ارداقتى الاش بالاسى!

ۇلتتىڭ تاعدىرى مەن بولاشاعىنا، بىرلىگى مەن تىرلىگىنە قاتىستى قاتىستى مەنىڭ مىنا ۇسىنىسىما قولداۋ كورسەتىپ، داۋىس بەرۋلەرىڭىزدى سۇرايمىن!

ءبىر كەزدەرى تاريحي جاعدايلارعا بايلانىستى قازاق حالقى دۇنيەجۇزىنىڭ تۇكپىر-تۇكپىرىنە تارىداي شاشىراپ، شىلدەي توزىپ كەتتى. تاۋەلسىزدىك العان كۇننەن بەرى ن.ءا.نازارباەۆتىڭ كوشى-قون جانە دەموگرافيالىق ساياساتىنىڭ ارقاسىندا الىس-جاقىن شەتەلدەردەن ءبىر ميلليونداي قانداسىمىز وتان قۇشاعىنا ورالدى. "قايدا بولسا دا جان باقپاق پارىز" دەگەن قادىمي قاعيدا بار. سول قاعيدامەن ءالى دە 5 ميلليونداي قانداسىمىز دۇنيەنىڭ تۇكپىر-تۇكپىرىندە تىرلىك ەتىپ جاتىر. ەلگە ورالعىسى كەلگەنى ءجايلاپ كەلە جاتار. بىراق سول 5 ميلليون قازاقتىڭ تۇگى قالماي، ءتۇپ قوتارىلىپ كوشىپ كەلۋى دە نەعايبىل... 

تاۋەلسىزدىككە قول جەتكىزۋدەن، ونى ساقتاپ قالۋدىڭ الدە قايدا قيىن ەكەنىن بارلىقتارىڭىز جاقسى بىلەسىزدەر. ول ءۇشىن مەملەكەتتىڭ ەگەسى بولىپ وتىرعان قازاق حالقىنىڭ ءوزىنىڭ ىشكى ىنتىماق-بەرەكەسى، اۋىزبىرلىگى، تاتۋلىعى، باۋىرمالدىعى شەشۋشى ءرول اتقارادى. جاھاندانۋ دەيتىن مىناداي الماعايىپ زاماندا بىزگە، الاش بالاسىنا ءتىپتى دە ءبىر جاعادان باس، ءبىر جەڭنەن قول شىعارىپ، ايگىلى اقىن سابىر اداي ايتقانداي ء"ار قازاق مەنىڭ جالعىزىم" دەپ تىرلىك ەتۋىمىزگە تۋرا كەلەدى. ول ءۇشىن ۇلتىمىزدى ۇيىستىرىپ، جۇرتىمىزدى جۇمىلدىرا تۇسەتىن ماڭىزدى ءىس-شارالار كەرەك. ونداي ءىس-شارانىڭ ءتۇرى كوپ. سونىڭ ءبىرى - ۇلت بىرلىگى كۇنى! 

شىنى كەرەك، ءبىزدىڭ ەلدە مەركەلەر از ەمەس. بىراق ولاردىڭ ءبارى مەملەكەتتىك، جالپىادامزاتتىق، جالپىشىعىستىق، جالپىمۇسىلماندىق سيپاتتا بولىپ كەلەدى. ارينە، ول دا كەرەك. دەگەنمەن، بىزگە قازاق دەيتىن حالىقتىڭ ءوزىنىڭ ىنتىماق-بەرەكەسىنە، اۋىزبىرلىگىنە، تاتۋلىعى مەن باۋىرمالدىعىنا وڭ ىقپال ەتەتىن جەكە مەرەكە وتە كەرەك. سونداي-اق ول مەرەكە بۇكىل دۇنيەجۇزىندەگى قازاق بالاسىنىڭ بارىنە (كوشىپ كەلگەنى بار، كەلمەگەنى بار، وتاندا ءومىر ءسۇرىپ جاتقانى بار...) ورتاق بولۋ كەرەك! 

ۇكىمەت ۇسىنىپ، ەلباسى قول قويسا، قازىرشە بەيرەسمي مەرەكە رەتىندە قوعامدىق نەگىزدە اتاپ وتۋگە بولادى. ماسەلەن، باستاپقى كەزدە، قازاقستاندا "دۇنيەجۇزى قازاقتارى قاۋىمداستىعىنىڭ" ورتالىق اپپاراتى، جانە ونىڭ استانا مەن وبلىستارداعى بولىمشەلەرى; شەتەلدەردە قازاق مادەني ورتالىقتارى مۇرىندىق بولادى. بىرتە-بىرتە جالپىۇلتتىق دەڭگەيگە كوتەرىلىپ كەتەدى. 

بۇل اسىرەسە، ەل ەگەسى بولىپ وتىرعان قازاقستانداعى قانداستارىمىزدىڭ بەرەكە-بىرلىگىنىڭ نىعايا تۇسۋىنە، سونىمەن بىرگە شەتەلدەردە، سونىڭ ىشىندە ەۋروپا ەلدەرىندەگى وتە ازشىلىقتا ءومىر ءسۇرىپ جاتقان قانداستارىمىزدىڭ جاس ۇرپاعى ءۇشىن، ولاردىڭ جىل سايىن باس قوسىپ، وزدەرىنىڭ قازاق بالاسى ەكەندىگىن سەزىنىپ، ۇلت پاتريوتى بولىپ وسۋىنە ەرەكشە يگى ىقپال ەتەدى دەپ سەنەمىز. 

سونىمەن ءبىز ۇسىنىپ وتىرعان مەرەكەنىڭ اتاۋى - "دۇنيەجۇزى قازاقتارىنىڭ بىرلىگى كۇنى" 

ۋاقىتى - قىركۇيەك ايىنىڭ 30-شى كۇنى. 

بۇل كۇن: 

- قازاق ەلى تاۋەلسىزدىگىنىڭ ەكىنشى جىلى، ياعني 1992 جىلى "دۇنيەجۇزى قازاقتارىنىڭ تۇڭعىش قۇرىلتايى" وتكەن كۇن.

- دۇنيەجۇزى قازاقتارى قاۋىمداستىعى قۇرىلعان كۇن.

- حالقىمىزدىڭ پەيىلىندەي دارقان، بەرەكەلى، شۋاقتى كەز. 

(ىزدەنە بەرسەك، باسقا دا تاريحي داتالارمەن سايكەس كەلۋى مۇمكىن).

دۇنيەجۇزى قىتايلارىنىڭ مەرەكەسى كۇنى