سەسسيا جۇمىسىنا وبلىس اكىمى جانسەيىت تۇيمەباەۆ، وبلىستىق ءماسليحات دەپۋتتارى مەن وبلىس اكىمىنىڭ ورىنباسارلارى، باسقارما باسشىلارى جانە اۋدان، قالا اكىمدەرى، بۇقارالىق اقپارات قۇرالدارىنىڭ وكىلدەرى قاتىستى. 

سەسسيانىڭ كۇن تارتىبىندە 2017-2019 جىلدارعا ارنالعان وبلىستىق بيۋدجەت پەن وقو ءىىد جەرگىلىكتى پوليتسيا قىزمەتىنىڭ اتقارىلعان جۇمىستار ەسەبى، تۇراقتى كوميسسيانىڭ قۇرامىنا وزگەرىستەر ەنگىزۋ جايى مەن ءماسليحاتتىڭ 2017 جىلعا ارنالعان  جۇمىس جوسپارى، بىرقاتار وڭىرلىك كەڭەستىڭ دەربەس قۇرامىن بەكىتۋ سىندى 25  ماسەلە قارالدى.

جيىندا «نۇرلى جول» باعدارلاماسىنىڭ ورىندالۋى بويىنشا بايانداعان وبلىس اكىمىنىڭ ورىنباسارى  ەربول سادىر ۇلتتىق قور ەسەبىنەن  4 باعىت بويىنشا  49 نىساننىڭ قۇرىلىسىن جۇرگىزۋ ءۇشىن 24 546,6  ملن. تەڭگە قارالعانىن ءمالىم ەتتى. ونىڭ ايتۋىنشا، بۇگىنگە دەيىن اتالعان قارجىنىڭ 22 881,7 ملن. تەڭگەسى يگەرىلگەن. ال، قالعان  1664,9 ملن تەڭگەسى جىل سوڭىنا دەيىن تولىق جۇمسالاتىن بولادى.   

جىل باسىندا وڭىرىمىزدە جالپى قۇنى 12 ملرد. 973 ملن. تەڭگەنى قۇرايتىن  26 مەكتەپ پەن 1 بالاباقشانىڭ قۇرىلىسى جۇرگىزىلىپتى. باعىتتالعان  قارجىنىڭ 98 پايىزى يگەرىلىپ، ناتيجەسىندە 9 مەكتەپ پەن 1 بالاباقشا پايدالانۋعا بەرىلگەن. «ال قالعان 17 مەكتەپتىڭ قۇرىلىسى 2017 جىلدىڭ ەنشىسىنە قالىپ وتىر»، - دەدى اكىم ورىنباسارى. 

 سونداي-اق ەربول سادىر مەملەكەتتىك باعدارلامالاردى جۇزەگە اسىرۋعا بولىنگەن قارجى جىل سوڭىنا دەيىن تولىعىمەن يگەرىلەتىنىن جەتكىزدى. 

التىنشى شاقىرىلىمداعى وبلىستىق ءماسليحاتىنىڭ كەزەكتى سەسسياسىندا ءوڭىردىڭ ءوسىپ وركەندەۋىنە سۇبەلى ۇلەس قوسىپ جۇرگەن بىرقاتار حالىق قالاۋلىلارى وڭتۇستىك قازاقستان وبلىسىنىڭ قۇرمەت گراموتاسىمەن    ماراپاتتالدى.

Abai.kz