قر پرەزيدەنتى نۇرسۇلتان نازارباەۆ قازاقستاندى ۇزدىك 30-دىققا كىرگىزەر «ناقتى 100 قادام» - ۇلت جوسپارىن قابىلداعان بولاتىن. بۇل تۋرالى «rgmedia.kz» سايتى حابارلايدى.

بۇل باعدارلامانىڭ 94 قادامى «اشىق ۇكىمەتتى» ەنگىزۋ كەرەكتىگى ايتىلعان. وسى ارقىلى حالىققا ەسەپ بەرەتىن ۇكىمەت قۇرىلادى. قازىرگى قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ وڭتۇستىك قازاقستان وبلىسىنىڭ اكىمى بولىپ تۇرعان كەزدە «اشىق اكىمدىك» جوباسى ەنگىزگەن ەدى. وسىنىڭ ارتىنشا وبلىس اكىمى «ترانستەلەكوم» اق پرەزيدەنتى داۋرەن پشەمباەۆپەن كەزدەسىپ، ماڭىزدى ماسەلەلەردى تالقىلادى. كەزدەسۋ قورىتىندىسىندا تاراپتار شىمكەنت قالاسىندا «Smartمەكتەپ»، «Smartەمحانا»، «Smartكوشە جارىعى» سىندى بىرقاتار پيلوتتىق سمارت-جوبالاردى ىسكە قوسۋ تۋرالى كەلىسىمگە كەلدى. سونىمەن قاتار الداعى ۋاقىتتا وڭتۇستىك قازاقستان وبلىسىندا سمارت-باستامالاردى مەملەكەتتىك جانە جەكەمەنشىك ارىپتەستىك مودەلى بويىنشا ىسكە اسىرۋ دا قاراستىرىلعانىن ايتا كەتۋىمىز كەرەك.

وسى كەزدەسۋدەن كەيىن كوپ ۇزاماي، وڭتۇستىك قازاقستان وبلىسىنىڭ اكىمدىگىندە شىمكەنت قالاسىندا «اشىق اكىمدىك» جوباسى اياسىندا جۇزەگە اسىرىلۋى ءتيىس «Smart City» جوباسىنىڭ تانىستىرىلىمى ءوتتى. دەنساۋلىق ساقتاۋ سالاسىنىڭ قىزمەتتەرىنەن باستاپ، كولىك تۇراعىن رەتتەۋ جايى سىندى قالا حالقىنىڭ بارلىق ماسەلەلەرىنە دەيىن قامتيدى. ايتا كەتەيىك، اتالعان جوبا نەگىزىندە الەمنىڭ كوپتەگەن ءىرى قالالارى جۇمىس ىستەيدى. وقو اكىمىنە تانىستىرىلعان جوبادا توعىز باعىت قامتىلعان. ولار - دەنساۋلىق ساقتاۋ مەن ءبىلىم، كولىك – كولىك تۇراعى جانە قوعامدىق كولىك، تۇرعىن ءۇي-كوممۋنالدى شارۋاشىلىعى – كوشەنى جارىقتاندىرۋ، بىرىڭعاي تولەم قۇجاتىن ەندىرۋ جانە اتالعان سالادا دۇرىس شەشىم قابىلداۋدى ۇيرەنۋ، قاۋىپسىزدىك – قالا بويىنشا بەينەباقىلاۋ ورناتۋ، شىمكەنت قالالىق اكىمدىگىنىڭ قىزمەت كورسەتۋ ساپاسىن ارتتىراتىن زياتكەرلىك بايلانىس ورتالىعى سياقتى باعدارلار. جوبانى ازىرلەۋشىلەردىڭ ايتۋىنشا، شىمكەنتكە «SMART-تەحنولوگيانى» ەندىرۋدىڭ ارتىقشىلىعى سول، ول كەزدە شاھار جۇرتشىلىعىنىڭ ءومىر ءسۇرۋ ساپاسى ارتا تۇسەدى. سونىمەن قاتار، جەرگىلىكتى بيۋدجەتتىك شىعىندار ازايىپ، سايكەسىنشە، كىرىس كولەمى ۇلعاياتىن بولادى.

وسىلايشا، "اشىق اكىمدىك" جوباسىنىڭ قىزمەت اياسى كەڭەيىپ كەلەدى. 

اباي اقپارات