قادىرلى ءتىل جاناشىرلارى!

رەسپۋبليكامىزداعى قوعامدىق قوزعالىستاردى، دەموكراتيالىق، پاتريوتتىق پارتيالار مەن جاستار ۇيىمدارىنىڭ، سونداي-اق زيالى قاۋىم وكىلدەرىنىڭ باسىن بىرىكتىرەتىن «تاۋەلسىزدىكتى قورعاۋ» دەموكراتيالىق قوزعالىسىنىڭ ۇيىمداستىرۋىمەن 2010 جىلدىڭ 19-قىركۇيەگى كۇنى س.اسفاندياروۆ اتىنداعى قازاق ۇلتتىق مەديتسينالىق ۋنيۆەرسيتەتتىڭ كونگرەسس-حوللىندا (بوگەنباي باتىر ك-ءسى 151, سەيفۋللين ك-ءنىڭ قيىلىسى), ساعات 12-00-دە, الماتى قالالىق اكىمدىگىنىڭ رۇقساتىمەن قازاق ءتىلىنىڭ مەملەكەتتىك مارتەبە يەلەنۋىنىڭ 21 جىلدىعىنا وراي «مەملەكەتتىك ءتىلدى قولداۋ» اكتسياسى وتكىزىلەدى.

قادىرلى ءتىل جاناشىرلارى!

رەسپۋبليكامىزداعى قوعامدىق قوزعالىستاردى، دەموكراتيالىق، پاتريوتتىق پارتيالار مەن جاستار ۇيىمدارىنىڭ، سونداي-اق زيالى قاۋىم وكىلدەرىنىڭ باسىن بىرىكتىرەتىن «تاۋەلسىزدىكتى قورعاۋ» دەموكراتيالىق قوزعالىسىنىڭ ۇيىمداستىرۋىمەن 2010 جىلدىڭ 19-قىركۇيەگى كۇنى س.اسفاندياروۆ اتىنداعى قازاق ۇلتتىق مەديتسينالىق ۋنيۆەرسيتەتتىڭ كونگرەسس-حوللىندا (بوگەنباي باتىر ك-ءسى 151, سەيفۋللين ك-ءنىڭ قيىلىسى), ساعات 12-00-دە, الماتى قالالىق اكىمدىگىنىڭ رۇقساتىمەن قازاق ءتىلىنىڭ مەملەكەتتىك مارتەبە يەلەنۋىنىڭ 21 جىلدىعىنا وراي «مەملەكەتتىك ءتىلدى قولداۋ» اكتسياسى وتكىزىلەدى.

وزدەرىڭىزگە ءمالىم، قازاق ءتىلى قازاقستان رەسپۋبليكاسى تاۋەلسىزدىككە قول جەتكىزبەي تۇرعان شاقتا، ياعني، 1989 جىلدىڭ 22-قىركۇيەگىندە مەملەكەتتىك ءتىل مارتەبەسىن يەلەندى. الايدا وتكەن 21 جىلدا مەملەكەتتىك ءتىل قازاقستان حالقىن بىرىكتىرەتىن، ولاردىڭ باسىن قوساتىن نەگىزگى فاكتورعا تولىق اينالا المادى. قانشاما رەت ماسەلە كوتەرسەك تە ءالى كۇنگە دەيىن مەملەكەتتىك ءتىل تۋرالى زاڭ قابىلدانعان جوق. بيلىك جەتىستىك رەتىندە باعالاعان تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىندا دا نەگىزگى ماسەلەلەر كەيىنگە ىسىرىلىپ، ءبىزدىڭ تالاپ-تىلەكتەرىمىز تاعى دا ەسكەرىلمەي قالۋى مۇمكىن بولىپ تۇر. ەڭ باستىسى، اتالمىش باعدارلامادا دا مەملەكەتتىك ءتىلدى وزگە تىلدەرمەن تەڭەستىرىپ قويۋ نيەتى بايقالادى. قازاق ءتىلىنىڭ مەملەكەتتىك ءتىل ەكەندىگى مۇلدە اڭعارىلمايدى. ەگەر باعدارلامادا قاداپ ايتىلعانىنداي ورىس ءتىلىنىڭ فۋنكتسياسى مەملەكەتتىك تىلمەن تەڭ ساقتالار بولسا وندا قازاق ءتىلىنىڭ مارتەبەسى ەشقاشان كوتەرىلمەيدى. بۇل كەزىندە قوعامدىق ۇيىمداردىڭ تاباندىلىق تانىتۋى ناتيجەسىندە قول جەتكىزگەن، پرەزيدەنت قول قويعان «ەل بىرلىگى» دوكتريناسىنداعى «بارلىق قازاقستاندىقتار، اسىرەسە وسكەلەڭ ۇرپاق، مەملەكەتتىك ءتىلدى مەڭگەرۋى قاجەت» دەگەن تالاپقا قايشى كەلەدى. سونداي-اق ءۇش تۇعىرلى ءتىل ساياساتىن جۇزەگە اسىرۋ بارىسىندا دا مەملەكەتتىك ءتىلدى نازارعا الماۋ ورىن تەپكەن. سوندىقتان ءبىز بيلىكتى حالىقپەن ساناسۋعا، بارىنەن بۇرىن مەملەكەتتىك ءتىل تۋرالى زاڭدى بيىلعى جىلدان قالدىرماي قابىلداۋعا شاقىرامىز.

ءبىز، قوعامدىق قوزعالىستار، دەموكراتيالىق، پاتريوتتىق پارتيالار مەن جاستار ۇيىمدارى، سونداي-اق زيالى قاۋىم وكىلدەرى، وسىعان دەيىن دە بيلىكتىڭ كەيبىر سولاقاي شەشىمدەرىنە كەلىسپەيتىندىكتەرىمىزدى ءبىلدىرىپ، بىرنەشە رەت بىرلەسكەن نارازىلىق شارالارىن وتكىزگەن بولاتىنبىز. سونىڭ ناتيجەسىندە باستاۋىن «امەريكاندىق ۇلتتان» الاتىن، كوپ ۇلتتان ءبىر ۇلت جاساۋعا نەگىزدەلگەن «قازاقستاندىق ۇلت» يدەياسىنىڭ سالتانات قۇرۋىنا تۇبەگەيلى تويتارىس بەردىك. سول سياقتى 1 ملن. گەكتار جەردىڭ قىتايعا جالعا بەرىلۋىنە دە جول بەرمەدىك. ءوزىنىڭ ۇلتىنا، انا ءتىلىمىزدىڭ بۇگىنگى جاعدايىنا نەمقۇرايدى قارامايتىن ءاربىر ازامات بۇل جولى دا بىزبەن بىرگە بولادى دەپ سەنەمىز.

مەملەكەتتىك ءتىل مارتەبەسىن اسقاقتاتۋدى ويلاعان ۇلت جاناشىرلارىنىڭ بارىنە ەسىك اشىق!

اكتسيا بارىسىندا «مۋزارت»، «سەرىلەر»، «جەبە»، «جاسىن»، «ۇلىتاۋ»، «دو-ماجور» توپتارىنىڭ جانە تاعى دا باسقا بەلگىلى ونەر شەبەرلەرىنىڭ انا ءتىلىن، ۇلتتىق، مەملەكەتتىك رۋحتى اسقاقتاتاتىن اندەرى شىرقالادى.

ۇيىمداستىرۋ كوميتەتى