جاريالىقتى كوزدەيتىن، اقپارات الۋدا كەدەرگىلەردى جوياتىن ءارى حالىققا وڭتايلى قىزمەت كورسەتۋدى الدىنا ماقسات ەتىپ قويعان «اشىق اكىمدىك» جوباسى اياسىندا وسىعاي دەيىن وڭتۇستىك قازاقستان وبلىسىنىڭ اكىمى مەن تۇرعىن اراسىندا سۇراق-جاۋاپ تۇرىندەگى ديالوگ ءوربىدى. بۇل تۋرالى «rgmedia.kz» سايتى حابارلايدى.

وندا وبلىس تۇرعىنا باسپانا ماسەلەسىنە قاتىستى ساۋال جولداعان بولاتىن. وعان وبلىس اكىمى ناقتى مالىمەتتەردى مىسالعا كەلتىرە وتىرىپ، جاۋاپ بەردى. وسىلايشا، وبلىس تۇرعىنى «اشىق اكىمدىك» جوباسى اياسىندا كوكەيىندە جۇرگەن ساۋالىنا تولىققاندى جاۋاپ الدى.

سۇراق:قۇرمەتتى وبلىس اكىمى! باسىندا باسپاناسى جوق ادامدارعا پاتەر جالداپ تۇرۋعا كوپتىڭ قالتاسى كوتەرە بەرمەيدى. وبلىسىمىزدىڭ ورتالىعىنان بولەك، وبلىستىق ماڭىزى بار كەنتاۋ، تۇركىستان، ارىس، سارىاعاش، جەتىساي، لەنگەر، شاردارا قالالارىندا تۇرعىن ءۇي سالاسىن دامىتۋ ماسەلەسى قانداي دەڭگەيدە جۇرگىزىلىپ جاتىر؟

جاۋاپ: قۇرمەتتى دارىن ارعىنوۆ! بۇگىنگى تاڭدا وبلىسىمىزدىڭ اۋدان جانە قالالارىندا باسپانا الۋ كەزەگىندە تۇرعان ازاماتتاردى ازايتۋ ماقساتىندا كوپ قاباتتى ۇيلەردى قۇرىلىسى جۇرگىزىلۋدە. 2015 جىلى قر ۇكىمەتىنىڭ قاۋلىسىمەن بەكىتىلگەن «وڭىرلەردى دامىتۋدىڭ 2020 جىلعا دەيىنگى» باعدارلاماسى اياسىندا مەملەكەتتىك بيۋدجەت ەسەبىنەن وبلىسىمىزدا 69 كوپ قاباتتى تۇرعىن ءۇيدىڭ قۇرىلىسى جۇرگىزىلۋدە. تۇرعىن ۇيلەردىڭ جالپى اۋدانى 159,2 مىڭ ش.م نەمەسە 2947 پاتەردى قۇرايدى. بيىلعى جىلى كەزەكتە تۇرعاندار ءۇشىن 2357 پاتەردى قۇرايتىن 36 ءۇيدى پايدالانۋعا تاپسىرۋ جوسپارلانىپ وتىر. ونىڭ ىشىندە: ارىس قالاسىندا 5 قاباتتى 150 پاتەردى قۇرايتىن 2 ءۇي، كەنتاۋ قالاسىندا 5 قاباتتى 60 پاتەرلى 1 ءۇي، شاردارا قالاسىندا 24 پاتەردى قۇرايتىن 1 ءۇي، جەتىساي قالاسىندا 36 پاتەرلى 1 ءۇي، شىمكەنت قالاسىندا توعىز قاباتتى 31 ءۇي. شىمكەنت قالاسىندا جىل سوڭىنا دەيىن 2087 وتباسىنا باسپانامەن قامتۋ جوسپارلانىپ وتىر. ال 590 پاتەردى قۇرايتىن 32 ءۇيدىڭ قۇرىلىسى 2016 جىلعا وتپەلى.

اباي اقپارات