بيىلعى ەل تاۋەلسىزدىگىنىڭ 25-جىلدىق مەرەيتويىمەن تۇسپا-تۇس كەلىپ وتىرعان «التىن كۇز» مەرەكەسى سايرامدىقتاردىڭ ىلگەرىدەن كەلە جاتقان ەڭبەك داستۇرىنە ادال ەكەندىكتەرىن تاعى دا ءبىر رەت ايقىندادى. ەرتە كوكتەمنەن قامدانعان اۋداننىڭ اۋىلشارۋاشىلىق سالاسىنىڭ ەڭبەككەرلەرى ەندى مىنە، سول تاباندى، جانقيارلىق قيمىلدىڭ جەمىسىن كورىپ وتىر. جالپى، تاۋەلسىزدىك العان 25 جىلدىڭ ىشىندە اۋداندا كوكونىس، كارتوپ، جەمىس-جيدەك ءوسىرۋ 4 ەسەگە ارتتى، ءىرى قارانىڭ سانى 90 مىڭعا، جىلقى 29 مىڭعا، قوي-ەشكى 14 مىڭعا جەتتى. سونىڭ ارقاسىندا ەت ءوندىرۋ 8 مىڭ تونناعا، ءسۇت ءوندىرۋ 79 مىڭ تونناعا ارتقانىن باسا ايتا كەتكەن ءجون. ديقاندار قاۋىمى سالانىڭ جۇمىسىن ودان ءارى شيراتىپ، كوزدەگەن مەجەگە قول جەتكىزدى. تاۋەلسىزدىكتىڭ مەرەيلى بەلەسىندە اۋداندا اۋىلشارۋاشىلىعىنىڭ جالپى ءونىم كولەمى 13,2 ەسەگە ءوسىپ، ول 42,5 ميلليارد تەڭگەنى قۇرادى. سونىمەن قاتار، بيىلعى جىلعى 10 ايدا 40 ميلليارد 426 ميلليون تەڭگەنىڭ جالپى ءونىمى ءوندىرىلدى. اۋىل ەڭبەككەرلەرى وسى مەرزىمدە 291 000 توننا مال ازىعىن جاساقتاپ، 18800 توننا جەمىس-جيدەك، 7600 توننا ءجۇزىم، 105000 توننا كوكونىس، 54800 توننا كارتوپ دايىندادى. بيدايدىڭ گەكتار بايلىعى ورتاشا ەسەپپەن 23,7 تسەنتنەردەن اينالىپ، 37967 توننا استىق قامباعا قۇيىلدى. وسىنىڭ بارلىعى سايىپ كەلگەندە، ديقانداردىڭ ەرتەلى-كەش تاباندى ەڭبەگىنىڭ ارقاسىندا مۇمكىن بولدى.

سايرامدىقتار سونداي-اق، ەلىمىزدىڭ ازىق-تۇلىك قورىن بايىتۋعا دا سالماقتى ۇلەس قوسىپ كەلەدى. ماسەلەن، بيىلعى 10 ايدا اۋداندا 16417 توننا ەت، 97284,8 توننا ءسۇت ءوندىرىلىپ، 13 ميلليون 128 مىڭ دانا جۇمىرتقا الىندى. بۇل كورسەتكىشتەردىڭ بارلىعى وتكەن جىلدىڭ ءتيىستى مەرزىمىمەن سالىستىرعاندا اناعۇرلىم ارتىق. اۋدان ەڭبەككەرلەرى مەملەكەتتىڭ «سىباعا»، «قۇلان» جانە «التىن اسىق» باعدارلامالارى بويىنشا دا وزدەرىنە جۇكتەلگەن تاپسىرمالاردى ەسەلەپ ورىندادى. سونىڭ ايعاعىنداي، اۋدانداعى مال بورداقىلاۋ الاڭدارىندا ءبىر مەزەتتە 28 مىڭ ءىرى قارا سەمىرتىلىپ جاتىر. اۋدان بويىنشا 10-15 ءىرى قارانى بورداقىلاۋ جانە جانۇيالىق ءسۇت اۋلالارىن قۇرۋ تاپسىرمالارى دا جەمىستى جۇزەگە اسقانىن ايتا كەتكەن ورىندى. ارينە، ادام اعزاسىنا وتە قاجەت دارۋمەن بولىپ تابىلاتىن كوكونىس ءوسىرۋ دە اۋداندا مىقتاپ قولعا الىنعان. قازىر سايرامدىقتار 79 جىلىجايدا جىلدىڭ ءتورت مەزگىلىندە كوكونىس ءوسىرىپ، داستارحان بايلىعىن مولايتۋعا ۇلەس قوسىپ ءجۇر. 513 گەكتار جەرگە تامشىلاتىپ سۋارۋ ءادىسى ويداعىداي جۇزەگە اسىرىلدى. اۋدان اۋماعىنداعى جالپى قۋاتتىلىعى 11400 توننا بولاتىن 11 كوكونىس پەن جەمىستى قايتا وڭدەيتىن تسەح، تاۋلىگىنە 35600 توننا ءسۇت وڭدەيتىن 6 كاسىپورىن، سونداي-اق، 440 توننا ەت وڭدەيتىن 4 كاسىپورىن تولىق قۋاتىندا جۇمىس اتقارىپ تۇر.

ءداستۇرلى «التىن كۇز» مەرەكەسىنە جينالعان كۇللى قاۋىمنىڭ الدىندا اۋىل ەڭبەككەرلەرىن بەرەكە مەيرامىمەن قۇتتىقتاعان اۋدان اكىمى س.ساپارباەۆ ءوز سوزىندە جوعارىداعى ماسەلەلەردى جان-جاقتى تىلگە تيەك ەتتى، ديقاندار مەن باعبانداردى، مالشىلاردى بيىلعى قول جەتكىزگەن ەڭبەك جەڭىسىمەن شىن جۇرەكتەن قۇتتىقتادى. اۋدان باسشىسى س.ساپارباەۆ، اۋداندىق ءماسليحاتتىڭ حاتشىسى ج.سۇلەيمەنوۆ، «نۇر وتان» پارتياسى اۋداندىق فيليالىنىڭ ءتورايىمى م.قالىباەۆا ەل داۋلەتىن ەسەلەپ، اۋدان ەكونوميكاسىن نىعايتۋعا ۇلكەن ۇلەس قوسقان ءتۇرلى سالا وزاتتارىن باعالى سىيلىقتارمەن ماراپاتتادى.

Abai.kz