«اشىق اكىمدىك» جوباسى اياسىندا وڭتۇستىك قازاقستان وبلىسىنىڭ تۇرعىندارى ارناۋلى ورىندارعا، قۇزىرلى مەكەمەلەرگە، اكىمدىكتەرگە، باسقارمالارعا، ءتۇرلى بولىمدەرگە تالاپ-تىلەكتەرىن، ارىز-شاعىمدارىن، وي-پىكىرلەرىن جەتكىزە الادى. بۇل تۋرالى «rgmedia.kz» سايتى حابارلايدى.

 «اشىق اكىمدىك» جوباسى حالىق پەن بيلىك اراسىنداعى كەدەرگىلەردى، اكىمدىك تاراپىندا كەزدەسەتىن توسقاۋىلداردى جويۋعا نەگىزدەلگەن. بۇل جوبا بويىنشا، تۇرعىندار ءاربىر مەكەمەنىڭ تابالدىرىعىن توزدىرماي-اق، ونلاين رەجيمدە ءوز ساۋالدارىن جىبەرە الادى. ءتىپتى، وبلىس اكىمىنىڭ جەكە بلوگىنا حات جازۋ ارقىلى تىكەلەي شىعا الادى. سونىمەن قاتار، بۇل جەردە ونلاين كونفەرەنتسيا ارقىلى سۇراق قويىپ، سەنىم تەلەفوندارىنا، بايلانىس ورتالىقتارىنا دا جۇگىنە الادى. وسى ارقىلى، ماسەلەڭىزدى شەشە الاسىز.

جاقىندا «اشىق اكىمدىك» شەڭبەرىندە ينستاگرام جەلىسىندە وقو اكىمدىگىنىڭ Ontustik_derek  پاراقشاسى اشىلدى. مۇندا وبلىس تۇرعىندارىنىڭ تۇرعىن-ءۇي كوممۋنالدى شارۋاشىلىق، جول، جارىق سالاسىنا قاتىستى ساۋالدار جولداپ، ودان ناقتى ءبىر ناتيجە الۋعا جاعداي جاسالعان. مۇندا اتقارىلعان جۇمىستار تۋرالى، شىققان ناتيجەلەر ءجيى جاريالانىپ تۇرادى.

بيىل 8 تامىز كۇنى وبلىستىق ترانسپورت، كوممۋنالدى شارۋاشىلىق جانە جەر ماسەلەلەرى جونىندەگى بىرىڭعاي بايلانىس ورتالىعىنا (تەل. 39-55-55) شىمكەنت قالاسىنىڭ تۇرعىنىنان شاعىم تۇسكەن بولاتىن. وندا ازامات ش.قالداياقوۆ كوشەسىنىڭ بويىنداعى ءوسىپ كەتكەن اعاش بۇتاقتارى كەدەرگىسىن كەلتىرىپ جاتقانىن حابارلاعان. سونداي-اق، قالا تۇرعىنى اتالعان ماسەلە سول ماڭداعى ءۇي تۇرعىندارىنا قولايسىزدىق تۋعىزىپ جاتقاندىعىن ايتقان ەدى. كوپ وتپەي، اباي اۋدان اكىمدىگىنىڭ قاداعالاۋىمەن "لتد تۇرمىس " جشس-ءنىڭ ماماندارى تال بۇتاقتارىن كەسۋ جۇمىستارىمەن اينالىستى. ناتيجەسىندە، كەدەرگى جويىلىپ، ماسەلە تولىقتاي شەشىلدى. 

اباي اقپارات