جاقىندا قازاقستاننىڭ مۇسىلماندار وداعى ۇيىمىنىڭ توراعاسى مۇرات تەلىبەكوۆ تۇركيا پرەزيدەنتى رەجەپ تايىپ ەردوعاندى گااگادا سوتقا بەرەتىنىن مالىمدەدى.

اسكەري بۇلىك جاساماقشى بولعان (بۇلىك كەزىندە قازا تاپقان) تۇركيا قارۋلى كۇشتەرىنىڭ وكىلدەرىنە بايلانىستى قازاقستاندىق بەلسەندى مۇرات تەلىبەكوۆ پەن وا بويىنشا ادام قۇقىقتارىن قورعاۋ كوميتەتى رەجەپ تايىپ ەردوعانعا شاعىمدانىپ، حات جازىپتى.

ء«سىز اشۋعا بەرىلىپ، ادىلەتتى اياققا تاپتاپ جاتىرسىز، پرەزيدەنت مىرزا! ۇمىتپاڭىز، ولار ءسىزدىڭ ەلدىڭ ازاماتتارى. ءاربىر قايتىس بولعان ازاماتتاردىڭ ارتىندا تۋعان-تۋىستارى، جاقىندارى بار. ولار سىزگە نە جازىپ قويدى؟! قىلمىسى ءۇشىن ولاردى وسىلاي جازالاۋ ارقىلى، ءسىز ولاردان دا اسىپ تۇسەتىن زۇلىمدىق جاسايسىز!»، - دەپتى الگى حاتتا.

اۋەلى مۇرات تەلىبەكوۆ مىرزا مەن ونىڭ ۇيىمى تۋرالى توقتالا كەتسەك، تەلىبەكوۆ مىرزانىڭ قازاقستان مۇسىلماندارىنىڭ اتىنان سويلەۋگە قانداي قۇقى بار؟

ءوزىن «قازاقستان مۇسىلماندار وداعىنىڭ» باسشىسى رەتىندە تانىستىراتىن مۇرات تەلىبەكوۆ 2015 جىلى پرەزيدەنتتىك سايلاۋعا تۇسپەك بولعاندا، قمدب قۇزىرلى ورگاندارعا ساۋال جاساپ، «قازاقستان مۇسىلماندار وداعىنىڭ» ۇيىم رەتىندە ەش جەردە تىركەلمەگەنىن دالەلدەگەن-ءتىن. دەمەك، تەلىبەكوۆتىڭ قازاقستان مۇسىلماندارىنىڭ اتىنان حالىقارالىق دەڭگەيدە سويلەۋىنە قۇقىعى جوق.

قازىر  تۇركياداعى الاعاي دا بۇلاعاي كەزەڭدە تۇركيا پرەزيدەنتى ادام قۇقىتتارى مەن باق ەركىندىگىنە شەكتەۋ قويىپ، ءبىرسىپارا باق-تى جاۋىپ، ونداعان ادامدى اۋىر جازاعا تارتۋ تۋرالى شەشىم شىعارعانى بەلگىلى. حوش، تەلىبەكوۆ مىرزانىڭ ماقسۇتى ادام قۇقىعىن، باق قۇقىعىن  قورعاۋ بولدى دەلىك.

سوندا ءوزىن-ءوزى مۇسىلماندار وداعىنىڭ باسشىرى رەتىندە تانىستىرىپ جۇرگەن تەلىبەكوۆ مىرزا 2011 جىلى جاڭاوزەن قالاسىندا «قاندى-قىرعىن» كەزىندە قايتىس بولعان ازاماتتار مەن ولاردىڭ تۋىستارى ماسەلەسىندە نەگە ء«لام-ميم» دەپ جاق اشپادى؟ جەتى اي بويى ۇكىمەتكە تەلمىرىپ، توزىمدەرى تاۋسىلعان جاڭاوزەندىكتەردىڭ قۇقىقتارى بۇزىلعاندا تەلىبەكوۆ مىرزا ءماسىموۆ ۇكىمەتىنىڭ ۇستىنەن نەگە شاعىم تۇسىرمەدى؟

نەمەسە 2013 جىلى شەڭگەلدى وقيعاسى كەزىندە قازاق وتباسى جاپا شەكتى. ارىستاي ازامات قايتىس بولدى. ودان كەيىن 2014 جىلدىڭ 31-جەلتوقسانى كۇنى الماتى وبلىسى ۇيعىر اۋدانىندا بولعان قازاق-ۇيعىر قاقتىعىسى بولدى. ءوز ەلىندە، ءوز جەرىندە وگەيدىڭ كۇيىن كەشكەن قازاقتاردىڭ  قۇقىقتارى شەكتەلگەندە تەلىبەكوۆ نەگە ءۇنسىز قالدى؟ بەرتىن كەلسەك، 2015 جىلى سارىاعاشتا بولعان قازاق-تاجىك جانجالى كەزىندە دە قازاق وتباسى اسقان جاۋىزدىقپەن ءولتىرىلدى. تەلىبەكوۆ وسىنداي باسسىزدىقتارعا جول بەرىپ وتىرعان ءماسىموۆ ۇكىمەتىن گااگادا نەگە سوتقا بەرمەدى؟ جوق الدە بۇل جەردە زاڭ بۇزىلعان، قۇقىق شەكتەلگەن ەشبىر فاكتى تىركەلمەگەن بە ەدى؟ جوق الدە، تەلىبەكوۆتىڭ ماسىموۆكە ءتىسى باتپاعانى ما؟

جوق، قازاقستاندىقتار قازادان قان جۇتىپ جاتسا دا مىڭق ەتپەگەن تەلىبەكوۆ ەندى ەردوعاندى گااگادا سوتقا بەرمەك ەكەن. حوش، «ىسكە ءسات!» دەۋدەن وزگە ايتارىمىز جوق.

نۇرزات توعجان

Abai.kz