدەرىن جەتىك مەڭگەرگەن قابىلەتتى جاستاردى انىقتاۋ جانە قولداۋ، تىلدىك قارىم-قاتىناس مادەنيەتىن قالىپتاستىرىپ، كوپ ءتىلدى مەڭگەرگەن تۇلعانى تاربيەلەۋ، قازاقستاندىق ءپاتريوتيزمدى نىعايتۋ، وزگە حالىقتاردىڭ مادەنيەتى مەن ءتىلىن قۇرمەتتەۋ.

وليمپيادانىڭ مىندەتتەرى: قازاقستان رەسپۋبليكاسىنىڭ ءتىل ساياساتىن جۇزەگە اسىرۋ، ءتىلدى مەڭگەرۋگە دەگەن قىزىعۋشىلىقتى ىنتالاندىرۋ، جان-جاقتى دامىعان، باسەكەگە قابىلەتتى تۇلعا تاربيەلەۋ.

          وليمپيادانىڭ شارتى: وليمپياداعا 18 مەن 22 جاس ارالىعىنداعى كەز كەلگەن ازامات قاتىسا الادى. وليمپيادا ەكى كەزەڭدە وتەدى: ءبىرىنشى كەزەڭ – وبلىستىق وليمپيادا; ەكىنشى كەزەڭ – رەسپۋبليكالىق وليمپيادا.

وليمپياداعا قاتىسۋشىلارعا مىناداي تاپسىرمالار بەرىلەدى:

1) بەرىلگەن تاقىرىپتىڭ مازمۇنىن تولىق اشۋ;

2) بەرىلگەن تاقىرىپ بويىنشا ەسسە جازۋ;

3) ماتىنگە ىلەسپە اۋدارما جاساۋ.

وليمپياداعا قاتىسۋشىلار ءۇش كەزەڭنەن ءوتۋى ءتيىس: ءبىرىنشى كەزەڭ – قازاق ءتىلىن ءبىلۋ; ەكىنشى كەزەڭ – اعىلشىن ءتىلىن ءبىلۋ; ءۇشىنشى كەزەڭ – ورىس ءتىلىن ءبىلۋ. 

وليمپيادانىڭ مىندەتتى شارتى –  الدىڭعى  دەڭگەيدەن (كەزەڭنەن) وتكەن قاتىسۋشى عانا كەلەسى دەڭگەيگە قاتىسا الادى. وليمپيادانىڭ قورىتىندىسى ءۇش دەڭگەيدەن وتكەن قاتىسۋشىلار اراسىندا جۇرگىزىلەدى.  وڭىرلەردىڭ باس جۇلدە يەگەرى رەسپۋبليكالىق كەزەڭگە جولداما الادى.

وليمپيادانىڭ قورىتىندىسىن شىعارۋ. قورىتىندى شىعارۋ كەزىندە: تىلدەردى مەڭگەرۋ دەڭگەيى; جازۋ ساۋاتتىلىعى مەن دىبىستاردىڭ دۇرىس دىبىستالۋى; جاۋاپتىڭ ورالىمدىلىعى مەن ساپاسى; جاۋاپتىڭ مازمۇندىلىعى مەن  ەرەكشەلىگى; ءوزىن-ءوزى ۇستاۋى، بەرىلگەن ۋاقىتىن دۇرىس پايدالانۋى ەسكەرىلەدى.

           بايقاۋ قاتىسۋشىلارىنىڭ جۇمىسىن باعالاۋ جانە جەڭىمپازداردى انىقتاۋ ءۇشىن قازىلار القاسى قۇرىلادى. قازىلار القاسىنىڭ قۇرامىن كوميتەت انىقتايدى. قازىلار القاسىنىڭ قۇرامى ءتىل مەن ادەبيەت، پەداگوگيكا  سالالارىنىڭ  عالىمدارى، زيالى قاۋىم وكىلدەرى، مادەنيەت جانە ونەردىڭ بەدەلدى قايراتكەرلەرىنەن تۇرادى. ساندىق قۇرامى 5 ادامنان اسپاۋى ءتيىس. قازىلار القاسىنىڭ قۇرامى توراعادان جانە مۇشەلەرىنەن تۇرادى. قازىلار القاسىنىڭ جۇمىسىنا توراعا باسشىلىق جاسايدى، شەشىم شىعارادى جانە قازىلار القاسىنىڭ شىعارعان شەشىمى ءۇشىن جاۋاپتى بولادى.  حاتشى قازىلار القاسىنىڭ شەشىمى بويىنشا حاتتامانى راسىمدەيدى.

وليمپيادا جەڭىمپازدارى قازىلار القاسىنىڭ شەشىمىنە سايكەس ديپلومدارمەن، العىسحاتتارمەن جانە باسقا دا  سىيلىقتارمەن ماراپاتتالادى.

          مەكەنجايىمىز: استانا قالاسى،  ورىنبور كوشەسى 8-ءۇي، 15-كىرەبەرىس، قازاقستان رەسپۋبليكاسى مادەنيەت جانە سپورت  مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى. بايلانىس تەلەفوندارى: 8(7172) 74-04-56, 74-05-10, 74-05-09 (تەل/فاكس).

اباي اقپارات