ءبىلىم بەرۋ سالاسى تۋرالى تالقىلايتىن بولسام، مەن بىرەۋدى اسىرەسىلتەپ ماقتاۋدى ۇناتا بەرمەيمىن.  مەيلى ول تاريحقا قاتىستى بولسىن، مەيلى باسقا بولسىن. ءبىر ادامنان ەشقاشان قاتەلەسپەيتىن نەمەسە جامان قاسيەتتەرى مۇلدەم جوق، يدەال ادام جاساپ كورسەتكىسى كەلەتىندەردى دە تۇسىنبەيمىن جانە مەن ءوزىم دە ليتسەي تۇلەگى ەمەسپىن. سوندىقتان مەن ءبىزدىڭ ەلدەگى ەشبىر مەكتەپتى «مىنە ناعىز يەالدى مەكتەپ» دەپ ايتا المايمىن. تۇسىنىكتى عوي، ارقايسىسىنىڭ ارتىقشىلىعى دا بار، كەمشىلىگى دە بار.

بىراق، جاقىندا تۇركيا رەسپۋبليكاسىنىڭ ەلشىسى رەسمي حات جولدادى (ەلشى دەگەنىڭىز اۋلاداعى كورشىڭىز ەمەس قوي، ەلەمەيتىن). ەلشى ارالاسىپ وتىر دەگەنىڭىز – مەملەكەت ارالاسىپ وتىر دەگەن ءسوز. ەلشى: «تۇركياداعى سوڭعى بولعان وقيعالاردان كەيىن قازاقستان تارابى ءتيىستى شەشىمدەردى شىعارىپ، بۇل ۇيىمعا بايلانىستى ناقتى شارالاردى قولدانادى دەپ سەنەمىز»، دەپتى. ارينە، ەلشى بۇل سوزىمەن ءبىزدىڭ ەلدەگى «قازاق-تۇرىك ليتسەيلەرىن» مەڭزەسە كەرەك. انكارانىڭ قالاۋى – ءبىزدىڭ اتالعان ليتسەيلەردى دەرەۋ ارادا جاپقانىمىز. وزگە ءبىر مەملەكەتتىڭ ەلشىلەرى، كونسۋلدارى ءام مينيسترلەرى ءبىزدىڭ ەلدىڭ ىشكى شارۋاسىنا ارالاسۋى قازاقستان رەسپۋبليكاسىنىڭ ازاماتشاسى رەتىندە مەنىڭ نارازىلىعىمدى تۋدىرادى، ارينە. تۇركيا ەلشىسىنىڭ بۇل ارەكەتى – مەنىڭ كورشىم، «بابا ليۋدانىڭ» ماعان كەلىپ، مەنىڭ كىلەمىمنىڭ ءتۇسى دۇرىس ەمەستىگىن نەمەسە بالالارىما دۇرىس تاربيە بەرمەي جاتقانىمدى ايتىپ شاعىمدانۋىمەن پارا-پار قادام.

ءسوزىم قۇرعاق شىقپاس ءۇشىن، بىرنەشە دايەكتەر كەلتىرە كەتەيىن. ەشقانداي ەموتسياسىز. 1992-جىلدان باستاپ ەلىمىزدە 27 ليتسەي تىركەلگەن ەكەن. 3 جەكە-مەنشىكتەگى ليتسەي مەن 2 حالىقارالىق مەكتەپ. ءدال وسى قتل تۇلەكتەرى 1995-2016 جىلدار اراسىندا حالىقارالىق، رەسپۋبليكالىق، وبلىستىق ءبىلىم دودالارىندا بارلىعى 15156 مەدال يەلەنگەن. سوڭعى 3 جىلدىڭ وزىندە 5327 مەدال الىپتى. سونىڭ ىشىندە 3530 مەدالدى وبلىستىق ءبىلىم وليمپيادالارىندا، 856 مەدالدى، رەسپۋبليكالىق  وليمپيادالارىندا، 986 مەدالدى حالىقارالىق دودالاردا يەلەنىپتى. 2016 جىلدىڭ رەسمي مالىمەتتەرىنە سۇيەنسەك، قازاق-تۇرىك ليتسەيلەرىندە قازىرگ تاڭدا 811 مەداگوگ جۇمىس ىستەۋدە. سونىڭ ىشىندە 717 ۇستاز (88,4%)  قازاقستان رەسپۋبليكاسىنىڭ ازاماتى بولسا، 94 ۇستاز(11,6%) تۇركيا ازاماتى ەكەن. قازاق-تۇرىك ليتسەيلەرىنىڭ پەداگوگتىق كادرىنىڭ 91%-ى قازاقستان رەسپۋبليكاسىندا جوعارعى ءبىلىم العان ماماندار ەكەن. ەلىمىزدەگى 20 ليتسەيدىڭ ديرەكتورى – قازاقستان ازاماتى، ال 7 ليتسەيدىڭ ديرەكتورى تۇركيا ازاماتى. ەندى «التىن بەلگى» جانە «جوو گرانت» يەگەلەرى تۋرالى ايتىپ جاتۋدىڭ ءوزى ارتىق.  

ليتسەيلەر وبلىستىق جانە قالالىق ءبىلىم باسقارمالارىن تىكەلەي قارايدى. دەمەك، ءبىزدىڭ ليتسەيلەر – قر بعم قاراماعىندا مەكەمەلەر بولىپ سانالادى. بۇل دەرەكتەر اشىق دەرەككوزدەرىنەن الىنىپ وتىر. ءبىزدىڭ اۋىل قىزىنىڭ اۋزى ساسىق دەمەكشى، جامان دا بولسا، جاقسى دا بولسا، بىزدىكى عوي ەندى.  مەنىڭ تۇىنبەيتىنىم – ءبىز تاۋەلسىز مەملەكەتپىز عوي. ەندەشە وزگە مەملەكەتتىڭ ەلشىسى ءبىزدىڭ ەلدىڭ ىشكى ماسەلەسىنە نەگە ارالاسادى؟ وعان قانداي قۇقىق بەرىلگەن؟  

Sayin Nevzat Uyanik Bey, Lutfen Kazakistan'in icislerine mudahale etmeyin. Kazakistan bagimsiz bir devlettir.

قۇرمەتتى نەۆزەت ۇنالىك مىرزا، وتىنەمىن، قازاقستاننىڭ ىشكى شارۋارانىنا كەدەرگى كەلتىرمەڭىز. قازاقستان تاۋەلسىز مەملەكەت! 

ايجان حاميت

("فەيسبۋكتەگى"جەكە پاراقشاسىنان الىندى)

Abai.kz