وڭتۇستىك قازاقستان وبلىسىنا قاراستى شاراپحانا اۋىلدىق وكرۋگىندەگى يندۋستريالدى ايماقتا ورنالاسقان «Lotus Food Company LLC» جاۋاپكەرشىلىگى شەكتەۋلى سەرىكتەستىگىنىڭ «تەز ازىرلەنەتىن تاعامدار» وندىرىسىمەن جانە اۋىل شارۋاشىلىعى سالاسىنا ارنالعان بيوورگانيكالىق تىڭايتقىشتار شىعاراتىن فابريكا ءوز جۇمىسىن ناتيجەلى جالعاستىرىپ جاتىر، - دەپ حابارلايدى اباي-اقپارات.

جوبالىق قۇنى 472 ملن. تەڭگەنى قۇرايتىن كاسىپورىن جىلىنا 620 مىڭنان اسا قاپتاما ازىرلەۋگە قاۋقارلى. ءونىمدى رەسپۋبليكا اۋماعىنىڭ بارلىق قالالارىنا وتكىزۋ جوسپاردا بار. كۇندەلىكتى تۇرمىستا جوعارى سۇرانىسقا يە، تەز دايىندالاتىن ونىمدەر شىعاراتىن كاسىپورىن 48 ادامدى جۇمىسپەن قامتۋدا.

قازىرگى تاڭدا اۋدانداعى يندۋستريالدىق ايماقتا 5,8 ملرد. تەڭگەلىك 7 جوبا ماقۇلدانىپ، وسى جىلى جالپى سوماسى 722,7 ملن.تەڭگەلىك 2 جوبا يندۋستريالاندىرۋ كارتاسىنا ەنگىزىلىدى. ولار «وتىرابات قۇرىلىسى» جشس-نىڭ قۇنى 120 ملن. تەڭگەلىك گازوبلوك ءوندىرىسى مەن «اسىل باستاۋ كZ» جشس-ءنىڭ قۇنى 602,7 ملن. تەڭگە بولاتىن مايسىزداندىرىلعان قۇرعاق ءسۇت جانە سارى ماي ءوندىرۋ جوبالارى.

مۇنان سوڭ، قىزىلقيا اۋىل وكرۋگىندەگى 500 گەكتاردان استام جەرگە قارقىندى باۋ شارۋاشىلىعىن دامىتىپ وتىرعان «امانكەلدى» جشس-ءنىڭ جۇمىستارى كوڭىل كونشىتەرلىك. الما، الحورى، شابدالى، شيە، ءجۇزىم جەمىس-جيدەكتەرىن وسىرەتىن سەرىكتەستىك ونىمدەرىن قازاقستان اۋماعىنان بولەك، وزبەكستان، اۋعانستان، تاجىكستان رەسپۋبليكالارىنا شىعارۋدا. سونداي-اق، ولار مۇنداعى جەمىس-جيدەكتەر مەن كوكونىستەردى ساقتايتىن سىيىمدىلىعى 2 مىڭ توننالىق قويما جانە تۇقىم باعىندا وندىرىلەتىن الما مەن ءجۇزىم كوشەتتەرى بار.

اباي-اقپارات