قازاقستان رەسپۋبليكاسى پارلامەنتى

ءماجىلىسىنىڭ توراعاسى

ن.ز. نىعماتۋلينگە

قۇرمەتتى نۇرلان زايروللاۇلى!

بۇگىن مەملەكەت باسشىسى نۇرسۇلتان نازارباەۆ كونستيتۋتسيانىڭ 61-بابىنىڭ 1-تارماعىنا سايكەس ءوز باستاماسىمەن پارلامەنت ءماجىلىسىنىڭ قاراۋىنا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ەنگىزدى. 

2013 جىلى ءتورت جىلسىز ازاماتتىق بەرىلمەيتىن ەتىلىپ اسىعىس قابىلدانعان قاتاڭ زاڭ شەتەلدەن كوشىپ كەلگەن نەشە جۇزدەگەن قانداستارىمىزدى اكىمشىلىك قۇقىق بۇزۋشىلىققا ۇرىندىردى.

سونىڭ كەسىرىنەن، مىسالى 2015 جىلى 307 ەتنيكالىق قازاق ەلدەن تىس جەرگە شىعارىلىپتى. 2016 جىلدىڭ العاشقى توعىز ايىندا 199 قانداسىمىز جازاعا تارتىلىپ، ءوز ەلىنە قايتارىلىپتى. بۇل – ىشكى ىستەر ءمينيسترى ق.قاسىموۆتىڭ سەناتور مۇرات باقتيارۇلىنا ءوز قولىمەن بەرگەن مالىمەتى. ال، ءبىز جاعىنان سۇراۋ جىبەرىلگەنىمەن، مينيستر 2014 جىلى قانشا قازاقتىڭ ءدال وسى قۇقىق بۇزۋشىلىقتىڭ قۇربانى بولعانى تۋرالى مالىمەت بەرمەپتى. 2014 جىلعى كورسەتكىش بۇدان دا كوپ بولۋى مۇمكىن!

وكىنىشكە وراي، وسى اكىمشىلىك شارامەن سوتتىڭ شەشىمى ارقىلى ەلدەن قۋىلعان قانداس ازاماتتار بەس جىلسىز قازاقستانعا ورالا المايدى. وتباسىلار ەكىگە ءبولىنىپ قالدى...

بۇرىن ءبىر مارتە اكىمشىلىك قۇقىق بۇزعان شەتەلدىك ازامات جازاعا تارتىلىپ، ءوز ەلىنە قايتارىلاتىن بولسا، وتكەن جىلى قايتا قابىلدانعان زاڭ جوباسىندا بۇل نورما بىرنەشە رەت بۇزعان جاعدايدا ەلدەن شىعارىلادى دەپ وزگەرتىلدى («حالىقتىڭ كوشى-قونى تۋرالى» زاڭنىڭ 49-باپ، 5-تارماعى).

مىنە، ۇلت كوشباسشىسى نۇرسۇلتان نازرباەۆ «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ماجىلىسكە ەنگىزدى.

قازاقستان رەسپۋبليكاسى پارلامەنتى ءماجىلىسىنىڭ پارلامەنت ءماجىلىسىنىڭ توراعاسى مارتەبەڭىزبەن، ەسكى زاڭنىڭ تىم قاتاڭدىعىن ەسكەرە وتىرىپ، ءسىزدىڭ قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە سايكەس كوشى-قون زاڭناماسىن بۇزعانى ءۇشىن، 2014 جىلدىڭ 1 قاڭتارىنان بەرى سوت شەشىمىمەن ەلدەن تىس جەرگە شىعارىلعان سول قانداستارىمىزعا دا ءبىر مارتە راقىمشىلىق جاساتۋعا ىقپال ەتۋىڭىزدى سۇرايمىن.

بۇل راقىمشىلىق - تۋمالارىنان ءبولىنىپ قالعان ەتنيكالىق قازاقتاردى اتاجۇرتقا ورالتىپ، وتباسىنا قايتا قوساتىن بولادى.

قۇرمەتپەن،

اقىن، اۋىت مۇقيبەك

29.11.2016

Abai.kz